Bisekyelo bia Ba-Lewi 6
6
Bisekyelo bia mbeka ya ntatumba la mbeka ya bilenge bimo
1Ko Yawe aotefela la Mose, aokela, 2“Nga bonto asesenganya bosise wa Yawe, nkina afomba osingitana lʼende ndʼolemo boki bontʼoko oombakʼelʼende liomba, nkina ndʼolemo boki bonto emyaka ndanga, nkina ndʼolemo bokiʼndʼofunzaka lilongo likae, nkina aotuka osingitana lʼende lotuko, 3nkina aotana bolemo bocwei ko aofomba ndʼewelʼea bolemʼoko, ko aosimba nsimbi wae ntatana; nda wengi baoyiʼane bauma bʼobe, nga bonto akela limo ja baoyiʼako, aokelʼobe; 4ekiʼndʼokelaka bobe ngoko, ko aokwa likambo, uteya bolemo bokiʼndʼofunzakʼonto, nkina bolemo bokiʼndʼoataka la lofundo, nkina bolemo boombamakʼelʼende liomba, nkina bolemo bocwei bokiʼndʼotanaka, 5nkina bolemo nko loswele bokiʼndʼosimbaka nsimbi ea ndalimba, ende asombolʼolemʼoko, ko akokya nda nsombo eko liondo limoko jʼaondo batano ba wiko wʼolemʼoko, ko akaya bomongo bolemʼoko nda mbile elekyʼende mbeka ea ekwa ea likambo ndʼewelʼea joi liko jʼobe likiʼndʼokelaka. 6Ende ayele nkanga mbeka ekande ea ekwa ea likambo elekyʼende ele Yawe, wae mpate ea jende efa lʼolema limʼotonga, endikama la we la wiko wa mbeka ea ekwa ea likambo, 7ko nkanga alekyʼeko mbeka ea etungwelo limʼobe nda joso ja Yawe, ko ende atungwa lima joi nko loswele likiʼndʼokelaka lindoatelaki ekwa ea likambo.”
8Ko Yawe aotefela la Mose, aokela, 9“Sisa Alona la banaʼakande, wʼasangele, Esekyelo ea mbeka ea ntatumba ele ngone: mbeka ea ntatumba eyale ndʼiyoto ya nkinda ea mbeka botsʼotso elaka nko nkesa, ko tsa ta nkinda ea mbeka toyofete ndʼeko seko. 10Ko nkanga alote bonkoto bokae wa lin, ko alote caleçon ekande ea lin nda jonge likande, ko imole betoko bia tsa bekʼiyʼotumbaka mbeka ea ntatumba eki nda nkinda, ko ambya beko ntutama la nkinda. 11Nkako alotole benkoto beko, ko alote benkoto benkina, ko atombe betoko beko ndʼanza bʼetakanelo ndʼitenela ya feto. 12Ko tsa tole nda nkinda ea mbeka tokongofetʼeko, totafofake nye. Nkanga onga nkoi njoonga ndʼeko wengi nkesa, atande mbeka ea ntatumba ndʼeko la woso, ko atombe bauta ba mbeka ya eamanyelo nkʼeko. 13Tsa tokongofeta nda nkinda bikeke biuma, toko totafofake nye.
14“Esekyelo ea mbeka ea biofo ele ngone; bana ba Alona balekya eko nda joso ja Yawe, o nda joso ja nkinda. 15Ko nkanga asafole limʼeko farine ekiteyʼende nda likata likae, lʼauta bʼeko ngoko, ko la baimi ba mpimbo bauma bale nda mbeka ea biofo, ko atombe belemʼeko nda nkinda ea mbeka nga jofwa ja mbeka eko, wae mpimbo ea losimo ele Yawe. 16Ko liondo liciki ja mbeka eko, Alona lʼanaʼakande bale ndala: eko eleeme lako nyango ea mampa, ndʼitenela yʼoeka; balʼeko ndʼitenela ya fole yʼetakanelo ea ilombe ya bito yʼetakano. 17Etatumbamake nsangana la nyango ea mampa. Emi njolakaya nga liondo likiyo ja mbeka ikami ilekyama la tsa; eko ele boeko wʼeeko, nkʼelengʼele mbeka ndʼewelʼea baoyiʼobe, la mbeka ndʼewelʼea ekwa ea likambo. 18Wengi jende ja bana ba Alona ambole eko ndala, nkʼelenge esekyamaka seko nda biotswelo bikinyo biuma, wae liondo likinyo; mbeka ilekyamaki ele Yawe la tsa, bontʼofomwʼiko aoekyama boeko.”
19Ko Yawe aotefela la Mose, aokela, 20“Ene wae mbeka ee Alona lʼanaʼakande olekyʼele Yawe nda mbile eʼendʼoisama loiso; ete i emoko ea bitei jom bia efa ea farine eʼolotsi nda mbeka ea biofo, likafo limoko jʼeko la nkesa, ko likafo limo lʼokolo. 21Ekelame nda pana ea ntatumba, nsangana lʼauta; oyelʼeko ko otena mbekʼeko ea biofo o nda bitei, ko olekya biko, mbeka ea mpimbo ea losimo ele Yawe. 22Ko nkanga, bona owa Alona, osonama wae osulunganʼende, alekyʼeko ele Yawe nkʼelenge esekyamaki nda bikeke biuma; eko euma etumbame. 23Wengi mbeka ea biofo ea nkanga etumbame eko euma; eko etaleemake.”
24Ko Yawe aotefela la Mose, aokela, 25“Sangela Alona lʼanaʼakande, Ene wete esekyelo ea mbeka ndʼewelʼea joi jʼobe: mbeka ndʼewelʼea bobe eomame ndʼitenela iomama mbeka ea ntatumba, nkʼeko nda joso ja Yawe; eko ele boeko wa ndekola. 26Nkanga olekya mbekʼeko ndʼewelʼea bobe, alʼeko ndala. Eko eleeme ndʼitenela ya boeko yʼilombe ya bito yʼetakano. 27Bolemo nko loswele bofomwa wunyu wʼeko boekyama boeko; ko nga balongo ba mbekʼeko basanzwa ndʼonkotʼomo, solʼonkotʼoko boki balongo osanzwaka ndʼitenela yʼoeko. 28Ko mpoke eʼiyomba eki eko okatsemaka eolame; lolonde ngʼeko ekatsema ndʼijwa ya kongo, eko ekosame koso, ko esolame lʼasi. 29Wengi jende ndʼoloi wa nkanga ambolʼeko ndala; eko ele boeko wa ndekola. 30Lolo mbeka ndʼewelʼea bobe eki balongo otombamaka ndʼilombe ya bito yʼetakano okela etungwelo ea baoyiʼobe nda ntena eʼoeko, etaleemake nye. Eko etumbame la tsa.
Currently Selected:
Bisekyelo bia Ba-Lewi 6: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
