Toango 36
36
Biotswelo bia Esau
(1 Bes 1.34-37)
1Biotswelo bia Esau, otangema Edome, bile ngone: 2Esau aolenga baaji bakae limʼele bana ba Kanana, wae Ada, bonʼowa Elona Bo-Ete, ko la Olibama bonʼowa Ana, bonʼowa Zibeona Bo-Iwa; 3ko la Basemata, bonʼowa Yisamaele, nkana ea Nebayota. 4Ko Ada aotelaki Esau Elifaza; ko Basemata aotaki Luele; 5ko Olibama aotaki Yeuse, Yalama la Kola. Bane wae bana ba Esau bʼaende, baotswaki elʼende ndʼokili wa Kanana.
6Ko Esau aokola baaji bakae ko lʼanaʼakande bʼaende la bʼamato, ko lʼanto bʼilombe ikae baumaka, ko la ngombo la betongaʼekande bia nyama beuma, ko la liaci likiʼndʼoataka ndʼokili wa Kanana liuma, ko aolimana limʼele bokune okae, Yakoba, ko aocwa ndʼese emo. 7Iyo ntabutʼofetsa ndʼitenelʼimoko, ewela wae bemengo bekiyo beolekola, ko bokili bokiʼyʼoyalaka lifaya ntabokoka lʼiyo ndʼewelʼea nyama ikiyo iuke. 8Elengʼeko Esau aosekwa nda ngongo ea Seila. Esau wete Edome. 9Biotswelo bia Esau, ise ea Ba-Edome, nda ngongo ea Seila, bile ngone: 10Bana ba Esau bʼaende bale wae Elifaza bonʼowa Ada, waji owa Esau, la Luele bonʼowa Basemata, waji owa Esau. 11Bana ba Elifaza bʼaende wete Temana, Omala, la Zefo, la Ngatama, la Kenaza. 12Ko Timana aki bonsamba owa Elifaza, bona owa Esau owa jende; ko ende aotelaki Elifaza Amaleke. Bane wae bana ba Ada, waji owa Esau. 13Ko bane bale bana bʼaende ba Luele: Nayata, Zela, Sama la Miza. Bako bale bana bʼaende ba Basemata, waji owa Esau. 14Ko bane bale bana ba Olibama, bonʼowʼomoto owa Ana, bonʼowa Zibeona, waji owa Esau: ende aotelaki Esau wae Yeuse, Yalama la Kola. 15Bane bale chefs limʼele bana bʼaende ba Esau. Lima bana ba Elifaza, nsomi ea Esau: chef Temana, chef Omala, chef Zefo, chef Kenaza, 16chef Kola, chef Ngatama, chef Amaleke: baso wete chefs baotswaki limʼele Elifaza ndʼese ea Edome. Bane bale bana ba Ada, bʼaende. 17Bane wae bana bʼaende ba Luele, bonʼowa jende owa Esau: chef Nayata, chef Zela, chef Sama, la chef Miza; haso wete chefs baotswaki limʼele Luele ndʼese ea Edome; iyo bale bana bʼaende limʼele Basemata, waji owa Esau. 18Bane wete bana bʼaende ba Olibama, waji owa Esau: chef Yeuse, chef Yalama, la chef Kola: baso bale chefs baotswaki limʼele Olibama, bonʼowʼomoto owa Ana, waji owa Esau. 19Bane wete bana bʼaende baki Esau, wae Edome, ko bane bale chefs ikiyo.
Biotswelo bia Seila
(1 Bes 1.38-54)
20Bane wae bana bʼaende ba Seila, Bo-Oli, bantʼafetsaki joso ndʼokili boko ko: Lotana, Sobala, Zibeona, la Ana, 21la Disona la Ezele la Disana. Bane wete chefs ya Ba-Oli, bana ba Seila ndʼokili wa Edome. 22Bana ba Lotana wae Oli la Emama; ko nkana ea Lotana wete Timena. 23Bana ba Sobala wete bane: Alawana, Manata, Ebala, Sefo la Onama. 24Bane wete bana ba Zibeona: Aya la Ana; ende ale Ana oko otanaki bitoko biʼasi ba tsa ndʼete keleke, akiʼndʼesanyaka mpunda ya Zibeona ise ekande, ndʼesobe. 25Bana ba Ana wete bane: Disona la Olibama, bona owa Ana owʼomoto. 26Bane wae bana ba Disona: Emedana, Esebana, Yitelana, la Kelana. 27Bana ba Ezele wae bane: Bilana, Zawana, la Akana. 28Bana ba Disana wae bane: Uza la Alana. 29Bane wete chefs baotswaki lima Ba-Oli: chef Lotana, chef Sobala, chef Zibeona, chef Ana, 30chef Disona, chef Ezele, la chef Disana. Bantʼane bale chefs iki Ba-Oli, wete chefs ikʼiyʼoataka ndʼese ea Seila.
31Bantʼane baki rois ndʼese ea Edome, atafa Yisalaele oata rois nye. 32Bela bona owa Bola aki roi ea Edome; lina jʼonangaʼokande wae Dinaba. 33Bela aowa, ko Yobaba bonʼowa Zela, bosi Bosula, aosulungana roi ndʼefosa ekiʼnde. 34Yobaba aowa, ko Usama, bosi Temana, aolosulungana nda mpifo ea roi. 35Usama aowa, ko Adada bonʼowa Bedada, olongaki Ba-Midiana ndʼesobe ea Moaba, aolosulungana nda mpifo ea roi; lina jʼonangaʼokae wae Awita. 36Adada aowa, ko Samela bosi Maseleka aosulungana nda mpifo ea roi. 37Samela aowa, ko Saula bosi Lobota elongi la Ntando, aolosulungana nda mpifo ea roi. 38Saula aowa, ko Bala-Anana bona owa Akabola, aolosulungana nda mpifo ea roi. 39Bala-Anana bona owa Akabola aowa, ko Adala aolosulungana nda mpifo ea roi; lina jʼonangaʼokande wae Pau; ko lina ja waji okande wete Metabele, bona owa Matulede, bonʼowa Mezaba. 40Chefs iotswaki limʼele Esau, la biotswelo bikiyo, la bafeta bakiyo, bale lʼaina ngone: chef Timana, chef Alawa, chef Yete te, 41chef Olibama, chef Ela, chef Pinona, 42chef Kenaza, chef Temana, chef Mibesala, 43chef Mangadiele, chef Ilama. Bako bale chefs ya Edome, elengʼele bafeta bakiyo nda bise bikʼiyʼoataka, Esau aki ise ea Edome.
Currently Selected:
Toango 36: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
