Bisekyelo bia Ba-Lewi 8
8
Ebuzelo ea Alona lʼanaʼakande ndʼoeko
1Ko Yawe aotefela la Mose, aokela, 2“Kola Alona ko lʼana bakande bolongo, ko lʼenkoto, ko lʼauta ba loiso, ko la ngombo ea mbeka ndʼewelʼea baoyiʼobe, ko la mpate ife yʼaende, ko lʼeoko ea mampa esamba nyango, 3ko takanya bantʼauma nda wiso wʼilombe ya bito yʼetakano.” 4Ko Mose aokela ngoki Yawe osisakʼende, ko banto boatakana nda wiso wʼilombe ya bito yʼetakano.
5Ko Mose aosangela etakanelo eʼanto, “Line wae joi liki Yawe osisaka wae likelame.” 6Ko Mose aoyela Alona la banaʼakande, ko aolaokya basi. 7Ko aolotsa Alona bonkoto wʼokakya, ko aololemba lʼombembe, ko aololotsa bonkoto wʼotale, ko aoloilela efodo ko aololemba lʼombembe wa efodo bofomama la wanya, ko aololembela efodo lʼoko, 8ko aololotsa ekukelo ea ntolo, ko aolila Ulima la Tumima ndʼetei ea ekukelo ea ntolo. 9Ko aolila likuka ndʼotsaʼokae, ko aolila etanda ea wolo nda likuka liko wiji wa joso, wae eyaleme eʼeoko, elengʼeki Yawe osisaka Mose bosise.
10Nkako Mose aokola bauta ba loiso, ko aoisa tabernacle ko la belemo beuma beki ndʼeko, ko auzaki beko ndʼoeko. 11Ko aosanzela bauta bako nda nkinda besanzela nsambo, ko aoisa nkinda loiso, ko la bijwa biʼeko biuma, ko la okelo lʼemaelo eʼeko, ndʼewela wae aekya belemʼeko ndʼoeko. 12Ko aoluteza bautʼamo ba loiso ndʼotsa wa Alona, ko aoloisa wae oekyʼende boeko. 13Ko Mose aoyela bana ba Alona, ko aolalotsa benkoto bia bekakya, ko aolalemba bembembe, ko aolaafeza bakuka ndʼetsa, elengʼeki Yawe osisaka Mose bosise.
14Nkako aoyela ngombo ea jende ea mbeka ndʼewelʼea boayiʼobe: ko Alona la banʼakande baolafya bakatʼakiyo ndʼotsa wa ngombo ea mbeka ndʼewelʼea baoyiʼobe. 15Ko Mose aomakʼeko, ko aokofa balongo bʼeko, ko aolilʼako ndʼeongo bia nkinda ea mbeka la bosaiʼokande, ko ngoko aofetola nkinda, ko aoluteza balongo baciki ndʼompempe wa ncina ea nkinda, wae abuzʼeko ndʼoeko, ko akeelʼeko eamanelo eʼoseka. 16Ko aokola bauta bauma baki ndʼesofo, ko la jalo loki ndʼaliko ba lofiko, ko la beloko biʼaaji lʼauta baki ndʼeko, ko Mose aotumbʼako nda nkinda ea mbeka. 17Lolo ngombo eko, la ekoto eʼeko, la wunyu wʼeko, ko la nkwa, aotumba la tsa ndʼanza bʼetakanelo, ngoki Yawe osisaka Mose.
18Nkako aoyela mpate ea jende ea mbeka ea ntatumba, ko Alona la banaʼakande baolafyʼakata bakiyo ndʼotsa wa mpate eko. 19Ko Mose aomaki eko, ko aosanzela balongo nda nkinda wiji la wiji. 20Ko aki mpate osesamaka, Mose aotumba botsa la bilama la bauta. 21Ko aki besofo la bekolo osolamaka ndʼasi, Mose aotumba mpate eko euma nda nkinda ea mbeka ngole mbeka ea ntatumba ndʼewelʼea mpimbo eʼolotsi, mbeka elekyama la tsa ele Yawe, ngoki Yawe osisaka Mose bosise.
22Ko aoyela mpate emo ea jende, wete mpate eʼeuzelo ndʼoeko, ko Alona lʼanaʼakande boalafya bakatʼakiyo ndʼotsa wa mpate eko. 23Ko Mose aomakʼeko, ko aokola balongo bamo, ko aolilʼako nda nsonge ea litoi jʼelome jʼAlona, la ndʼosai wʼonene wa likata likae jʼelome, la ndʼosai wʼonene wa likaka likae jʼelome. 24Ko aoyela bana bʼaende ba Alona, ko Mose aolila balongo bamo nda nsonge ya batoi bakiyo bʼelome, la ndʼesai biʼenene biʼakataʼakiyo bʼelome, ko la ndʼesai bekiyo biʼenene bia bakakʼakiyo bʼelome; ko Mose aosanzela balongo wiji la wiji nda nkinda ea mbeka. 25Ko aokola bauta, ko lʼesu ea bauta, ko la bauta bauma baki ndʼesofo, ko la jalo lotongi la lofiko, la beloko biʼaaji bekʼefe lʼauta baki ndʼeko, ko la lokolo jʼelome; 26ko limʼeoko ea mampa esamba nyango eki nda joso ja Yawe, aokola mampʼemoko esambaki nyango, la bongate bomoko bosangana lʼauta, la bongate bomoko wa lejileji, ko aolafyʼako ndʼauta la nda lokolo jʼelome; 27ko aolilʼako bauma ndʼakata ba Alona la ndʼakata ba bana bakande, ko baofukusʼako ngole mbeka ea mpukusa nda joso ja Yawe. 28Nkako Mose aokolʼako lima bakatʼakiyo, ko aotumbʼako bauma nda nkinda ko la mbeka ea ntatumba, wete mbèka eʼebuzelo ndʼoeko, ele la mpimbo eʼolotsi, mbeka elekyama la tsa ele Yawe. 29Ko Mose aokola ntolo, ko aofukusʼeko ngole mbeka ea mpukusa nda joso ja Yawe; eko wae liondo ja Mose ja mpate ea jende eʼeuzelo, ngoki Yawe osisaka Mose bosise.
30Ko Mose aokola bamo bauta ba loiso, ko la balongo bamo baki nda nkinda, ko aosanzelʼako ele Alona la ndʼenkoto bekae, ko aosanzela banaʼakande la benkotoʼekiyo ngoko; elengʼeko aouza Alona ndʼoeko, ko la benkoto bekande, ko la banʼakande lʼenkoto bekiyo.
31Ko Mose aosangela Alona lʼanaʼakande, “Lokatsa nyama nda wiso wa ilombe ya bito yʼetakano, ko lolekʼeko nkʼeko ko la mampa ile ndʼeoko eʼeuzelo, ngokiʼmʼosisakʼosise, nkelaki, Alona la banaʼakande balʼeko ndala. 32Ko nyama iciki, la mampa iciki, lotumbʼiko nda tsa. 33Ko inyo talolake lima wiso wʼilombe ya bito yʼetakano bembile nsambo, elaka nko bembile bekinyo biʼebuzelo ndʼoeko beosila; ele euzelo ekinyo ifomonga bembile nsambo. 34Yawe aosisa bosise wete baoyi bakelame ngoki bako okelamaka mbilʼene, wae eamanyelo ekelame ndʼeloko ekinyo. 35Lifoyala nda wiso wʼilombe ya bito yʼetakano bembile nsambo, mbile lʼotso, wete lofongo bosise wa Yawe, nyango lofowa, elʼemi njosisama bosise ngoko.” 36Alona la bana bakande bakelaki baoyiʼauma baki Yawe osisaka la Mose.
Currently Selected:
Bisekyelo bia Ba-Lewi 8: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
