Toango 47
47
Yakoba akitʼele Falo. Yosefa asomba bokili wʼasala ba Ejipeto
1Yosefa aocwʼosangela Falo, “Fafa lʼatomolo lʼokune baoya lima ese ea Kanana la betonga bekiyo bia mpate la ngombo, ko la toma toatʼiyo touma; bale aeyoko ndʼokili wa Ngosena.” 2Ko aokola batomolo bamʼatano, ko aolayelʼele Falo. 3Falo aokela batomolo bakae, “Bosala bokinyo na?” Iyo baolamba Falo, “Basali bake bale baesanyisanyi ba mpate, nkʼelengeʼeki baise bakiso.” 4Ko baokela Falo, “Iso toya wae toyale ndʼese ene lifaya, ele eto ea nzala eokaka ndʼokili wa Kanana, ko isʼasali bake tofoate toma ta mpate ikiso. Ko aeyoko tokoonda, kela basaliʼake bayale ndʼese ea Ngosena.” 5Ko Falo aokela Yosefa, “Ise eke la batomolo bake baoya ele we. 6Ese ea Ejipeto ele nda joso like. Wambokaya ise eke lʼatomolo bake lʼokune bokitase nda wiji boleki bolotsi; kela bafetsa ndʼokili wa Ngosena. Ko nkina wea wae bamo bakiyo bale banto ba nkaso, wʼailʼiyo baesanyi ba nyama ikami.” 7Nkako Yosefa aoyela ise ekande Yakoba, ko aolootsweya ele Falo, ko Yakoba aosakela Falo bokako wa swa. 8Falo aokela Yakoba, “Okita mbula inga?” 9Ko Yakoba aokela Falo, “Mbula yʼekendelo ekami yokita mbula bonkama la ntuku isato. Mbula ya loiko lokami itafokitʼiuke, ko iki bobe, ko ifosongi la mbula ya loiko jʼaise bakami ndʼekendelo ekiyo.” 10Ko Yakoba aosakela Falo bokako wa swa, ko aolola limʼa joso ja Falo. 11Ko Yosefa aokaya ise lʼatomolo lʼokune liondo jʼokili wʼese eʼEjipeto, nda wiji boleki bolotsi, wae ndʼokili wa Lamesese, elengʼeki Falo osisakʼende. 12Ko Yosefa aokaya ise ekae lʼatomolo lʼokune, ko la ilongo iuma yʼise ekae toma ta ndala, nkʼelengʼeki boanji wa bantʼakiyo.
13Ese eumaka nteki la toma ta ndala nye, eki eto ea nzala okakaka, ko bokili wa Ejipeto la wa Kanana bokutswa ndʼewelʼea eto eko ea nzala. 14Ko Yosefa aotakanya bosolo bouma boki ndʼokili wʼEjipeto la wa Kanana ndʼofuto wa blé ekʼiyʼosombaka; ko Yosefa aoyela bosolo boko ndʼilombe ya Falo. 15Aki bosolo osilaka ndʼese eʼEjipeto la ndʼese ea Kanana, Ba-Ejipeto bauma baoyʼele Yosefa, baolokela, “Otokaya toma; towa nda joso jʼaisoʼake lae? Ele bosolo bokiso bosila.” 16Yosefa aolamba, “Nkina bosolo bosila, lonkaya nyama ikinyo, ko njifolokaya toma ta ndala ndʼofuto wa nyama ikinyo.” 17Iyo baoyela betonga bekiyo bia nyama, ko Yosefa aolakaya toma ta ndala ndʼewelʼea chevaux la mpate la ngombo la mpunda ikiyo. Ko aolakaya toma ta ndala mbulʼeko ndʼofuto wa nyama ikiyo iumaka. 18Aki mbulʼeko osile, iyo baoya elʼende nda mbula eʼafeka ko baolokela, “Tofaisʼele nkolo ekiso waebosolo bokiso bosila, ko nyama ikiso iuma yoyalema ya nkolo ekiso; tofociki la yomba nda joso ja nkolo ekiso imola nko baonge bakiso ko la bamoci bakiso kika. 19Towa nda joso like, lʼiso la bekili bekiso lae? Otosombe, lʼiso lʼekili bekiso, la toma ta ndala; ko toyale bakwala ba Falo, iso lʼekili bekiso. Otokaya biofo, wae toike, ko tofowe, ko bokili bofofitana.”
20Yosefa aosombela Falo bekili beuma bia Ejipeto; Ba-Ejipeto bauma baotekya bekili bekiyo ndʼewelʼeki eto ea nzala okakaka elʼiyo. Bamoci bauma baoyala ba Falo. 21Ko aolimolʼanto ndʼasala bakiyo, ko aolaeika ndʼenanga lima ntundo ene eʼEjipeto elaka nko ntundo emo. 22Lolo ende ntasomba bekili bia nkanga, ele nkanga baki la liondo loswele ja toma limʼele Falo, ko iyo baoika lima liondo liki Falo oakaaka; ndʼewelʼeko iyo ntabatekya bekili bekiyo. 23Nkako Yosefa aokelʼanto, “Bala mbilʼene njosombʼinyo la bekili bekinyo ndʼeloko ea Falo; bala biofo bekinyo, lona beko ndʼasala. 24Ko ndʼemukelo lifokaya Falo liondo limoko ja wengi baondo batano, ko baondo banei bifoyala bakinyo mongo, ndʼefosa ea biofo bia njoona ko la toma ta ndala tokinyo la ta tolongo tokinyo la ta bana bakinyo.” 25Ko iyo baokela “Nkolo ekiso, otoikya o mbaikya mongo, ko ngʼolanga we, iso tifoyalema bakwala ba Falo.” 26Yosefa aosekya esekyelo ndʼokili wʼEjipeto, ko eko eciki o la mbilʼene, wete nda wengi baondo batano, Falo aate liondo limoko; imola nko bekili bia nkanga, beko ntabeyalema bia Falo.
27Yisalaele aofetsa ndʼese eʼEjipeto ndʼokili wa Ngosena, ko iyo baataki liaci eko, ko baotaki bana ko baofula o mpafula. 28Yakoba aokitase ndʼEjipeto mbula jom la nsambo. Ngoso bembile beki Yakoba bekiʼndʼoikaka, iki mbula bonkama la ntuku inei la nsambo.
29Aki ekeke ea iwa ya Yisalaele otutamaka, aoleta bona okae Yosefa, ko aolokela, “Ayaka njotana losimo ndʼaiso bake, ila likata like ndʼase ba efelo ekami, ko oncikelʼelaka wae onjeneya liota la joi ja nsosolo; nkoonda, tonkundake ndʼEjipeto. 30Lolonde kela ndetame lʼaise bakami; ontombe limʼEjipeto, ko onkunde ndʼekundelo ekiyo.” Yosefa aolomba, “Njifokela ngoki wʼotefelaka.” 31Aolokela, “Onsimbele nsimbinsimbi.” Ko aolosimbela nsimbi. Nkako Yisalaele aosunama ndʼotsa wa ntange ekande.
Currently Selected:
Toango 47: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
