Toango 50
50
Ekundelo ea Yakoba. Batomolo ba Yosefa batataanelʼende
1Ko Yosefa aokwa ndʼelongi ea ise ekae, aolela lilelo, ko aolokaya baiser. 2Ko Yosefa aotoma basali bakae, nkanga yʼete, wae baombe ilaka ya ise ekae lʼete lʼaimi; ko nkanga yʼete baombaki ilaka ya Yisalaele lʼete lʼaimi. 3Bembile ntuku inei beoleka ngoko, ekʼiyʼosalaka bembile ntuku inei ndʼeombelo ea ilaka lʼete lʼaimi. Ko basi Ejipeto baololela bembile ntuku nsambo.
4Aki bembile bia lilelo likae osilaka, Yosefa aotefeela ilongo ya Falo, aolakela, “Ayakʼinyo lonsimʼemi losimo, mbonda wae losangele Falo joi line: 5‘Fafa aombaka joi, ko njosimbelʼende nsimbi; ende aokela, Bala, njotutama lʼiwa. Onkunde ndʼekundelo ekiʼmʼoyacimelaka ndʼese ea Kanana. Ndʼewelʼeko, nkoonda, oncike wae nkende okunda fafa, mpanga njutʼane lenkina.’ ” 6Ko Falo aolamba, “Wambokende, Kunda ise eke nkʼelenge eki we osimbelakʼende nsimbi. 7Ko Yosefa aokenda wae akunde ise ekande. Ko basali bauma ba Falo baokenda lʼende, wete bingambi biʼilombe ikande, ko la bingambi biuma bia ese eʼEjipeto. 8Ko ilongo iuma ya Yosefa, wete batomolo bakae lʼokune, la ba ilombe ya ise ekae; imola nko bana la betonga la nyama ikiyo, baocikʼako ndʼokili wa Ngosena. 9Ko iyʼacwa ki lʼende baokenda nda bitombelo ko la njafema nda mpunda, wete boloi wʼonene wʼanto. 10Akʼiyʼokitaka ndʼenokwelo ea biofo ea Atada, ele wijʼa Yoladane, baolelʼeko lilelo jʼonene mongo la ja lokeseli; Yosefa aolela lilelo ja bembile nsambo ndʼeloko eʼise ekande. 11Aki bamongʼese, basi Kanana, enaka lilelo liko ndʼenokwelo ea biofo ea Atada, iyo baokela, “Lilelo line ja Ba-Ejipeto lile lilelo ja lokeseli mongo na!” Ndʼewelʼeko baotanga itenelʼiko Abele-Mizalaima. Itenelʼiko ile wijʼa Yoladane. 12Elengʼeko bana ba Yakoba baokeelʼende ngokiʼndʼatomaka; 13eki banaʼakande otombakʼende ndʼese ea Kanana, ko baolokunda nda ntoka eki nda lisala ja Makepela nda est ea Mamele, eki Abalayama osombaka eko la lisala limʼele Efulona Bo-Ete, wae aatʼeko ndʼekundelo ea bawei. 14Aki Yosefa osilʼokunda ise ekae, aoluta ndʼEjipeto, wae ende lʼatomolo lʼokune, ko la bantʼauma bacwaki lʼende okunda ise ekae.
15Aki batomolo ba Yosefa enaka wae ise ekiyo aowa, baokela, “Nkina Yosefa ifototona, ko asombole nkele ndʼewelʼea baoyiʼauma bʼobe bakʼisʼokeelakʼende.” 16Ko baotomʼele Yosefa ekima, bakela, “Ise eke, ataf ende owa, aotoka lotomo lone: 17Lokeela Yosefa, ‘Tokoonda, tungola batomolo bake lima baoyiʼobe la bosesengano bokiyo, ekʼiyʼokokeelakʼobe.’ Ko aeyoko iso tokoonda, tungola basali ba Nzakomba ea ise ekawe lima baoyiʼobe bakiyo.” Akʼiyʼotefeelakʼende, Yosefa aolela la mpisali. 18Ko batomolo bakae baoyʼoosama nda joso likae, baokela, “Bala, iso tole basali bake.” 19Lolo Yosefa aolakela, “Taloangake. Kamba emi nde nga Nzakomba nde? 20Nsosolo inyo lolangaki wae lonkeelʼobe, lolo Nzakomba aolanga wango wae bobeʼoko bofaningwa bolotsi, wae lima joi liko bantʼauke baikyame, elenge eikʼiyo mbilʼene. 21Ndʼewelʼeko, taloangake. Emi njifofongʼinyo la bana bakinyo ba tosisi.” Elengʼeko aolacicimyʼete ma, ko aotefela lʼiyo la baoyi ba boya.
22Yosefa aofetsa ndʼEjipeto, ende lʼilongo ya ise ekae. Ko Yosefa aokita mbula bonkama la jom. 23Ko Yosefa aolena bankana ba Efulaima bʼeotswelo eʼisato; ko la bana ba Makila, bona owa Manase, baootswa nda bifelo bia Yosefa. 24Ko Yosefa aokela batomolo lʼokune, “Njotutama lʼiwa. Lolo Nzakomba ifobizʼinyo nsosolo, ko ifimolʼinyo lima bokili bone, ko atombʼinyo ndʼokili bokiʼndʼosimbelaka Abalayama la Yisaka la Yakoba nsimbi,” 25Bana ba Yisalaele baosimbela Yosefa nsimbi. Ende aokela, “Nzakomba ifobizʼinyo nsosolo, ko lifotomba biese bekami limʼendo.” 26Ko Yosefa aowa akiʼndʼokitaka mbula bonkama la jom. Ko baoomba ilaka ikande lʼete lʼaimi, ko baolilʼiko nda sanduku eʼilaka ndʼese eʼEjipeto.
Currently Selected:
Toango 50: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
