Toango 37
37
Yosefa aotekyama la batomolo bakande
1Ko Yakoba aofetsa ndʼese eki ise ekae oyalaka bofaya, wae ese ea Kanana. 2Bine wete biotswelo bia bana ba Yakoba. Aki Yosefa okitaka mbula jom la nsambo, aocwʼoesanya botonga, ende lʼatomolo bakande. Ko bonolu oko aamanaki la bana ba Bila la Zilepa, baaji bʼise ekande. Ko Yosefa aosangela ise ekiyo elenge ekiyo eʼobe. 3Yisalaele alangaki Yosefa la lolango ja nkonde, ekiʼndʼootaka akiʼndʼokitaka engambi, ko aolokeela bonkoto wa couleurs iuke. 4Lolo aki batomoloʼakae enaka wae ise ekiyo alanga Yosefa ndekola banaʼakae bamo, iyo baoloina jino, ko ntabatefeleya lʼende baoyi bʼoya.
5Ko Yosefa aolota liloto, ko akiʼndʼosangelaka batomoloʼakae liloto liko, baoloina la jino ja ndekola. 6Ende aolakela, “Lokoza fele, liloto line likiʼmʼolotaka! 7Iso tolembaki biimba bia blé nda lisala, ko eimba ekami eolemala, ekemi ci, ko biimba bikinyo biolengamela eko, ko biokusamelʼeko.” 8Ko batomoloʼakae baolokela, “Kamba we wifoyalema roi ekiso? Wifototuka nde?” Ko baoloina la jino ja ndekola ndʼewelʼea baloto bakae, la ndʼewelʼea baoyi bakiʼndʼotefelaka. 9Ko aolota liloto linkina, ko aosangela batomolo liloto liko, aokela, “Bala, njolota liloto limo, wete, jefa, nsonge la tooci jom lʼimoko baonkusamela.” 10Lolo akiʼndʼosangelaka ise ekae lʼatomoloʼakae liloto, ise ekande aolofela, aolokela, “Liloto line liki wʼolotaka lile ngamo? Kamba emi la nyango eke lʼatomolo bake tifoyʼokoosamela ndʼamoci nde?” 11Batomoloʼakae baolookela inkunya, lolo ise ekae aofonga jofwa ja joi line ndʼotema.
12Batomolo ba Yosefa baocwʼoesanya betonga bia ise ekiyo nda Sekeme. 13Ko Yisalaele aokela Yosefa, “Batomolo bake bafesanya botonga nda Sekeme nde? Yaka, nkotomʼelʼiyo.” Ko aolamba, “Emʼone.” 14Ko Yisalaele aolokela, “Kenda, yengele nkina batomolo bake bakema, ko nkina betonga beonga, ko mpanga onjele nsango.” Ko aolotoma elengʼeko lima bofoku wa Ebulone, ko Yosefa aokita nda Sekeme. 15Ko bontʼomo aolotana, ayesesa ndʼesanga. Ko bontʼoko aolouola, “We oyase na?” 16Ende aokela, “Njasa batomolo bakami. Nkoonda, onsangele wiji bondesanyʼiyo botonga.” 17Bontʼoko aolokela, “Baolimanʼane, elʼemi ndokakʼiyo batefela, Kela tocwe nda Dotana.” Ko Yosefa aokima batomolo bakae, ko aolatana nda Dotana. 18Iyo baoloena ndʼesi, ko atafendʼotutama lʼiyo, baoloangela wango wae boome. 19Baotefelana, “Bala, nkangʼaloto, endʼonkʼoya. 20Loyaka fele, toome, ko touse nda lifoku limo; mpanga tokele wae nyama ea wale eolola ndala. Mpanga tene joi lindiela lima balotoʼakae.” 21Lolo aki Lubena okaka joi liko, aoloikya lima likata likiyo, aokela, “Tofoomʼende mbaoma mongo.” 22Lubena aolakela, “Talutezake balongo; louse nda lifoku line ane ndʼete keleke, lolonde lofokite la bakata.” Akelaki ngoko wae oikya limʼakata bakiyo, ko outeya ele ise ekande. 23Aki Yosefa okitaka ele batomoloʼakae, baololotola bonkoto, wete bonkoto boko wa couleurs iuke bokiʼndʼolotaka, 24baolokola, ko baolousa nda lifoku. Lifoku liko jokasa, ntaliki lʼasi, 25Limʼako baokitase wae bale toma. Lolo baosangyʼaiso, ko baolena boloi wa Ba-Yisamaele baoya lima Ngilada nda ngamela ikiyo, baotomba baimi la baume la mula ndʼEjipeto. 26Ko Yuda aokela batomolo lʼakuneʼakae, “Nga toome bokune okiso, ko tise balongoʼakae, nkito eʼisʼokitola na? 27Loyaka, totekyʼende ele Ba-Yisamaele, ko tofokeelʼende joi lʼakata bakiso, elʼende bokune okiso, ko la wunyu bokiso.” Ko batomolo lʼakune baoloimeza. 28Ba-Midiana bamo, basombi bʼaoka, baoleka. Ko baobela Yosefa, baolosafola lima lifoku, ko baolotekya ele Ba-Yisamaele la bitei bia argent ntukʼife; ko iyo baolotomba nda Ejipeto.
29Aki Lubena utaka nda lifoku, ko enaki wete Yosefa ntaki lenkina nda lifoku, aolatola benkoto bekande. 30Aolutʼele bakune bakae, ko aokela, “Bonoju oko afʼeko lenkina, ko emi mpanga newe nko?” 31Ko baokola bonkoto wa Yosefa, baomaki nta, ko baobobya bonkoto ndʼalongo. 32Ko baosokoza bonkoto wa couleurs iuke ele ise ekiyo, baokela, “Bala, iso totana yombʼine; longoza bonkotʼone, nkina bole wa bonʼoke, nkina nye.” 33Yakoba aolea bonkotʼoko, ko aokela, “Bole bonkoto wʼona okami; nyama ea wale eolola ndala. Yosefa aokanjolama la nyama nkʼekoji.” 34Ko Yakoba aolatabenkotoʼekae, aolota benyuku ndʼonkekeʼokande, ko aolela bona okande lilelo bembile beuke. 35Ko bana bakande lʼaende lʼamato baolemala wae bolomboele lokeseli; lolo ende ntalanga lolombwama lokeseli nye. Aokela, “Elʼemi njifocwa nda Seola ele bona okami o la ndalela.” Ise aololela nkʼefengʼeko. 36Ba-Midiana baolotekya ndʼEjipeto ele Potifala, bosali owa Falo, capitaine ea baesanyi bakae.
Currently Selected:
Toango 37: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
