Toango 35
35
Yakoba imana lima Sekeme. Laele aowa ndʼeotelo ea Benyamina
1Ko Nzakomba aokela Yakoba, “Emala, kenda nda Bete le, ko yalʼeko, ko tongʼeko nkinda ea mbeka ele Nzakomba ondenyaki ele we aki wʼolotaka botomolo oke Esau.” 2Ko Yakoba aosangela ilongo ikande, ko la baki lʼende bauma, “Limola nzakomba yʼafaya ile lʼinyo, losotolʼinyo mongo, lenzaka benkoto bekinyo, 3ko temale, tokende nda Bete le, wae njemyʼeko nkinda ea mbeka ele Nzakomba onjambaki nda mbile ekiʼmʼenakʼelo, ko aki lʼemi nda lokendo lokami louma.” 4Ko baokaya Yakoba baidola ba nzakomba yʼafaya baki lʼiyo, ko la bakoko baki ndʼatoi bakiyo, ko Yakoba aokunda belemʼeko ndʼase ba boele boki nda Sekeme.
5Ko iyo baokenda, ko booma wa Nzakomba bokwelaki benanga beuma bekotutsi, ko iyo ntabakima bana ba Yakoba. 6Ko Yakoba aoya nda Luza, wete Bete le, ele ndʼese ea Kanana, ende la banto baki lʼende bauma. 7Ko aotongʼeko nkinda ea mbeka, ko aotanga wijʼoko Ele-Bete le; eki Nzakomba enyaka elʼende eko, akiʼndʼolotaka botomolo okande. 8Ko Debola, ondesanyaki Lebeka akiʼnde bonoju, aowa, ko baolokunda ndʼase bʼotamba wa boele, wijʼa Bete le; ko itenela iko yotangema Alonabakuta.
9Ko Nzakomba aolenya lenkina ele Yakoba akiʼndʼoyaka lima Padanalama, ko aolosakela bokako wa swa. 10Ko Nzakomba aolokela, “Lina like Yakoba. Lifautʼotangema Yakoba, lolo lifotangema Yisalaele.” Ko limʼako aotangema Yisalaele. 11Ko Nzakomba aolokela, “Emi nde Nzakomba ea mpamba euma. Funzola bana, ko fulaka. Booci la etukuluku ea beoci bifootswa limʼele we, ko bifiela limʼele we. 12Ko ese ekiʼmʼokaaka Abalayama la Yisaka, njifokoka we la banaʼake ndʼafeka bake.” 13Nkako Nzakomba aolulela limʼitenela ikiʼndʼotefelaka lʼende. 14Ko Yakoba aolemya likonji ja bikenje ndʼitenela iki Nzakomba otefelaka lʼende, ko aoluteza mbeka nda likonji liko, ko aoluteza bauta nda likonji liko. 15Ko Yakoba aotanga itenela iki Nzakomba otefelaka lʼende Bete le.
16Ko baolimana lima Bete le; ko akiʼyo nkʼesi lima Efulata, Laele aolomatswa lʼeefe ea ndekola wae aote. 17Ko alomatswʼende lʼelo mongo, ondootsaki aolokela, “Toangake, ele aeyoko we oata bonʼomo owa jende.” 18Ko atatamʼende Tiwa, aolilʼona lina Benoni; lolonde ise ekande aoloila lina Benyamina. 19Elengʼeko Laele aowa, ko aokundama nda mboka ecwa Efulata, wete Bete leme. 20Ko Yakoba aolemya likonji ndʼekundelo ekae, lile likonji ja jofwa jʼekundelo ea Laele, ko liko lilʼeko o la mbilʼene. 21Ko Yisalaele aolutʼokenda lokendo, ko aolemya ilombe ikae ya bito wijʼilombe yʼeliko ya Edele.
22Nkʼafetsa Yisalaele ndʼese eko, Lubena aocwa oetama la Bila, waji owʼise ekae owʼosali; ko Yisalaele aoloka joi liko. Bana bʼaende ba Yakoba baki jom lʼafe. 23Bana ba Lea baki; Lubena, nsomi ea Yakoba, ko la Simona, Lewi, Yuda, Yisasakala la Zebulona. 24Ko bana ba Laele wae Yosefa la Benyamina. 25Ko bana ba Bila, bosali owʼomoto owa Laele wete Dana la Napatali. 26Ko bana ba Zilepa, bosali owʼomoto owa Lea, wete Ngada la Asela. Bane wae bana ba Yakoba baotswaki elʼende nda Padanalama. 27Yakoba aoya ele ise ekande Yisaka nda Mamele, ndʼonanga wa Kiliyata-Alaba wae Ebulone, wijʼoki Abalayama la Yisaka ofetsaka. 28Ko mbula ya Yisaka yokita bonkama la ntuku mwambi. 29Ko Yisaka aokenzʼolimʼokande akiʼndʼokitaka mpaka mongo, ko aowa, ko baolokunda la bantʼakande bawaki; banʼakande Esau la Yakoba baolokunda.
Currently Selected:
Toango 35: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
