Toango 41
41
Yosefa aeingola baloto ba Falo, ko Falo ilʼende nda mpifo ea ka
1Aki mbula imo ife olekaka, Falo aolota liloto line: Akemi ndʼoselo wa ntando. 2Ko bala, ngombo nsambo yosafwa lima ntando, iki nkʼolotsi ko itamaki lʼauta, ko iyole beyau bia bisobe.
3Ko bala, ngombo imo nsambo isafwaki lima ntando ndʼafeka bakiyo, iki bobe ndʼaiso, ko boonju mongo, ko yolemala la ngombo iki joso ndʼoselo wa ntando. 4Ko ngombo iko nsambo iki bobe ndʼaiso ko beonju, yomela ngombo yʼolotsi itamaki lʼauta kio. Nkako Falo aoetswa.
5Ko ende etamaki, ko aolota liloto limo jʼafe. Bala, bifunza nsambo bia blé bia to-to lʼolotsi bimelaki ndʼotembe bomoko. 6Ko bala, ndʼafeka ba biko, bifunza bimo nsambo biomela, binyitana ko binyeela la bompompo wa est. 7Ko bifunza binyitana bimelaki bifunza bia to-to lʼolotsi kio. Ko Falo aoetswa, ko bala, aki nko liloto. 8La nkesa bolimo bokande bokakaana. Ko aoleta nkanga iuma ya Ejipeto, ko la ba wanya bauma. Falo aolasangela liloto likae, lolo nkʼonto okiyo okuseya osangela Falo neingo ea liko.
9Nkako bosali owa joso owa mesa aokela Falo, “Njofwa mbilʼene bobeʼokami bokiʼmʼokelaka. 10Falo aolokela basaliʼakande nkele, ko anjilakʼemi la bolambi owa joso ndʼonyolo ndʼilombe ya capitaine ea baesanyi ba njanga. 11Ko emi lʼende tolotaki liloto nda botso bomoko, wengi liloto la ncina loswele. 12Ko bosekota omo aki eko lʼiso, Bo-Ebele, bosali owa capitaine ea baesanyi; ko tolosangela baloto bakiso, ko ende aotocingoza bako, aokaya wengiʼonto okiso neingo ea liloto likae. 13Ko baoyi baoliela nkʼelenge eki neingo ikae; emi njoluteyama ndʼolemo bokami, ko bontʼoko aokomama.”
14Nkako Falo aotomʼekima wae ete Yosefa. Baolooza lima ilombe ya njanga la lomo-lomo. Akiʼndʼokoolaka loole, ko aosoanya benkoto, aolotswa nda joso ja Falo. 15Ko Falo aokela Yosefa, “Njolota liloto, ko nkʼonto onsangeleya neingo ea liko. Lolo baonsangela wae nga wʼoka liloto, okuseya locingola ncina ea liko.” 16Yosefa aolamba Falo, “Afa limʼelʼemi, lolo Nzakomba ifokaya Falo mbuto eʼolotsi.” 17Nkako Falo aokela Yosefa, “Bala, njenaki ngone nda liloto likami; nkemi ndʼoselo wa ntando. 18Ko bala, ngombo nsambo yosafwa lima ntando, iki yʼolotsi ko itamaki lʼauta, ko ileki beyau biʼesobe ndala. 19Ko ngombo imo nsambo yosafwa ndʼafeka bʼiko, iki bobe mongo la beonju mongo, kilo njene ngombo yʼobe ngʼiko ndʼesʼeuma eʼEjipeto! 20Ko ngombo ya beonju imelaki ngombo nsambo iki joso itamaki lʼauta kio. 21Ko mpeka la imelaki iko kio, bontʼafokusʼokanela wae ileki iko, la ncina wae iki beonju ngoki joso. Ko njoetswa. 22Ko njenaki nda liloto limo wae bifunza bia blé nsambo bia to-to lʼolotsi bimelaki ndʼotembe bomoko. 23Ko bifunza bimo nsambo biolola ndʼafeka ba biko, bionyitana ko bionyeela lʼompompo wa est. 24Ko bifunza binyitana biomela bifunza biʼolotsi kio. Ko nsangelaki nkanga joi line liuma, lolo nkʼonto okuseyʼonsangela ncina ea baloto.”
25Yosefa aokela Falo, “Baloto bakʼafe bale la ncina emoko. Nzakomba alanga jeneya Falo joi liʼendʼokela. 26Ngombo nsambo yʼolotsi ile mbula nsambo. Ko bifunza nsambo yʼolotsi bile mbula nsambo. Baloto bakʼafe bale la ncina emoko. 27Ko ngombo ya boonju la yʼobe isafwaki ndʼafeka ile mbula nsambo, ko bifunza biʼobe nsambo binyeela lʼompompo wa est bile mbula nsambo ya eto ea nzala. 28Joi lile ngokiʼmʼosangelaka Falo, wete Nzakomba aoleneya Falo joi liʼendʼokela. 29Mbula nsambo ya linyenga ja toma ifiela ndʼese eʼEjipeto euma. 30Lolo ndʼafeka ba mbula iko, mbula nsambo yʼeto ea nzala ifiela, ko linyenga liko liki eko lifofelama ndʼese eʼEjipeto; eto ea nzala ifosiza ese nye. 31Ko linyenga ja toma liki ndʼese lifaeana lenkina ndʼewela ea eto eko ea nzala endiela, ele eto eko ifokaka lʼobe mongo. 32Enyelo ea liloto ele Falo bienya befe ele ndʼewela eki Nzakomba okemyaka joi liko, wete ifieza liko nkaola. 33Ndʼewelʼeko, kela Falo asone bonto owa losifya la wanya, ko oilʼende nda mpifo ndʼEjipeto eumaka. 34Ko kela Falo ile bakapita ndʼese, ko akafʼese nda provinces itano, ko nda mbula ya linyenga, bakole liondo limoko ja wengi baondo batano ba toma wae bafonge liko. 35Ko bakapita batakanya toma ta mbula iko ya linyenga liyoya, ko baombe toma toko nda lotomo ja Falo, tokoko toyaleme ndʼeloko ea benanga, ko bafonge toko. 36Ko toma toko tifoombama ndʼeloko ea mbula nsambo yʼeto ea nzala isʼiela ndʼese eʼEjipeto, nyango ese efofitana lʼeto ea nzala.”
Yosefa ilama nda mpifo eʼese ea Ejipeto
37Ko Falo lʼasaliʼakande basimaki baoyi bakiʼndʼotefelaka. 38Ko Falo aokela basaliʼakande, “Toatʼolo bontʼomo ngolʼone, ole la bolimo wa Nzakomba?” 39Ko Falo aokela Yosefa, “Nkʼontʼomo ole la losifya la wanya ngole we, eki Nzakomba okeneyaka baoyiʼane bauma. 40Wifoyala nda mpifo ndʼilombe ikami, ko bantʼakami bauma bifokela besise bekawe: emi nkolekola la mpifo o nda ngwende ea roi kika.” 41Ko Falo aokela Yosefa, “Bala, njokila we nda mpifo eʼese ea Ejipeto euma.” 42Ko Falo aolosola lofete lima likata likae, ko aolila loko nda likata ja Yosefa, ko aololotsa bito bia lin ea wiko mongo, ko aolila bonyolo wa wolo nda nkingo ekae. 43Ko aolokondeza ndʼetombelo eamana lʼetombelo ekae mongo, ko banto baocwa nda joso likae, bayobeleza, “Lokusʼaongo!” Nkʼelengʼeko aoloila nda mpifo eʼese ea Ejipeto euma. 44Ko lenkina aokela Yosefa, “Emi nde Falo! Ko lako we, bonto afaosangya likata likae nkina likaka likae ndʼese eʼEjipeto euma.” 45Ko Falo aolila Yosefa lina Sapenata-Panea, ko aolokaya Asenata, bonʼowa Poti-Fela nkanga ea Ono wae ayaleme waji okae. Ko Yosefa aotuwana ese eʼEjipeto euma.
46Yosefa aokita mbula ntukʼisato akiʼndʼemalaka nda joso ja Falo, roi eʼEjipeto. Ko Yosefa aolola lima joso ja Falo, ko aotuwana ese eʼEjipeto euma. 47Nda mbula nsambo ya linyenga ja toma, bokili bomelaki toma la mpafula mongo, 48ko Yosefa atakanyaki toma touma ta mbula nsambo ya linyenga ndʼese eʼEjipeto, ko aofonga toko ndʼenanga, wae aofonga toma tʼasala tondengama wengi bonanga o ndʼonangʼoko. 49Yosefa aofonga biofo o ngʼekongo bia lieke, ko aolambya oandola boanji wʼeko, eki biofo beko ntabeandemeya lʼouke. 50Atafa mbula yʼeto ea nzala iela, Asenata, bona owa Poti-Fela, nkanga ea Ono, aotelaki Yosefa bana bʼaende bafe. 51Yosefa aolila nsomi lina Manase, ekiʼndʼokelaka, “Nzakomba aondofeza bielo bikami biuma jofa, ko la ilongo ya ise ekami iuma.” 52Ko aolilʼonʼowʼafe lina Efulaima, aokela, “Eki Nzakomba ompulezaka bana ndʼese ea elo ekami.”
53Mbula nsambo ya linyenga ja toma iki ndʼese eʼEjipeto yosila. 54Ko mbula nsambo yʼeto ea nzala iangaki jiela, nkʼelenge eki Yosefa otefelaka. Eto ea nzala eki nda bise biuma, lolo toma toki eko ndʼese eʼEjipeto. 55Aki ese eʼEjipeto euma okakaka lʼeto ea nzala ngoko, banto baoonda Falo wae akaya toma. Falo aosangela Ba-Ejipeto bauma, “Lokendʼele Yosefa; lokela baoyi baʼendʼosangelʼinyo.” 56Eto ea nzala aokwelʼese euma. Ko Yosefa aokombola bifongelo biuma bikiʼndʼofongaka toma, ko aotekeza Ba-Ejipeto toma. Eto ea nzala eokaka ndʼese eʼEjipeto o nkakaka mongo. 57Ko banto ba bokili bouma baoya ndʼEjipeto osomba toma, eki eto ea nzala okakaka ndʼokili bouma.
Currently Selected:
Toango 41: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
