Estera (Gr) 1
1
Hyrje
1a Në vitin e dytë të mbretërimit të mbretit të madh Kserks, ditën e parë të muajit nisan, Mordakai, biri i Jairit, të birit të Shimeit, të birit të Kishit, nga fisi i Benjaminit, pa një ëndërr. 1b Ai ishte një jude, që banonte në qytetin Shushan, njeri i madh, që shërbente në oborrin e mbretit. 1c Ishte njëri nga të shpërngulurit, që Nabukodonosori, mbreti i Babilonisë, i kishte shpërngulur nga Jerusalemi me Jehoninë, mbretin e Judesë. 1ç Kjo qe ëndrra e tij: ja, zhurmë e trazirë, vetëtimë e tërmet, rrëmujë mbi dhe. 1d Dy dragonj të mëdhenj u bënë gati, u afruan të dy për përleshje dhe ulërinë me të madhe. 1dh Nga ulërima e tyre, të gjitha kombet u përgatitën për luftë, për të luftuar kundër kombit të drejtë. 1e Dhe, ja, ajo ishte ditë terri dhe errësire, mundi e ankthi, pikëllimi e rrëmuje të madhe mbi dhe. 1ë Tërë kombi i drejtë u trazua. Patën frikë se do të rrënoheshin, u përgatitën të shkatërroheshin dhe i thirrën Perëndisë. 1f Nga britma e tyre doli, si nga një burim i vogël, një lumë i madh me shumë ujë. 1g Atëherë doli drita dhe dielli. Të përulurit u lartësuan dhe përpinë të lavdishmit. 1gj Mordakai, pas ëndrrës, u zgjua dhe pa çfarë kishte vendosur të bënte Perëndia. U mendua dhe u përpoq ta kuptonte nga çdo anë, derisa u bë natë.
Përbetimi kundër mbretit
1h Mordakai po pushonte në treme me Gabatain dhe Tarain, dy eunukët e mbretit, që ruanin tremen. 1i Dëgjoi arsyetimet e tyre, hetoi synimet e tyre, mësoi se ata po përgatiteshin të vinin dorë në mbretin Kserks dhe e njoftoi mbretin për këtë. 1j Mbreti i mori në pyetje dy eunukët. Ata treguan dhe u dënuan me vdekje. 1k Mbreti i shkroi këto ngjarje në librin e kujtimeve, por edhe Mordakai shkroi për këto ngjarje. 1l Mbreti e caktoi Mordakain kujdestar të tremes dhe e shpërbleu me dhurata. 1ll Por aty ishte edhe Amani, biri i Hamadata Agitit, i cili ishte i rëndësishëm për mbretin. Ai u përpoq t'i bënte keq Mordakait dhe popullit të tij, për shkak të dy eunukëve të mbretit.
Gostia e mbretit
1Në kohën e Kserksit#1.1 he. Ahashverushit, të atij Kserksit që sundoi mbi njëqind e njëzet e shtatë krahina nga India deri në Kush, 2në atë kohë, pra, kur Kserksi ishte mbret mbi fronin e mbretërisë së vet, që gjendej në kështjellën e Shushanit, 3në vitin e tretë të mbretërimit të tij, ai shtroi një gosti për të gjithë prijësit dhe nëpunësit e vet. Ishin të pranishëm edhe ushtarakët e Persisë e të Medës, bashkë me fisnikët dhe kryetarët e krahinave, 4kur ai shfaqi begatinë lavdiplote të mbretërisë së tij dhe nderin hijerëndë të madhështisë, që zgjati shumë kohë: njëqind e tetëdhjetë ditë. 5Pas këtyre ditëve, mbreti shtroi një gosti shtatëditore, në kopshtin e pallatit mbretëror, për mbarë popullin që gjendej në kështjellën e Shushanit, për të vegjël e për të mëdhenj. 6Pëlhura pambuku vjollcë, lidhur me gjalma liri e purpuri, vareshin në shtiza argjendi e shkopinj mermeri, ndërsa ndenjëset e arta e të argjendta ishin vendosur mbi shtrojën prej graniti, mermeri, margaritarësh e gurësh. 7Pija shërbehej në enë ari, të larmishme, dhe verë mbretërore kishte me shumicë, siç i ka hije mbretit. 8Sipas dokeve, për pijen nuk kishte asnjë detyrim, se mbreti i kishte urdhëruar të gjithë përgjegjësit e pallatit të vet të vepronin siç ua kishte ënda. 9Edhe mbretëresha Vashti shtroi një gosti për gratë, në pallatin mbretëror të mbretit Kserks.
10Ditën e shtatë, kur mbreti ishte ngazëlluar me verë, u tha Mehumanit, Biztait, Harbonait, Bigtait, Abagtait, Zetarit e Karkasit, shtatë eunukëve që i shërbenin mbretit Kserks, 11të sillnin para mbretit mbretëreshën Vashti me kurorë mbretërore, për t'i treguar popullit e prijësve bukurinë e saj, se ajo ishte e hijshme për t'u parë. 12Mbretëresha Vashti nuk pranoi të vinte, siç e kishte urdhëruar mbreti me anë të eunukëve. Atëherë mbreti u zemërua fort dhe zjeu nga mëria. 13Pastaj u tha të urtëve, që i njihnin doket, sepse çështjet e mbretit shtroheshin para tërë njohësve të ligjit e të dokeve, 14dhe ata që ai mbante më afër ishin Karshenai, Shetari, Admatai, Tarshishi, Meresi, Marsenai e Memukani, shtatë prijës të Persisë e të Medës, të cilët shiheshin me mbretin e zinin kryet e vendit në mbretëri: 15«Sipas ligjit, si duhet vepruar me mbretëreshën Vashti, pasi ajo nuk e zbatoi urdhrin që i dha mbreti Kserks me anë të eunukëve?». 16Atëherë Memukani tha para mbretit e prijësve: «Mbretëresha Vashti nuk gaboi vetëm kundrejt mbretit, por kundrejt gjithë prijësve e mbarë popujve që gjenden në krahinat e mbretit Kserks, 17sepse të gjitha gratë do ta marrin vesh këtë veprim të mbretëreshës, do t'i përçmojnë burrat e vet e do të thonë: mbreti Kserks urdhëroi të sillnin para tij mbretëreshën Vashti, por ajo nuk erdhi. 18Që nga sot fisniket e Persisë e të Medës, që dëgjuan çfarë bëri mbretëresha, do t'u tregojnë të gjithë prijësve të mbretit e do të ketë shumë përçmim e zemëratë. 19Nëse mbretit i duket e përshtatshme, le të nxjerrë një urdhër mbretëror ai vetë e le të shkruhet ndër ligjet e Persisë e të Medës, që të mbetet i pakthyeshëm, se Vashti nuk do të dalë më para mbretit Kserks, e vendin e saj mbretëror mbreti t'ia japë një tjetër gruaje më të mirë se ajo. 20Kur këtë vendim, që do të nxjerrë mbreti, ta marrë vesh mbarë mbretëria, sado që është e madhe, të gjitha gratë, nga më e rëndësishmja deri te më e parëndësishmja, do t'i nderojnë burrat e vet».
21Kjo gjë i pëlqeu mbretit e prijësve, prandaj mbreti veproi siç i tha Memukani. 22U dërgoi letra të gjitha krahinave të mbretërisë, secilës krahinë sipas shkrimit të vet e secilit popull në gjuhën e vet, me qëllim që secili burrë të sundonte në shtëpinë e vet e të fliste me gjuhën e popullit të vet.
Currently Selected:
Estera (Gr) 1: AL1
Highlight
Share
Copy
Want to have your highlights saved across all your devices? Sign up or sign in
© Shoqëria Biblike Ndërkonfesionale e Shqipërisë 2020
© Interconfessional Bible Society of Albania 2020