Toango 46
46
Eyelo eʼilongo ya Yakoba ndʼEjipeto
1Ko Yisalaele aolemala, aocwa lokendo lokae, lʼanto la toma tokae touma. Akiʼndʼokitaka Bela-Seba aolekya mbeka ele Nzakomba ea ise ekae Yisaka. 2Ko Nzakomba aotefela la Yisalaele nda bienelo biʼotso, aokela, “Yakoba, Yakoba!” Ende aolamba, “Emʼone.” 3Aokela, “Emi nde Nzakomba, wete Nzakomba ea ise eke. Toangake lokitela ndʼEjipeto, elʼemi njifokokela we booci wʼonene eko. 4Emi mongo njifokitela la we ndʼEjipeto, ko njifokuteya lenkina, ko likata ja Yosefa lifolifa baiso bakawe.” 5Ko Yakoba aolimana Bela-Seba; ko bana ba Yisalaele baotomba ise ekiyo Yakoba, la banaʼakiyo ba tosisi la baaji bakiyo nda bitombelo biki Falo osokozaka wae botombʼende. 6Ko baotomba betonga bekiyo bia nyama, ko la toma tokʼiyʼoataka ndʼese ea Kanana. Ko baoya ndʼEjipeto, wae Yakoba la banaʼakae bauma. 7Wete bana bakae bʼaende lʼankanʼakande bʼaende, ko lʼanaʼakande bʼamato lʼankanaʼakande bʼamato, nko ilongo ikae iuma, aoyelʼiyo lʼende ndʼEjipeto.
8Baina ba bana ba Yisalaele bayaki ndʼEjipeto bakʼane: Yakoba lʼanaʼakande; Lubena nsomi ea Yakoba. 9Bana bʼaende ba Lubena; Anoka, Palu, Ezelone la Kalumi. 10Bana bʼaende ba Simona; Yemuele, Yamina, Oada, Yakina, Soala, la Saula bona owa Kanana owʼomoto. 11Bana bʼaende ba Lewi; Ngelusona, Koata, la Melali. 12Bana bʼaende ba Yuda; Ele, Onana, Sela, Pelese la Zela; lolonde Ele la Onana bawaki ndʼokili wa Kanana. Ko bana ba Pelese wete Ezelone la Amula. 13Bana bʼaende ba Yisasakala; Tola, Pwa, Yoba la Simelona. 14Bana bʼaende ba Zebulona; Selede, Elone, la Yalele. 15Bantʼako bale bana bʼaende baki Lea ootelaka Yakoba nda Padanalama, ko lʼona okae owʼomoto, wae Dina: bantʼane bauma, lʼana bʼaende la bʼamato, ntuku isato lʼantʼasato. 16Ko bana bʼaende ba Ngada; Sipeyona, Angi, Suni, Esebone, Eli, Aloda la Aleli. 17Bana bʼaende ba Asela; Yimana, Yisewa, Yisewi, Belia, ko la nkana ekiyo Sela: ko la bana bʼaende ba Belia, Ebele la Malekiele. 18Bane wete bana bʼaende ba Zilepa, oki Labana okaaka Lea, bona okande ko ende aotelaki Yakoba bana bako. Iyʼauma banto jom lʼotoa. 19Bana bʼaende ba Laele, waji owa Yakoba; Yosefa la Benyamina. 20Ko Asenata, bona owa Pota-Fela nkanga ea Ono, aotelaki Yosefa ndʼese ea Ejipeto Manase la Efulaima. 21Bana bʼaende ba Benyamina wete Bela, Bekele, Asebele, Ngela, Namana, Eyi, Loso, Mupima, Upima, la Aluda. 22Baso bale bana ba Laele bʼaende baotswʼele Yakoba; iyʼauma banto jom lʼanei. 23Bona owa jende owa Dana wae Usima. 24Bana bʼaende ba Napatali; Yasele, Nguni, Yesele, la Silema. 25Baso wete bana bʼaende ba Bila, oki Labana okaaka Laele bona okae. Ende aotelaki Yakoba bana bako, wete banto nsambo. 26Banto bayaki nda Ejipeto la Yakoba bolongo bakiʼndʼootaka, lolo baaji ba bana bakande bafoandema, baki banto ntukuʼotoa lʼotoa. 27Ko bana baki Yosefa ootaka ndʼEjipeto baki bafe. Ngoso bantʼauma bʼilongo ya Yakoba bayaki ndʼEjipeto baki ntuku nsambo.
28Yakoba aotoma Yuda nda joso ele Yosefa, wae alakʼende mboka ea Ngosena; ko baoya ndʼokili wa Ngosena. 29Ko Yosefa aoleza etombelo ekae, ko aocwa okumana lʼise ekae Yisalaele nda Ngosena. Akiʼnde oenaka, aokwa nda nkingo ekae, ko aolela ndalela elingi fele. 30Ko Yisalaele aokela Yosefa, “Njambʼowe aeyoko, ekiʼmʼenaka elongi eke, ko njea wae oika lʼaeyoko nsosolo.” 31Ko Yosefa aosangela batomolo lʼilongo yʼise ekande, “Njocwʼokitsa Falo nsango, ko njifosangelʼende, ‘Batomolo lʼokune lʼilongo yʼise ekami baki ndʼese ea Kanana baoya elʼemi. 32Ko baende bako bale baesanyi ba mpate, bale bafongi ba betonga bia nyama ya mbongola, ko baoyela mpate ikiyo la betonga bekiyo bia nyama, ko la toma touma toatʼiyo.’ 33Ae Falo oetʼinyo, ko uolʼinyo bosala bokinyo, 34lifokela, ‘Basali bake bale baesanyi ba nyama ya mbongola lima bolenge bokiso o la mbilʼene, iso la baise bakiso.’ La ngoko Falo ifimeza wae lofetsa ndʼokili wa Ngosena, ele baesanyi ba nyama ntabakusamaka la Ba-Ejipeto.”
Currently Selected:
Toango 46: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
