Toango 39
39
Yosefa nda Ejipeto
1Yosefa aotombama ndʼEjipeto, ko Potifala, bosi Ejipeto, bontʼowa mpifo eka Falo, ko capitaine ea baesanyi, aolosomba limʼele Ba-Yisamaele bandoyelaki. 2Ko Yawe aki la Yosefa, ko ende aongaki ndʼelemo bekande. Ko aokitase ndʼilombe ya nkolo ekande, bosi Ejipeto. 3Ko nkolo ekae aolena wae Yawe aki lʼende, wete Yawe aoloongeza belemo beuma bekiʼndʼokambaka. 4Yosefa aotana losimo ele nkolo ekande okiʼndʼosaelaka, ko aoloila kapita eʼilombe ikae, ko aolokitsʼende liaci likae liuma wae esanya liko. 5Limʼakiʼndʼilaka Yosefa kapita eʼilombe ikae, lʼea liaci likae liuma, Yawe aosakela ilombe ya bosi Ejipeto bokako wa swa ndʼeloko ea Yosefa; wae bokako wa swa wa Yawe boyala nda toma tokae touma, la toki ndʼilombe, la toki nda lisala. 6Aocika liaci likae liuma ndʼakata ba Yosefa, ko limʼakiʼndʼoatakʼende ntutʼokanela belemo bekae imola nko toma ta ndala kika.
Yosefa aki bontʼowa bokolongo, lʼowa lituka. 7Ndʼafeka ba baoyiʼane, waji owa nkolo ekande aotombʼaiso ele Yosefa, ko aolokela, “Yaka, yetame lʼemi.” 8Lolo aolofeza, ko aokela waji owa nkolo ekae, “Bala, limʼekiʼndʼombataka, nkolo ekami afotombe lokai ndʼelemo bele ndʼilombe, ko aolila belemo beuma ndʼakata bakami. 9Ende mongo afondekola ndʼilombe ine, ko atafompekeza la yombʼimoko ndʼilombe ine imola nko we kika, ele we waji okae. Na, nkeleya joi line lileki bobe ngamo, ko nkeele Nzakomba bobe ngoko?” 10Mpeka la aotefeela Yosefa bembile lʼembile, ende ntalanga jokozʼende wae etame lʼende, ko ayale lʼende. 11Mbilʼemo Yosefa aolotswa ndʼilombe wae akambe bolemoʼokae, ko nko baende bamo ndʼilombe nye. 12Waji owa Potifala aolokanda ndʼonkoto bokae, aokela, “Etama lʼemi.” Lolo aocika bonkotoʼokande nda likata likae, aolota, ko aolola limʼilombe. 13Akiʼndʼenaka wae aocikʼonkoto bokae nda likata likande, ko aolota limʼilombe, 14aoleta basali bʼilombe ikande, ko aolakela, “Lolena wae bome okami aoyela Bo-Ebele one elʼiso wae atokya nsoi; ende aolotswa elʼemi wae etame lʼemi, lolo njolula nkimo, 15ko akiʼndʼokaka nkimo ekami, aocika bonkotoʼokae lʼemi, ko aolota limʼilombe.” 16Ko aofonga bonkotoʼokae ekaʼnde mongo elaka nko nkolo ekande aoluta ndʼola. 17Nkako aolosangela joi line, “Bokwala owa Bo-Ebele oki wʼoyelaka elʼiso, otswaki wae anjokya nsoi. 18Lolo akiʼmʼulaka nkimo, aocikʼonkoto bokae lʼemi ko aolota limʼilombe.”
19Aki nkolo ea Yosefa okaka baoyi baki waji okae osangelaka, wae “Bokwala okawe ankeelakʼemi nkʼelengʼene,” aoloka nkele ea ngangala. 20Aokanda Yosefa, ko aoloila ndʼilombe ya njanga, ndʼitenela iki njanga ya roi otungamaka; ko aki nkʼeko ndʼonyolo. 21Lolonde Yawe aki la Yosefa, ko aolookʼisei, ko aoloatela boya limʼele wesanyi owʼilombe ya njanga. 22Ko bofongi owʼilombe ya njanga aolila Yosefa kapita ea njanga iuma iki ndʼilombe ya njanga, ko ende aolesanya belemo beuma bekambemakʼeko. 23Bofongi owʼilombe ya njanga ntengela belemo beki Yosefa okambaka, eki Yawe lʼende, ko bolemo nko loswele bokiʼndʼokambaka, Yawe aongyaki bolemʼoko.
Currently Selected:
Toango 39: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
