Toango 44
44
Yosefa isa ekala ekae ndʼonyuku wa Benyamina
1Koko Yosefa aotoma bofongi owʼilombe ikande lotomo, akela, “Loza benyuku biʼantʼane la toma to, ko ila bosolo wa wengiʼonto ndʼomwa wa bonyukuʼokande. 2Ko ila ekala ekami ea argent ndʼomwa wa bonyuku wa owa bakuka, ko la bosolo wa blé ekande ngoko.” Ko aokela ngoki Yosefa otomaka. 3Ko la nkesa mongo baotoma bantʼane, iyo la mpunda ikiyo. 4Akʼiyʼolaka limʼonanga, ko batafokitʼesi, Yosefa aokela bofongi okae, “Emala, kima bantʼako, ko wenaka olaata, wifakela, ‘Inyo lumanya bobe lʼolotsi la ncina na? Loliya ekala ekami ea argent lae? 5Ene efa ekala emelaka nkolo ekami ko esakyʼende nsamba nde? Joi line likiʼnyʼokelaka lilʼobe mo!’ ”
6Akiʼndʼaataka, aolatefeela nkʼaoyiʼako. 7Ko iyo baolokela, “Nkolo ekiso atefela baoyi bʼelengʼene ncina na? Basali bake bafaokeleya joi jʼelengʼene nye! 8Bala, bosolo bokʼisʼotanaka ndʼemwa biʼenyukuʼekiso, tuteyaki boko ele we limʼese ea Kanana. Iso tiya argent la wolo lima ilombe ya nkolo eke ngamo? 9Ayaka ekalʼeko etaneme lʼosali omo oke, kelʼende awe, ko lʼiso ngoko tifoyalema bakwala ba nkolo ekiso.” 10Ende aokela, “Likambo liyale elenge ete felʼinyo: bonto oʼisʼotana lʼekala ayale bokwala okami, lolo inyo lilimana lima likambo.” 11Baokiteza benyuku bekiyo beuma ndʼamoci nkaola, ko wengiʼonto aolembola bomwa wʼonyuku bokae. 12Ko ende aolengela lima nsomi ko aosukela lʼowʼakuka; ko ekala eotanema ndʼonyuku wa Benyamina. 13Nkako baolata benkoto bekiyo, ko wengiʼonto aolafya bonyuku bokande nda mpunda ekae, ko baolutandʼonanga.
14Aki Yuda lʼatomolo lʼakune okitaka ndʼilombe ya Yosefa, ende aki nkʼeko. Ko baokwa ndʼamoci mbosama nda joso likae. 15Ko Yosefa aolakela, “loi line likiʼnyʼokelaka na? Kambʼinyo lofea wete bonto ngʼemi akuseya lokotola baoyi la nsasakya ea nsamba?” 16Yuda aokela, “Nkolo ekami, tokoutole ngamo? Mpanga totefele ngamo? Toyengolʼiso mongo boyengo elenge eya? Nzakomba aolomola bobe wʼasaliʼake. Bala, tole bakwala bake, iso lʼende oki ekala otanemaka.” 17Ko Yosefa aokela, “O nye! Joi lifaonga wae nkele ngoko! Bonto otanemaki lʼekala, ende kika ifoyala bokwala okami, lolo inyʼamo lambʼokende la kuci elʼise ekinyo.”
18Nkako Yuda aotutamʼelʼende, aokela, “O nkolo ekami, kela bokwala oke atefeele nkolo ekami, ko tokelake bokwala oke nkele ea ndekola; ele we osongi la Falo mongo. 19Nkolo ekami uolaki bakwalaʼake, ‘Lole la ise? nkina la bokune?’ 20Ko iso tokosangelaki we, nkolo ekami, ‘Tole lʼise, aokitʼengambi, ko ale la bona okiʼndʼootaka ndʼengambi ekae. Botomolo owʼona oko aowa, ko limʼana ba nyangʼekande aciki nkʼende, ko ise ekande ookʼende eefe mongo.’ 21Ko otefeelaki basaliʼake, ‘Loyelʼende endo elʼemi, wae ndoene lʼaiso bakami mongo.’ 22Iso toutolaki nkolo ekami, ‘Bona oko ntatocika ise ekande; anyangʼocika ise ekande, ise ifowa.’ 23Ko otosangelakʼiso basaliʼake, ‘Wenaka bokune okinyo afoye lʼinyo lofaenʼelongi ekami nye.’ 24Ko akʼisʼokitaka ele bosali oke, ise ekami, tolosangela baoyi baki nkolo ekami otefelaka. 25Ko ise ekiso atokelaki, ‘Lokenda lenkina, lotosombele isisi ya toma ta ndala.’ 26Iso toloamba, ‘Iso tofokusʼokenda; nga bokune okiso acwa lʼiso, tambokende; lolonde iso tofokuseya jena elongi eʼontʼoko imola nko bokune okiso ale lʼiso.’ 27Ko bosali oke, ise ekiso, aotokela, ‘Inyo lolea wete waji okami ambotelaki bana bafe bʼaende. 28Omo aolimana limʼelʼemi, ko nkanelaki, Nkʼekoji, nyama ea wale eolokanjola, ko limʼako ncifoena nye. 29Nga lotomba bonʼone limʼelʼemi, ko joi jʼobe likwelʼende, lifokiteza babwo bakami ba mbwe nda Seola lʼelo ea lokeseli.’ 30Ko lʼaeyoko, andutʼemi ele bosali oke, wae ise ekami, ko bonolu afeko lʼiso, eambi botemʼokande bamba lʼotema wʼona, 31ende ifowa, andenʼende wae bona afa lʼiso: ngoso iso, bakwalaʼake, tifokiteza mbwe yʼotsa wʼosali oke, ise ekiso, nda Seola lʼelo ea lokeseli. 32Ko emi, bosali oke, nsimbaki nsimbi ele fafa ekami ndʼewelʼea bonolu oko, nkelaki, Ayaka mpouteyʼende ele we, ekwa ea likambo eyalʼelʼemi seko. 33Ndʼewelʼeko, nkoonda, kelʼemi, bosali oke, ncikale ndʼefosa ea bonʼoko ngole bokwala owa nkoloekami, kelʼende ute lʼatomolo bakande. 34Nga bonoju one afa lʼemi, nkuseya juta lenkina ele fafa ngamo? nyango mpena bobe bokwela fafa.”
Currently Selected:
Toango 44: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
