Bisekyelo bia Ba-Lewi 2
2
Bilenge bia mbeka
1“Alekya bonto mbeka ea biofo ele Yawe, mbeka ekande ifoyala ea farine eʼolotsi, ko utezʼauta ndʼeko, ko ile baimi ba mpimbo eʼolotsi ndʼeko. 2Ko ayele ele bana ba Alona nkanga. Ko ende ifotomba likata eko, asafole farine emo lʼautaʼamo, ko la baimi bauma, ko nkanga atumbʼako nga jofwa nda nkinda ea mbeka, mbeka elekyama nda tsa, mpimbo eʼolotsi ele Yawe. 3Ko liondo liciki ja mbeka eko lifoyala ja Alona lʼanaʼakande; eko ele yomba ileki boeko nda mbeka ilekyama ele Yawe la tsa.
4“Ko alekya we mbeka ea biofo etumbama ndʼetumbelo, eko eyaleme bemputa bia farine esamba nyango nsangana lʼauta, nkina bemputa besamba nyango, beisama lʼauta. 5Ko nga mbeka eke ea biofo ele mbeka etumbama nda pana ea nkakanga eko ifoyala ea farine eʼolotsi esamba nyango nsangana lʼauta. 6Wifotenʼeko nda bitei, ko wuteza bauta ndʼeko; eko ele mbeka ea biofo. 7Nga mbeka eke ea biofo etumbama nda pana, eko ifokelama la farine eʼolotsi nsangana lʼauta. 8Ko wifoyela mbeka eke ekelama la toma tone ele Yawe; ko eko ifokaema ele nkanga, ko ende ifoyelʼeko nda nkinda. 9Ko nkanga ifokola lima mbekʼeko ea biofo liondo ja jofwa, ko atumba liko nda nkinda, wae mbeka elekyama la tsa, ele la mpimbo eʼolotsi ele Yawe. 10Ko liondo liciki ja mbekʼeko ea biofo lifoyalema ja Alona la bana bakande; eko ele yomba ileki boeko nda mbeka ilekyama ele Yawe la tsa.
11“Nko mbeka ea biofo elekyʼinyo ele Yawe ekelama la nyango ea mampa. Talotumbake nyango ea mampa nkina mpako nda mbeka elekyama la tsa ele Yawe seko. 12Lambʼoyelʼiko ele Yawe nganji yʼamuka ba joso, lolo bako batalekyamake nga mpimbo eʼolotsi nda nkinda. 13Ko wilaka bokwa nda mbeka ike ya biofo iuma; tolangake wae bokwa wa bokolo wa Nzakomba eke bosambe nda mbeka eke ea biofo. Lekyaka bokwa la mbeka ike iuma.
14“Nga olekaya mbeka ea biofo ea bamuka ba joso ele Yawe, lekya bako ngole mbeka ea biofo lima bamuka ba benkunju bia bifunza bia blé bitumbama nda tsa, wete bengenge bia bifunza biʼaeyoko. 15Ko uteza bauta ndʼeko, ko ila baimi ba mpimbo ndʼeko; ele wete mbeka ea biofo. 16Ko nkanga atumbe liondo ja jofwa jʼeko, wete liondo ja biofo betumbama la bauta bamo, ko la falankinsensa iuma; eko ele mbeka elekyama la tsa ele Yawe.
Currently Selected:
Bisekyelo bia Ba-Lewi 2: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
