Toango 34
34
Likambo ja Dina la Sekeme, bona owa Amola
1Ko Dina, bonʼowʼomoto owa Lea okiʼndʼootelaka Yakoba, aocwʼoena bamato bʼese eko. 2Aki Sekeme, bonʼowa Amola, Bo-Iwa, chef ea ese eko enakʼende, aolokola, etamaki lʼende, ko aolosotsa. 3Ko botema bokae bofotamela Dina, bonʼowʼomoto owa Yakoba, aololanga, ko aolosooza lʼoya. 4Ko Sekeme aotefeela ise ekande Amola, akela, “Onkoele lifoku Une wae ayale waji okami.” 5Ko Yakoba aoloka wae aosotsa bona okande Dina. Lola bana ba Yakoba bʼaende baki ndʼesobe la botongaʼokae wa nyama, ko Yakoba aoyala o wai elaka nko baoya. 6Ko Amola, ise ea Sekeme, aocwʼele Yakoba otefela lʼende. 7Aki bana bʼaende ba Yakoba okaka joi liko, baoya limʼesobe; baokesela, ko baoloka nkele mongo ndʼewelʼekiʼndʼokelaka joi jʼosesengano nda Yisalaele ekiʼndʼetamaka la bonʼowa Yakoba, wae joi litatokelama. 8Ko Amola aotefeelʼiyo, akela, “Botema wʼonʼokami bofotamela bonʼokinyo owʼomoto la lolango jʼeefe mongo; mbondʼinyo was lolokayʼende wae ayaleme waji okae. 9Kela tenganʼaaji, inyo lotakaya banʼakinyo bʼamato nda liala, ko lokola bakiso wae bayale baaji bakinyo. 10Ko inyo lifofetsa lʼiso; ko bokili bole nda joso likinyo; lofetsa ndʼoko, losombʼaoka, ko loataka bemengo ndʼoko.” 11Ko Sekeme aokela ise la bankana ba Dina, “Kela ntane boya ndʼaiso bakinyo, ko njifolokaya wiko wʼaumba bondikelʼinyo. 12Londikele nyongo la nganji nko loswele, ko njifolokaya elenge endikʼinyo; lolo lonkaya lifoku line wae ayaleme waji okami.”
13Bana bʼaende ba Yakoba baolamba ko baotefela la Sekeme lʼise ekae Amola la jongo, ekiʼndʼosotsaka nkana ekiyo esotselo. 14Baolokela, “Iso tofokeleya joi line, wae tolekya nkana ekiso ele bonto otafotenama nsonge; ngoko tosotsama lʼesotselo. 15Lolo iso tifimeza joi line lituolʼinyo la joi limoko kika, wete inyo loyalema elengʼelʼiso, wae wengi jende lokinyo atename nsonge. 16Mpanga tolekezʼinyo bana bakiso bʼamato, ko iso tokole banʼakinyo bʼamato, ko tofetsa lʼinyo, ko toyale booci bomoko. 17Lolo nkina lofotokoza, ko lofotename nsonge, tokole bona okiso, ko tokende.”
18Ko baoyi bakiyo baosimamʼolotsi lʼAmola lʼona okande Sekeme. 19Bosekotʼoko ntamonga lokela joi liko, ekiʼndʼolangaka bonʼowʼomoto owa Yakoba la lolango mongo. Ende aki la mpifo ea joso ndʼilongo ya ise ekande. 20Ko Amola la bona okande Sekeme baoya nda wiso wʼonangʼokiyo, ko baotefela lʼaende bʼonanga, baokela, 21“Bantʼane baamana ndʼoseka lʼiso. Kelabafetsa ndʼokiliʼone, ko basombʼaoka, ele bokili bokoka lʼiyo ndʼonene; kelʼiso tokole banʼakiyo bʼamato wae bayale baaji bakiso, ko takayʼiyo bana bakiso bʼamato. 22Lolonde bantʼako bafimeza wae bafetsa lʼiso, ko iso toyaleme nga boociʼomoko imola nko tokele joi line limoko, wete wengi jende lokiso atename nsonge, nkʼelenge ete namʼiyo nsonge. 23La ngombo ikiyo, la liaci likiyo, la nyama ikiyo iuma bafaoyalema bakiso nde? Kela toamane lʼiyo, ko bifofetsa lʼiso.” 24Ko bantʼauma bandolaki lima wiso wʼonangaʼokande baolokoza bomwa wa Amola lʼona okae Sekeme; ko wengi jende aotenama nsonge, wete iyʼandolaki lima wiso wʼonangʼokae bauma. 25Nda mbile eʼisato, akʼiyʼokaka eefe ea mpota, bana bafe ba Yakoba, wae Simona la Lewi, bankana ba Dina, baokola tofaka tokiyo tʼetumba, ko baolotswa ndʼonangʼoko la njoongwa, ko baomaki baendʼako bauma. 26Baomaki Amola lʼona okande Sekeme lʼifaka yʼetumba; ko baokola Dina lima ilombe ya Sekeme, ko baokenda. 27Bana bʼaende ba Yakoba baoyʼeko endambi biembe biʼanto baomamaki, ko baofunzʼonangʼoko, ekʼiyʼokyaka nkana ekiyo nsoi. 28Baokola mpate ikiyo, la ngombo ikiyo, la mpunda ikiyo; wete liaci liki ndʼonanga la liaci liki ndʼasala, 29ko bemengo bekiyo beuma; ko baokanda banaʼakiyo lʼaajiʼakiyo njanga, ko baokola belemo beuma beki nda tolombe. 30Nkako Yakoba aokela Simona la Lewi, “Inyo lonjieza likambo, wete njinama jino lʼanto bʼokili bone, wae Ba-Kanana la Ba-Peliza. Banto bakami bafʼauke, ko nga batakane wae bambunya, njifomelengana, lʼemilʼilongo ikami.” 31Lolo iyo baolokela, “Kamba aongaki wae akele la nkana ekiso elenge ekelʼiyo lʼimoto owa linsamba nde?”
Currently Selected:
Toango 34: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
