Toango 49
49
Yakoba asakela bana bokako. Iwa ya Yakoba ko la ya Yosefa
1Yakoba aoleta banaʼakande, ko aokela, “Lotakana kela nsangelʼinyo baoyi basʼielʼinyo ndʼembile besʼoya.
2Inyo bana bʼaende ba Yisalaele, lotakana ko loka;
Lokoza Yisalaele ise ekinyo.
3Lubena, we ole nsomi ekami,
mpamba ekami, la limuka ja joso
ja nguya ekami,
Owʼekofo ndʼeloloko, ko owʼekofo nda mpamba;
4Oyofukumwa elengʼelʼase, ofaata mpifo ea joso;
Eki wʼetamaka nda ntange ea ise ekawe,
Oekolaki boeko wʼeko, wʼetamaki nda ntange ekami.
5Simona la Lewi bale botomolo lʼokune.
Tofaka tokiyo tʼetumba tole bifeko bia mpafunza.
6O bolimo okami, totswake nda nteke ekiyo ea lokuko!
Botema bokami, toamanake nda wango bokiyo!
Ekʼiyʼoomakʼanto nda nkele ekiyo,
Ko lʼete ma bia kaokao balemezaki
ngombo yʼaende la ntatena ea bekatu.
7Kela nkele ekiyo ambeme la
wambo wa tu, eki eko ongalaka la wale mongo,
Ko la bolemo bokiyo, eki boko osambaka isei.
Njifakafola nda Yakoba, ko
ndafalanganya nda Yisalaele.
8Yuda, batomolo lʼakuneʼake bifokomemya,
Likata like lifafema nda nkingo ya baini bake,
Bana bʼise eke bifokusʼaongo nda joso like.
9Yuda ale bona owa nkosi.
Bona okami, oya lima nyama iki wʼoutaka.
Aokusama, aosuswana wae
afumbwa ngole nkosi,
O ngole nkosi eʼomoto; ondoetoleya na?
10Bonkando wa roi bofaimana limʼele Yuda,
Nkina bonkando wa roi bole ndatsa
bekoloʼekae bofaimolama,
Elaka nko bomongo boko aoya nda Silo.
Ko beoci biʼanto bifofikʼende lifiki.
11Ayotungya bonʼowa mpunda ekae ndʼokoli wa vina,
Wete mpunda ekae eʼonolu ndʼokoli boleki bolotsi;
Ayosole benkoto bekae ndʼasi bʼamuka ba vina,
Ko la bonkotʼokae wʼaliko ndʼalongo bʼamuka ba vina.
12Baiso bakande bangenga lʼasi bʼamuka ba vina,
Ko baino bale fe la baele.
13Zebulona ifofetsa ndʼosela wa lieke jʼokwa,
Ifoyalema esemelo ea basua.
Boleloʼokae wifokita nda Sidona.
14Yisasakala ale mpunda ea mpamba,
Ende etama nda bifongelo bia mpate.
15Enaki wete itenela ya jomo iki bolotsi,
Wae ese eko eosimama losimo;
Ko aosunya lisoko likande wae atombe belito,
Ko aoyalema bokwala otukama lotuko.
16Dana ifotenʼakambo bʼantoʼakande,
Ngole bomo wa beoci bia Yisalaele.
17Dana ifoyalema njwa nda mboka,
ko lonkonga ndʼimbamboka,
Lokotaka bamucu ba mpunda,
Wae bontʼondafemʼa mpunda akwa bakakale.
18O Yawe, ndendeza loiko lokawe!
19Boloi wa bafunzi, bifofunza Ngada,
Lolo ende ifutʼoafunzʼiyo limʼafeka.
20Toma ta ndala ta Asela toleki bolotsi,
Ko toma tosongi la toko ta rois tifoza limʼelʼende.
21Napatali ale mbuli etungwa tungo,
Eotaka bana ba lituka.
22Yosefa ale etafe eʼotamba enyenga lʼamuka,
Wae etafe enyenga lʼamuka, etutsi lʼetoko eʼasi;
Bitafe biʼotambʼoko biokuka lobalaka.
23Iyʼandonyʼende bakula lʼengango
bekiyo bauna lʼende la wale,
Boonyʼende bakula, ko bokimʼende la jino likiyo.
24Lolo bongango bokae boyala la bolo,
Ko mbo ikae yokema la bolo,
Lʼakata ba Owa Mpamba owa Yakoba,
Lʼelengʼeko aoyalema Wesanyi owa
mpate, Ekenje ea Yisalaele.
25La Nzakomba ea ise eke, ende okokambya,
Wete Nzakomba ea mpamba euma,
ende okosakelaka bokako wa swa,
La bekako bia swa lima loola ndʼaliko,
La bekako bia swa bia njindo ile ndʼase,
Le bekako bia swa bia baele la bia likunju.
26Bekako bia swa bia ise eke,
Belekola beko bia baiseʼakami,
Ko bakita nda nsonge ya ngongo ya seko;
Kela bekako beko beuma beyale ndʼotsa wa Yosefa,
Nda ntamba eʼotsa bokande ole roi
nda ntoku ea balongo bakande.
27Benyamina ale lowa ja wale ja mpafunza.
La nkesa afwemela nyama ekiʼndʼoutaka,
Ko lʼokolo akafa belemo bia bofunzo.”
28Bene beuma bele beloi jom lʼefe bia Yisalaele, ko bane bale baoyi baki ise ekiyo atefeelaka akiʼndʼasakelaka bekako, wengi bonto lʼokako bosongi lʼende. 29Nkako aolakaya bosise ngone: “Emi njocwa ele banto bakami. Lonkunde la baise bakami nda ntoka ele nda lisala ja Efulona Bo-Ete, 30wae nda ntoka ele nda lisala ja Makepela, nda est ea Mamele, ndʼese ea Kanana, ntoka eki Abalayama osombaka, lʼeko la lisala, limʼele Efulona, Bo-Ete, wae aatʼeko ngʼekundelo ea bawei. 31Baokunda Abalayama eko, ko la Sala waji okae; baokunda Yisaka eko ko la Lebeka, waji okae; ko emi nkundaki Lea eko. 32Lisala liko, ko la ntoka elʼeko, basombamaki limʼele Ba-Ete.” 33Aki Yakoba osizaka osisa banaʼakande bosise, aoluteya bakaka bakande nda ntange, ko aowa, ko aocwa ele banto bakande.
Currently Selected:
Toango 49: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
