Toango 38
38
Yuda la Tamala
1Ndʼekekʼeko Yuda aokafwana lʼatomolo lʼakuneʼakae, ko aocwʼele bosi Adulama omo, lina likae Ila. 2Ko Yuda aolenʼeko bonʼowʼomoto owa Bo-Kanana omo, lina likae Sua, aolokola waji, ko aolotswʼelʼende. 3Ende aofoswa jemi, ko aoota bona owa jende, ko aoloila lina Ele. 4Ko aofoswa lenkina jemi, ko aoota bona owa jende, ko aoloila lina Onana. 5Ko aoota lenkina bona owa jende, ko aoloila lina Sela. Ende aki nda Keziba akiʼndʼootaka bonʼoko. 6Ko Yuda aolengela nsomi ekande Ele waji, lina likande Tamala. 7Lolo Ele, nsomi ea Yuda, aki bontʼowa bobe ndʼaiso ba Yawe, ko Yawe aolooma. 8Ko Yuda aokela Onana, “Kenda ele waji oki botomolo oke, yokole, ayale waji oke, ko botele botomolo oke bana.” 9Onana aolea wae banʼako bafaoyalema bakae mongo, ko akiʼndʼotswaka ele waji oki botomoloʼokae, aoluteza balomi ndʼamoci, nyango afootela botomolo okae bana. 10Joi liko likiʼndʼokelaka liki bobe ndʼaiso ba Yawe, ko aoloomʼende ngoko. 11Nkako Yuda aokeela Tamala, bokilo okae, “Yala nkʼetuka ndʼilombe yʼise eke elaka nko Sela aocwʼonto.” Akelaki ngoko ekiʼndʼoangaka nyango Sela afowa ngoki batomolo bakae. Ko Tamala aocwʼokitase ndʼilombe yʼise ekande.
12Aki bembile ofulaka fele, bona owʼomoto Owa Sua, waji owa Yuda aowa. Aki Yuda osizaka balelo, aocwʼele basaki ba nkunza ya mpate ikae nda Timena, ende la lilongo likae Ila, bosi Adulama. 13Ko baosangela Tamala, wae, “Bala, bokilo oke aocwa Timena osaka nkunza ya mpate ikae,” 14ko ende aolotola bito bikae biʼetuka, aolota eto ea ekukelo, ko aolinga jonge likande lʼeto eko, ko aocwʼokitase naa wiso wa Enaima ele nda mboka ecwa Timena; ekiʼndʼenaka wae Sela aokitʼonto, ko ende ntalekyama elʼende nda liala. 15Aki Yuda oenaka, aokanela wae ale bomoto owa linsamba, ekiʼnde okukaka elongi ekande. 16Ko aoletʼelʼende ndʼompempe wa mboka, aolokela, “Kela nje ele we.” Ende ntea wae aki waji oki bona okae. Ende aokela, “Bofuto boe wʼonkaya wae oyʼelʼemi na?” 17Ende aolamba, “Njifokosokoza bonʼowa nta.” Ende aokela, “Ndanga ee wʼonkaya elaka nko onsokoza bonʼoko owa nta na?” 18Aokela, “Ndanga elanga we wae nkokaya na?” Aokela, “Lofete ja lotaza, lʼokulu boke, ko la bonkando bole nda likata like.” Ko aolokaya, ko aolotswʼelʼende, ko aofoswa jemi lʼende. 19Nkako Tamala aolemala, aokenda; aolotola eto eʼekukelo, ko aolota bito bikande bia etuka.
20Yuda aosokoza bona owa nta la likata ja lilongo likae bosi Adulama, wae akole ndanga ekae limʼelʼomoto oko, lolo ntotaneya nye. 21Ko aoluola banto ba wijiʼoko, “Bomoto owa linsamba oki naʼompempe wa mboka ale nko?” Iyo baokela, “Bomoto owa linsamba ntaki ane.” 22Ende aolutʼele Yuda, aokela, “Ncotanʼende, ko banto ba wijʼoko basanga wete bomoto owa linsamba ntaki ane.” 23Yuda aokela, “Ambʼocikale la toma toko nyango tofoata likambo ja nsoi; elʼemi njolosokoza bonʼone owa nta, ko we ntawotanʼende.”
24Aki nsanza isato olekaka baosangela Yuda, “Tamala, waji oki bona oke, aokela linsamba, ko aofoswa jemi lima linsamba liko.” Yuda aokela, “Looza nda fole, ko kela atumbame nda tsa.” 25Lolo akʼiyʼoozaka, aosisela ise ea bome okiʼnde, “Emi njofoswa jemi lʼontʼole bomongo belemʼene.” Ko aokela, “Nkoonda, longoza belemʼene; wete lofete ja lotaza lʼokulu ko la bonkando bone, bale ba na?” 26Yuda imezaki wae baki bakande, ko aokela, “Ende andekolʼemi lʼolotsi, la ncina ekiʼmi ncolekya ele bona okami Sela, wae ayale waji okae.” Ko Yuda ntetama lʼende lenkina nye. 27Akn ekeke ekae eʼeotelo okitaka, bala baasa baki nda likunju likae. 28Akiʼndʼolomatswa la mbaota, bonʼomo aoloza likata likae; ko ende ondootsaki aolemba lofekwa ja écarlate nda likata liko, aokela, “One aotswa joso.” 29Lolo ende aoluteya likata likae, ko bonʼonkina aolola, aootswa. Ko ondootsaki aokela, “Oyakaela we mongo mboka ngamo?” Ndʼewelʼeko lina likande litangemaki Pelese. 30Ndʼafeka bokune aolola la lofekwa jʼécarlate nda likata; ko lina likae jotangema Zela.
Currently Selected:
Toango 38: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
