Toango 43
43
Lokendo jʼife ja bana ba Yakoba ndʼEjipeto
1Ko eto ea nzala eokaka ndʼese eko. 2Akʼiyʼosiza lola blé ekʼiyʼoyelaka limʼEjipeto, ise ekiyo aolakela, “Lokenda lenkina, lotosombele isisi ya toma.” 3Lolonde Yuda aolokela, “Bontʼoko aotoaka lʼeakelo mongo: Ngʼokune okinyo owʼakuka afoye, lofaena elongi ekami nye. 4La ngoko, ayaka otomʼokune okiso lʼiso, tifowcwʼokosombela toma; 5lolo nkinʼofotomʼende, iso tofaokitela, ele bontʼoko aotokela, Wenaka bokune okinyo owʼakuka afalʼinyo, lofaenʼelongi ekami nye.” 6Yisalaele aokela, “Lonkeelakʼemi bobeʼone, wete losangelaki bontʼoko wae lole lʼokune omo lae?” 7Iyo baolamba, “Bontʼoko aotuola o nduola mongo ndʼeloko ekiso lʼea tolongo tokiso, aokela, ‘La ise ekinyo alʼeko nde? Lole lʼokune omo nde?’ Iso tolosangela nko baoyi bakiʼndʼotuolaka kika. Kambʼiso tokuseya jea wae ifotokela, Loyela bokune okinyo endo?” 8Ko Yuda aokela Yisalaele, ise ekande, “Onkitsa bonoju wae akende lʼemi, kela temale ko tokende, mpanga toike, ko tofowe, wete iso la we la bana bakiso. 9Njokosimbela nsimbi ndʼeloko ekande; wifasʼende lenkina lima likata likami. Wenaka mpouteyʼende lenkina ele we, ko mpoemyʼende lenkina nda joso like, kela njaleme lʼekwa ea likambo ndʼaiso bake seko. 10Ngʼiso ntatosukamaki lʼemongi, siki aeyoko toluta wuta wʼefe.”
11Ko Yisalaele ise ekiyo aolakela, “E fisʼoate mbokʼemo, lokela elenge ene: lokoma toma tomo toleki bolotsi tʼesʼene ndeʼenyuku bekinyo, ko lotombele bontʼoko toma toko nganji; isisi ya baume, isisi ya mpako, baimi la mula, la nkaasu la amandes. 12Ko lotomba bosolo ndʼakatʼakinyo bokoka lʼefuto befe; ko lotomba lenkina bosola bokʼinyʼotanaka ndʼemwa biʼenyukuʼekinyo, nkina wilamaki la liunga. 13Lotomba bokune okinyo ngoko, ko lemala, lokenda lenkina elʼontʼoko. 14Kela Nzakomba ea mpambʼeuma aatelʼinyo isei nda joso jʼontʼoko, kela uteya Simona, botomolo okinyo, ko la Benyamina. Nkina mbweya bana bakami, mbweya bako.”
15Ko bantʼako boakola nganji iko, ko la bosolo bokoka la befutʼefe bia toma, ndʼakatʼakiyo, ko la Benyamina; ko baolemala, baokitela ndʼEjipeto, ko baolemala nda joso ja Yosefa.
16Aki Yosefa enaka wae Benyamina aoya lʼiyo, aosangela bofongi owʼilombe ikande, “Otsweya bantʼane ndʼilombe, yoome nyama, ko lambʼelambo, ele bantʼane bifola toma lʼemi nda midi.” 17Bontʼoko aokela ngoki Yosefa otomaka, ko aoyela bantʼako ndʼilombe ya Yosefa. 18Ko iyo baolokʼofoju ekʼiyʼotsweyamaka ndʼilombe ya Yosefa, ko baokela, “Aototsweya endo la ncina ea bosolo bokʼiyʼuteyaka ndʼenyukuʼekiso ndʼekekʼeki joso, wae aate esengamelowae atokande, lʼiso la mpunda ikiso, ko toyaleme bakwala bakande.” 19Ko baocwʼele bofongi owʼilombe ya Yosefa, ko baotefela lʼende nda wiso wʼilombe, 20baokela, “O nkolo ekiso! Iso toyaki ekekʼeki joso wae tosombe toma. 21Lolo akʼisʼokitaka ndʼiyeto, tokombolakʼenyuku bekiso, ko bala, bosolo wa wengiʼonto okiso boki ndʼomwa wa bonyuku bokande, wae bosolo bokiso bouma nye. Iso toluteya bosolʼoko aeyoko, 22ko toyela bosolo bonkina wae tosombe toma tomo. Iso tofea bonto ondilaki bosolo bokiso ndʼenyuku bekiso.” 23Ende aokela, “Lokitezʼete ma, taloangake. Nzakomba ekinyo, wae Nzakomba ea ise ekinyo, aolokaya bosolo ndʼenyukuʼekinyo. Bosolo bokinyo bokitʼelʼemi.” Ko aoyela Simona elʼiyo. 24Aki bontʼoko ayelaka ndʼilombe ya Yosefa, aolakaya basi, ko baosolʼakakaʼakiyo; ko aokaya mpunda ikiyo toma ngoko. 25Ko baoleleza Yosefa nganji ikiyo, atafʼendʼoya nda midi, ekiʼyʼokaka wae bifola toma eko.
26Aki Yosefa okitaka ndʼilombe, iyo baolotumya nganji ikʼiyʼoyelaka, ko baoosama elʼende ndʼamoci. 27Ende aolauola nkina bakema, ko aokela, “Ise ekinyo akema nde? wete ende owa mpaka okʼinyʼonsangelaka nsango? Ende aika lʼaeyoko nde?” 28Iyo baokela, “Bosali oke, ise ekiso, akema, aika lʼaeyoko.” Ko baosunyʼetsa, ko baoloosamela. 29Ko aosangyʼaiso, lo aolena bokune okae Benyamina, bonʼowa nyango ekande, ko aokela, “One bokune okinyo owʼakuka, okʼinyʼonsangelaka?” Ko aokela, “Bona okami, Nzakomba akoya boya!” 30Botema wa Yosefa wokaki bokune okae eefe mongo ko aokaola jasʼitenela iʼendʼolela lilelo. Aolotswa lʼikao nda ntena ekande, ko aolelʼeko lilelo. 31Nkako aosolʼelongi, ko aolola. Aolikʼotema, ko aokela, “Lotolekeza toma.” 32Baolekeza Yosefa toma ndʼitenelʼikande, ko la batomolʼakande ndʼitenelʼikiyo, ko la Ba-Ejipeto ndʼitenelʼikiyo mongo; ele Ba-Ejipeto ntabaleka toma la Ba-Ebele, joi liko lile ekila mongo elʼiyo. 33Iyo boakitase nda joso likae; nsomi elengʼeki mpifo ea nsomi, ko owʼakuka elengʼele bolenge okae; ko iyo baolendana la nkakamwa. 34Yosefa aolasokoza baondo lima toma toki nda joso likande, lolonde liondo ja Benyamina jolekola baondo bakiyobelekola betano. Ko baomela ko boasalangana lʼende.
Currently Selected:
Toango 43: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
