Bisekyelo bia Ba-Lewi 7
7
Mbeka ndʼewelʼea ekwa ea likambo
1“Ko ene wae esekyelo ea mbeka ndʼewelʼea ekwa ea likambo. Eko ele lʼoeko wa ndekola. 2Baome mbeka ea ekwa ea likambo ndʼitenela iomʼiyo mbeka ea ntatumba, ko basanzela balongo bʼeko wiji la wiji nda nkinda ea mbeka. 3Bauta bʼeko bauma balekyama, wete esu eʼeko eʼauta, lʼauta bakuka besofo, 4beloko biʼaaji bekʼefe lʼauta bale nda beko nda benyi, la jalo lole ndʼaliko ba lofiko, londimolʼende la beloko biʼaaji nsangana. 5Nkanga atumbe belemʼeko nda nkinda, wae mbeka elekyama la tsa ele Yawe; eko ele mbeka ea ekwa ea likambo. 6Wengi jende ole ndʼoloi wa nkanga ambolʼeko ndala: eko eleeme ndʼitenela yʼoeko; eko ele boeko wa ndekola. 7Mbeka ea ekwa ea likambo ele nkʼelengʼele mbeka ndʼewelʼea bobe; mbekʼikʼife ile lʼesekyelo nkʼemoko. Nkanga okelʼetungwelo limʼaoyiʼobe lʼeko, ifoatʼeko wae ale ndala. 8Ko nkanga olekya mbeka ea ntatumba eʼontʼomo, nkangʼeko mongo ifoata ekoto ea mbeka eko ekiʼndʼolekyaka. 9Ko wengi mbeka ea biofo etumbama ndʼetumbelo, ko eko elambema nda pana nkina ekangema ndʼekangelo, eko ele ea nkanga olekyakʼeko. 10Ko wengi mbeka ea biofo, nkina esangana lʼauta nkina efa lʼauta, eyale ea bana bauma ba Alona, baatʼeko isanga.
11“Ko ene ele esekyelo ea mbeka eʼeamanyelo eʼonto ele Yawe. 12Nga alekyʼeko ea losimo jʼoya, alekya la mbeka ea losimo jʼoya mampa isamba nyango isangana lʼauta, ko la bengate besamba nyango beisama lʼauta, ko la bengate bia tosisi bia farine esangana lʼauta, ko bekangeme. 13Kela akokyʼele bengate bene mampʼele la nyango, ko alekya toma tone la mbeka ikae ya eamanyelo la losimo jʼoya. 14Ko alekya bengate, bomoko, bomoko, lima toma tone, wae nganji ea nsasangya ele Yawe, ko eko eyale liondo ja nkanga osanzela balongo ba mbeka ea eamanyelo nda nkinda. 15Ko wunyu wa mbeka yʼeamanyelo nda losimo jʼoya boleame nda mbilʼeki boko olekyamaka; wumbo botacika lake elaka nko nkesa. 16Lolonde nkina mbeka ekande ele eʼelaka ea nsimbi, nkina mbeka ea ndokoza, eko eleame nda mbile elekyʼende mbekʼeko, ko wumbo bociki boleame nda mbile ea lobi. 17Lolo wumbo wa wunyu bociki lima mbeka eko nda mbile eʼisato botumbame la tsa. 18Ko nga wunyu bomo lima mbeka eko eʼeamanyelo boleama nda mbile eʼisato, mbeka eko efaolangema nye, ko Yawe afaambʼeko limʼelʼonto olekyakʼeko, eko eyaleme nga etakusamaka, ko bontʼolʼeko ndala akongotomba bobeʼokande.
19“Ko wunyu bofomwa bolemo wa linyamo botaleamake; boko botumbama la tsa. Nda joi ja nyama ja mbeka eko, wengiʼontʼole feto ambole nyamʼeko ndala: 20lolonde nga bontʼale la linyamo lifotamʼelʼende, ko ala nyama ea mbeka eʼeamanyelo, eyalʼeko ea Yawe, bontʼoko abulame limʼelʼantoʼakae. 21Ko bonto ofomwa bolemo wa linyamo, nkina linyamo jʼonto nkina nyama ea linyamo, nkina linyamo jʼolemo botakusamaka, nkako ala wunyu wa mbeka eʼeamanyelo, eyalʼeko ea Yawe, bontʼoko abulame limʼelʼanto bakande.”
22Ko Yawe aotefela la Mose, aokela, 23“Sangela bana ba Yisalaele. Taloleke bauta nye, lʼauta ba ngombo, la ba mpate la ba nta. 24Bauta ba nyama ewa eko mongo, la bauta ba nyama ekanjolama la nyamʼemo ea wale, lambʼokambe belemʼemo lʼako, lolo taloleke bako nye. 25Bonto nko loswele anyangʼola bauta ba nyama ea mbeka, elekyama la tsa ele Yawe, bontʼoko ifobulama limʼelʼantʼakande. 26Taloleke balongo nko loswele nye; lʼalongo ba tofulu, lʼalongo ba nyama, taloleke ndʼeyalo bekinyo. 27Bonto nko loswele osʼola balongo, bontʼoko abulame limʼelʼantʼakae.”
28Yawe aotefela la Mose, aokela, 29“Sangela bana ba Yisalaele, Bonto olekya mbeka ea eamanyelo ele Yawe, ayele mbeka ekande ele Yawe; lima mbeka ikande yʼeamanyelo, 30ayelʼiko lʼakatʼakae mongo, mbeka ilekyama la tsa ele Yawe, wete: ayele bauta ko la ntolo, kela ntolo efukusame ngole mbeka ea mpukusa nda joso ja Yawe. 31Nkanga atumbe bauta nda nkinda, lolonde Alona la banʼakande bakole ntolo. 32Ko lima mbeka ikinyo yʼeamanyelo, lokaya nkanga lokolo jʼelome ngole mbeka ea nsasangya. 33Bonʼoko owa Alona olekya balongo lʼauta ba mbeka yʼeamanyelo, akole lokolo jʼelome ja mbekʼeko nga liondo likande. 34Elʼemi njokola ntolo ea mpukusa ko la lokolo ja nsasangya limʼele bana ba Yisalaele nda mbeka ikiyo yʼeamanyelo, ko njokaya Alona nkanga ko la banaʼakande ngole bofuto bokiyo limʼele bana ba Yisalaele nda bikeke biuma.
35“Line wete liondo ja Alona la ja banʼakande, lima mbeka ilekyama la tsa ele Yawe, liuzama ndʼoeko elʼiyo nda mbile ekʼiyʼemyamaka wae bakambele Yawe belemo nda mpifo y a nkanga; 36Yawe asisaki wete liondo liko likaemʼelʼiyo la banto ba Yisalaele, o nda mbile ekʼiyʼoisamaka loiso; bone bole bofuto bokiyo seko nda biotswelo bikiyo biuma.” 37Elengʼeko ele esekyelo ea mbeka ea ntatumba, lʼea biofo, lʼea baoyiʼobe, lʼea ekwa ea likambo, lʼea eiselo ndʼoeko, lʼea eamanyelo, 38eki Yawe osisaka Mose nda ngongo ea Sinai, nda mbile ekiʼnd’ osisaka bana ba Yisalaele wete balekya mbeka ikiyo ele Yawe ndʼete keleke ea Sinai.
Currently Selected:
Bisekyelo bia Ba-Lewi 7: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
