Toango 42
42
Batomolo ba Yosefa bayʼosomba toma, ko ende aolaea
1Aki Yakoba eaka wae blé elʼeko ndʼEjipeto, aokela bana bakae bʼaende, “Inyo lolendana lae?” 2Aokela, “Bala, njoloka wae blé elʼeko ndʼEjipeto; lokitelʼeko, lotosombele isisi ya toma, wae iso toike ko tofowe.” 3Ko batomolo ba Yosefa jom baokitela ndʼEjipeto wae basombe blé. 4Lolo Yakoba ntatoma Benyamina bokune owa Yosefa la batomolo bakae, ekiʼnd’ oangaka nyango joi jʼobe lifokelamʼelʼenae. 5Bana ba Yisalaele bayaki osomba blé, iyo lʼantʼamo bolongo, eki eto ea nzala ndʼese ea Kanana.
6Yosefa aki gouverneur ndʼese eko; wae ende otekezaki banto bʼese euma toma. Ko batomolo ba Yosefa baoyʼokusamelʼende la bilongi ndʼamoci. 7Yosefa aolena batomoloʼakae, ko aolaea, lolo aolakela nga bale bafaya, ko aotefela lʼiyo la baoyi ba bolo, aolakela, “Inyo loya lima nko?” Iyo baokela, “Lima bokili wa Kanana wae tosombe toma ta ndala.” 8Yosefa aolea batomolo, lolo iyo ntabolongozʼende. 9Yosefa aolofwa baloto bakiʼndʼolotaka ndʼeloko ekiyo, ko aolakela, “Inyo lole nongi; loya ewela wae losisimya tongoi tʼese ene.” 10Iyo baolamba, “O nye nkolo, lolo basali bake baoya osomba toma ta ndala. 11Iso bauma tole bana bʼontʼomoko, tolʼanto ba ci, basaliʼake bafanongi nye.” 12Ende aolakela, “O nye, lolo loya wae lene boola wʼese ene.” 13Lolo iyo baokela, “Iso basaliʼake, tole batomolo lʼakune jom lʼafe, bana bʼontʼomoko ndʼese ea Kanana. Owʼakuka alʼeko mbilʼene lʼise ekiso, ko omo afenya.” 14Lolo Yosefa aolakela, “Lolondʼinyo lole nko nongi, ngokiʼmʼosangelakʼinyo. 15Tifomekʼinyo ngone: la loiko ja Falo! lofaimana lima itenela ine elaka nko bokune okinyo owʼakuka aoya endo. 16Lotomʼomoko okinyo okola bokune okinyo, ko inyʼamo locikala ndʼoloko, kela baoyiʼakinyo bamekame, nkina nsosolo elʼelʼinyo, ko nga lofa banto ba ci, o la loiko ja Falo, lole nko nongi.” 17Ko aolailʼiyʼauma ndʼonyolo bembilʼesato.
18Nda mbile eʼisato Yosefa aolakela, “Lokela ngone, ko lifoika, elʼemi mbanga Nzakomba. 19Nkina lole banto ba ci, kela omo okinyo acikale ndʼilombe yʼonyolo, ko inyʼamo lokenda, lotombela tolongo tokinyo toyowe la nzala, blé ea ndala. 20Ko lonjelʼendo bokune okinyo owʼakuka; elengʼeko baoyi batefelʼinyo beane wae bale nsosolo, ko inyo lofaowa.” Ko baokelʼelengʼeko. 21Iyo baotefelana, bakela, “O nsosolo iso tokwa nda likambo liki bokune okiso, ekʼisʼenaka elo ekande, akiʼndʼototataanelaka; lolonde iso ntatokozakʼende nye; ndʼewelʼeko elo ene eotokwela.” 22Koko Lubena aolakela, “Emi ncikelʼinyo nde, Talokeelake bonoju oko bobe? Lolo inyo ntalondokoza. Ndʼewelʼeko balongoʼakae batitʼiso witako.” 23Iyo ntabea wae Yosefa aoloka baoyi batefelʼiyo, ekiʼndʼotefelaka lʼiyo la bosomboli owʼaoyi. 24Ko aotangwa limʼelʼiyo, ko aolela la mpisali; nkako aolutʼelʼiyo ko utʼotefela lʼiyo. Ko aokola Simona limʼelʼiyo, ko aolotungya nda joso likiyo. 25Limʼako Yosefa aotoma wae bayoza benyuku bekiyo la blé, ko buteya bosolo wa wengiʼonto ndʼonyukuʼokande, ko bakayʼiyo toma ta ndala ta mboka. Baolakeela elengʼeko.
26Iyo baolafya blé nda mpunda ikiyo, ko baokenda. 27Aki omʼokiyo olembola bonyukuʼokae wae akaya mpunda ekae toma ndʼetamelo ekiyo, aolena bosolo bokae nkʼeko ndʼomwa wa bonyuku. 28Ko aokela batomolo lʼakune, “Bosolo bokami boluta mo! Bala, bokʼone ndʼomwa wa bonyukuʼokami!” Ko bete mʼekiyo beocwa ndʼaliko, ko baotefelana la ndalenga, “Joi line liki Nzakomba otokeelaka lile na?” 29Akʼiyʼokitaka ele ise ekiyo ndʼese ea Kanana, baolosangela baoyiʼauma bakelamaki elʼiyo, baokela, 30“Bontʼoko ole nkolo eʼese eko atefelaki lʼiso la bolo, ko aototanga nongi yʼese eko. 31Lolo iso tolokela, ‘Iso tole banto ba ci, tofa nongi nye. 32Tole batomolo lʼakune jom lʼafe, bana bʼise emoko. Omo afenya, ko owʼakuka ale lʼise ekiso ndʼese ea Kanana mbilʼene.’ 33Ko bontʼoko, endʼole nkolo eʼesʼeko aotokela, ‘Njifea wae lole banto ba ci ngone: locikʼomʼokinyo ane lʼemi, lokola toma ta ndala ta tolongo tokinyo, ko lokenda. 34Ko loyelʼokune okinyo elʼemi, wae endʼowʼakuka, ko mpanga njea wete lole banto ba nsosolo, ko lofa nongi. Ko njifotungwelʼinyo botomolʼokinyo, ko inyo losomba toma ndʼesʼene.’ ”
35Akʼiyʼimolaka blé ndʼenyukuʼekiyo, bala bosolo wa wengiʼonto boki ndʼonyukuʼokande. Ko akʼiyo iʼise ekiyo enaka bosolo boko bokiyo, baolokʼofoju mongo. 36Yakoba ise ekiyo aolakela, “Inyo lonjimoza banʼakami; Yosefa afʼeko, ko Simona afʼeko, ko lenkina lolanga lotomba Benyamina; baoyiʼane baonkwelʼemi oyei!” 37Lubena aokela ise ekae, “Nga mputeya Benyamina ele we kelʼoome banʼakami bʼaende bakʼafe. Onkitsʼende nda bakata bakami, ko njifoyela lenkina ele we.” 38Lolo ende aokela, “Bona okami afaokitela eko lʼinyo ele botomolo okae aowa, ko ociki nkʼende kika. Nga joi jʼobe likelamʼelʼende nda lokendo lokendʼinyo, ngoko lieza mbwe ikami yʼotsa nda Seola la lokeseli.”
Currently Selected:
Toango 42: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
