Toango 45
45
Yosefa eta ise ekae wae asekwa ndʼEjipeto
1Koko Yosefa ntakusa jikʼotema nda joso jʼantʼauma bakemi ndengama lʼende; aobeleza, “Loza bantʼauma limʼelʼemi.” Ko baolola, nkʼontʼomo okociki aki Yosefa oyaeanyaka ele batomolo lʼokune. 2Aolela lilelo ja ndolomwa. Ko Ba-Ejipeto baoloka, ko ilongo ya Falo baoloka ngoko. 3Ko Yosefa aokela batomolo bakae, “Emi nde Yosefa. La, fafa ayoike lʼaeyoko nde?” Lolo batomoloʼakae ntaboambeya, ekʼiyʼonyangimwaka ndʼete ma ndʼewelʼekʼiyo nda joso likande.
4Ko Yosefa aokela batomolo, “Lotutamʼelʼemi.” Ko baotutama. Ko aokela, “Emi nde wae Yosefa, bokune okinyo, okʼinyʼotekyaka ndʼEjipeto. 5Ko aeyoko talokeselake, ko talokelakʼinyo mongo nkele ndʼewelʼekʼinyo ontekyaka endoko, eki Nzakomba ontomakʼane nda joso likinyo wae mbikyʼanto. 6Eto ea nzala eomonga mbulʼife ndʼesʼene, lolonde iciki imo mbula itano ifa bamoci ofuswa, ko ifa bamuka omukama. 7Nzakomba antomaki nda joso likinyo ofongelʼinyo ncika eʼanto ndʼokili, ko mbikyʼinyo lʼeikyelo eʼenene. 8Afʼinyo bantomakʼendo, lolo Nzakomba antomaki; ko ende aonjilʼemi ise ele Falo, nkolo eʼilombe ikae iuma, la gouverneur eʼese ea Ejipeto euma. 9Luta nkaola ele fafa, ko losangelʼende, ‘Bona oke Yosefa akela ngone: Nzakomba aonjilʼemi nkolo ea Ejipeto euma. Yakʼelʼemi, tomongake. 10Wifofetsa ndʼokili wa Ngosena, ko wifoyala ntutama lʼemi, wete we lʼanaʼake lʼankanʼake, ko la betonga bia mpate la ngombo, ko la liaci like liuma. 11Ko emi njifokofongʼeko, ele mbula yʼeto ea nzala iciki imo itano; nyango lofelengana we lʼilongo ike, lʼelemo beuma bele la we.’ 12Baiso bakinyo bena, ko baiso bʼokune okami Benyamina bena wae ale nkʼemi otefela lʼinyo. 13Losangela fafa elenge ea jilangi likami liuma ndʼEjipeto, lo lʼaoyi bauma bakʼinyʼenaka. Ko lokaola, loyela fafa endoko.” 14Ko aokwela nkingo ea bokune okae Benyamina ko aolela lilelo; ko Benyamina aolela nda nkingo ekande. 15Ko aosambela batomolo bakae bauma la baisers, ko aolela lʼiyo: ko ndʼafeka batomolo bakae baosoola lʼende.
16Ko lokumo lokumyama ndʼilombe ya Falo wete “Batomolo ba Yosefa baoya.” Ko Falo la basaliʼakae baosalangana bouke. 17Falo aokela Yosefa “Sangela batomolo bake, wakele, Lokela ngone: lokondeza toma nda mpunda ikinyo, ko lokenda ndʼese ea Kanana: 18ko loyela ise ekinyo la tolongo tokinyo endoko elʼemi. Mpanga emi nkayʼinyo toma toleki bolotsi tʼese eʼEjipeto, ko lifola toma toleki bolotsi tʼesʼene. 19Kela bosiseʼone ngoko; lokola bitombelo limʼese eʼEjipeto ndʼewelʼea bana ba tosisi la baaji bakinyo, ko loyelʼise ekinyo ko loyaka. 20Ko talotenyake toma toʼinyʼocika botema, ele toma toleki bolotsi ndʼese euma eʼEjipeto tole tokinyo.”
21Ko bana ba Yisalaele bakelaki elengʼeko. Yosefa aolakaya bitombelo elengʼeki lotomo ja Falo, ko aolakaya toma toʼiyʼola nda mboka. 22Ko aokaya wengiʼonto okiyo bonkoto; lolo aokaya Benyamina sekele ya argent benkamʼesato, ko la belotʼetano biʼenkoto. 23Ko aosokozʼise ekande elengʼene: mpunda yʼaende jom indafema belito bia toma toleki bolotsi tʼEjipeto, ko la mpunda yʼamato jom lʼelito bia blé, mampa la toma ta ndala, ndʼeloko eʼise nda lokendo. 24Nkako aosesana lʼatomolo lʼokune, ko baokenda, aolakela, “Talikyanake bikoli nda mboka.” 25Baolimana limʼEjipeto, ko baokitʼele ise ekiyo ndʼese ea Kanana. 26Ko baolosangela, “Yosefa aika lʼaeyoko, ko ale nkʼende ole gouverneur eʼese eʼEjipeto euma.” Ko botema bokae bokatswa, ekiʼnde ntaimezʼiyo. 27Lolo akʼiyʼosangelaka baoyiʼauma baki Yosefa otefelaka lʼiyo, ko ko akiʼndʼenaka bitombelo biki Yosefa osokozaka lotombʼende, botema wa Yakoba, ise ekiyo, boliywa. 28Ko Yisalaele aokela, “Joi jokoka; Yosefa, bona okami, aika lʼaeyoko nsosolo. Njifokenda, ko njifoena atafʼemʼowa.”
Currently Selected:
Toango 45: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
