Bisekyelo bia Ba-Lewi 9
9
Mbeka ya joso iki Alona la banaʼakande olekyaka
1Nda mbile ea mwambi Mose aoleta Alona lʼanaʼakande bʼaende, ko la bingambi bia Yisalaele, 2ko aokela Alona, “Kola bonʼowa ngombo owa jende wae mbeka ndʼewelʼea baoyiʼobe, ko la mpate ea jende wae mbeka ea ntatumba, ikʼife nyama ifa la bolema, ko lekyʼiko nda joso ja Yawe. 3Ko sangela bana ba Yisalaele, Lokola nta ea jende wae mbeka ndʼewelʼea baoyiʼobe, ko la bonʼowa ngombo la bonʼowa mpate, bakʼafe ba mbula emoko, ko bafa lʼolema, wae mbeka ea ntatumba, 4ko la ngombo ea jende la mpate ea jende ya mbeka yʼeamanyelo, wae lolekyʼiko mbeka nda joso ja Yawe, ko la mbeka ea biofo nsangana lʼauta; ele Yawe ifenya elʼinyo mbilʼene.” 5Ko iyo baoyela belemʼeko beki Mose otomaka nda joso jʼilombe ya bito yʼetakano; ko bantʼauma bʼetakano baotutama ko baolemala nda joso ja Yawe. 6Ko Mose aokela, “Line wae joi liki Yawe osisaka bosise wae lokele, mpanga jilangi ja Yawe jenya elʼinyo.” 7Ko Mose aokela Alona, “Tutamʼele nkinda ea mbeka, ko lekya mbeka eke ndʼewelʼea etungwelo lima baoyiʼobe, ko la mbeka eke ea ntatumba; ko kela etungwelo ea baoyiʼobe bake, ko la baoyiʼobe bʼanto; ko lekya mbeka eʼanto, ko kela etungwelo ea baoyiʼobe bakiyo, ngoki Y awe okosisaka bosise.”
8Ko Alona aotutama la nkinda, ko aooma bonʼowa ngombo ea mbeka ea etungwelo lima baoyiʼobe ndʼeloko ekae mongo. 9Ko bana ba Alona baoyela balongo, ko aotufa bosai bokae ndʼalongo, ko aolilʼako ndʼeongo bia nkinda, ko aoluteza balongo bakociki ndʼase, nda ncina ea nkinda ea mbeka: 10lolo aotumba bauta la beloko biʼaaji la jalo lole ndʼaliko ba lofiko lima mbeka eko ndʼewelʼea baoyiʼobe, nda nkinda ea mbeka ngoki Yawe osisaka Mose bosise. 11Nyama eko la ekoto eʼeko, aotumba la tsa ndʼanza bʼetakanelo eʼanto.
12Limʼako aooma mbeka ea ntatumba; ko bana ba Alona baoloyela balongo, ko aosanzelʼako nda nkinda wiji la wiji.
13Ko baoloyela mbeka ea ntatumba, elama lʼelama ko la botsa; ko aotumba biko nda nkinda. 14Ko aosola besofo lʼekolo, ko aotumbʼeko la mbeka ea ntatumba nda nkinda.
15Ko aolekya mbeka eki banto oyelaka, ko aokola nta ea mbeka ndʼewelʼea baoyiʼobe ndʼeloko eʼanto, ko aoomʼeko, ko aolekyʼeko ndʼetungwelo lima baoyiʼobe, elengʼeki eko eki joso. 16Ko aoyela mbeka ea ntatumba, ko aolekyʼeko mbeka, ngʼelengʼele esekyelo. 17Ko aoyela mbeka ea biofo, ko aosafola liondo limo la likata likande, ko aotumba liko nda nkinda, aokokya liko nda mbeka ea ntatumba eki la nkesa.
18Ko aooma ngombo ea jende la nta ea jende, wae mbeka yʼeamanyelo eʼoseka ndʼelokʼeʼanto. Bana ba Alona baoloyela balongo bʼiko, ko aosanzelʼako nda nkinda euma wiji la wiji. 19Ko baoloyela bauta ba ngombo la mpate, ko la esu eʼauta, la bauta bakuka besofo, ko la beloko biʼaaji, ko la jalo lole ndʼaliko ba lofiko. 20Ko baolafyʼauta nda ntolo, ko aotumba bauta nda nkinda; 21lolo Alona aofukusa ntolo la lokolo jʼelome ngole mbeka ea mpukusa nda joso ja Yawe, ngoki Mose osisaka bosise.
22Nkako Alona aosangya bakatʼakae ele banto, ko aolasakela bokako wa swa. Ko aokitela lima ndalekya ea mbeka ndʼewelʼea baoyiʼobe, la mbeka ea ntatumba, la mbeka eʼeamanyelo ndʼoseka. 23Nkako Mose la Alona baolotswa ndʼilombe ya bito yʼetakano; ko akʼiyʼolaka, baosakelʼanto bokako wa swa, ko jilangi ja Yawe jolenyʼele bantʼauma. 24Ko tsa toiola lima joso ja Yawe, ko totumba mbeka ea ntatumba lʼauta baki nda nkinda: ko aki banto bauma enaka ngoko, baobeleza ko baokwa nda bilongi bikiyo.
Currently Selected:
Bisekyelo bia Ba-Lewi 9: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
