Toango 40
40
Yosefa aeingola baloto ba bosali owa mesa la bolambi
1Ndʼafeka ba baoyiʼane basali ba roi eʼEjipeto, wae bosali owa mesa la bolambi owa toma, baolokya nkolo ekiyo, roi eʼEjipeto, nkele. 2Falo aolemwa basali bakʼafe; wae bosali owa joso owa mesa, la bolambi owa joso owa toma. 3Ko aolaila ndʼoloko ndʼilombe ya capitaine ea baesanyi, ndʼilombe ya njanga, wiji boki Yosefa otungamaka. 4Capitaine ea baesanyi aolalekya ndʼakata ba Yosefa, ko ende aolaesanya. Ko baki ndʼilombe ya njanga elingi fele. 5Ko botsʼomoko iyʼakʼafe balotaki liloto, wete bosali owa mesa, la bolambi owa toma ta roi eʼEjipeto, bakotungi ndʼoloko, wengiʼonto liloto likae loswele, ko wengi liloto la ncina loswele. 6Aki Yosefa otswaka elʼiyo la nkesa, aolena wae bakakaana. 7Ko uolaki basali ba Falo baki njanga lʼende ndʼilombe ya nkolo ekande, “Lominya bifongi mbilʼene ia ncina na?” 8Baolokela, “Iso tolota liloto, ko tofa lʼonto okusʼotoeingoza liko.” Yosefa aolakela, “Neingo efa limʼele Nzakomba nde? Lonsangele liloto liko fikinyo.”
9Bosali owa joso owa mesa aosangela Yosefa likoto likae, akela, “Nda liloto likami, bokoli wa vina boki eko nda joso likami, 10ko bitafe bisato biki ndʼokoliʼoko; aki boko omelaka ntongi, ndobya yolola, ko bokoli bocwʼamuka bandela. 11Ekala ea Falo eki nda likata likami; ko mmukaki bamukʼako, njamaki basi bʼako ndʼekala ea Falo, ko ndilaki ekala nda likata ja Falo.” 12Yosefa aolokela, “Neingo ea liloto ele ngone: bitafe biko bisato bile bembile besato. 13Bembile beciki nko besato, ko Falo ifosangola botsaʼoke, ko akuteya ndʼolemo boke; ko wifila ekala nda likata ja Falo ngoki wʼokelaka nda joso, aki we bosali okae owa mesa. 14Lolo ekeke eonga baoyi bake mbaonga, nkoonda, ondofwʼemi, onjeneya isei, wae osangele Falo ndʼeloko ekami, ko ondoza limʼilombe ine. 15Nsosolo banjongolaki njongola limʼese ea Ba-Ebele, ko neikelʼendoko joi lindeji wae ndilame ndʼilombe ya njanga.”
16Aki bolambi owa joso enaka wete neingo ea liloto liko eki bolotsi, aokela Yosefa, “Emi ngoko, ndotaki liloto. Bioko bisato bia mampa ea fe biki ndʼotsaʼokami. 17Bengate betumbama bia bilenge la bilenge ndʼeloko ea Falo, beki ndʼeoko eki ndʼaliko mongo; lolo tofulu toleki bengate lima eoko eki ndʼotsa bokami.” 18Yosefa aolamba, “Neingo ele ngone: bioko bisato bile wete bembile besato. 19Bembile beciki nkʼesato, ko Falo ifotena botsaʼoke; ko ifokofanya ndʼotamba, ko tofulu tifola wunyu boke.”
20Ko nda mbile eʼisato, eki mbile ea jofwa jʼeotswelo ea Falo, Falo aolambela basali bakae elambo. Ko aosambʼakambo ba bosali owa joso owa mesa, ko la bolambi owa joso owa toma nda joso ja basaliʼakae. 21Aoluteya bosali owa joso owa mesa ndʼolemo bokae, wae alekya ekala nda likata ja Falo; 22lolo aokoma bolambi owa joso owa toma, nkʼelenge eki neingo iki Yosefa ocingolaka. 23Lolo bosali owa joso owa mesa ntofwa Yosefa, aoloofela nye.
Currently Selected:
Toango 40: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
