Toango 32
32
Yakoba asokoza Esau nganji. Yakoba aswela lʼekima ea loola
1Yakoba aokenda lokendo lokande; ko bikima bia Nzakomba biokumana lʼende. 2Aki Yakoba aenaka, aokela, “Itenelʼine ile boyalo wa Nzakomba!” Ko aotanga itenelʼiko Manaima.
3Ko Yakoba aotoma bikima nda joso likande ele Esau, botomolo okae ndʼokili wa Seila, wae bokili wa Edome. 4Aolakaya lotomo lone, “Lifosangela nkolo ekami Esau ngone: Bosali oke Yakoba asanga baoyiʼane, Nki eka Labana elaka nkʼaeyoko. 5Ko mbata ngombo la mpunda, lʼetonga bia mpate lanta, la basali bʼaende la bʼamato; ko niotoma bantʼane okosangela we, nkolo ekami, baoyiʼane, ndʼewela wae ntane boya ndʼaiso bake.”
6Bikima baolutʼele Yakoba, baolokela, “Tokitʼele Esau, botomolo oke ko ende aoya okumana la we, ko banto benkama benei bale lʼende.” 7Nkako Yakoba aoloka bofoju mongo, ko aokakaana bokakaano mongo. Aokafʼanto baki lʼende, la mpate la ngombo la ngamela ndʼeloi befe. 8Aokela ndʼotema, “Ayaka Esau aoya ele boloi bone ko afitʼoko; boloi bociki wifoloteya.” 9Ko Yakoba aokela, “O Nzakomba ea fafa ekami Abalayama, Nzakomba ea fafa Yisaka, o Yawe, we onkelaki, Uta ndʼese eke, ko ele ilongo ike, ko emi njifokokeela baoyi bʼolotsi: 10emi mpeji la boya, la boleki isisi, wa beya beki we onjaaka, ko la nsosolo euma eki wʼeneyaka bosali oke, elʼemi mpendaki Yoladane ene o lʼonkando kika, ko aeyoko njoyalema beloi befe. 11Nkoonda, ombikya lima likata jʼotomolo okami oyei, wae lima likata jʼEsau; elʼemi ndoangʼende, nyango afoyʼotoomʼisʼauma, banyango ko la bana bolongo. 12Ko we otefelaki, Njifokokeela we bolotsi, ko njifokofuleza banʼake ngʼekongo bia lieke jʼokwa, befoandemeya lʼoanji wʼeko boleki.”
13Yakoba aoyalʼeko botsʼoko. Ko limʼelemo beki lʼende aokola nganji wae akaya botomolo okae Esau, wete, 14nta yʼamato benkamʼefe, la nta yʼaende ntuku ife; mpate yʼamato benkamʼefe, la mpate yʼaende ntukʼife; 15ngamela ya bialekele ntuku isato lʼana bʼiko; ngombo yʼamato ntuku inei la ngombo yʼaende jom; ko la mpunda yʼamato ntuku ife la yʼaende jom. 16Ko aokitsa basali bakande nyamʼiko, wengi elenge ea nyama, wengi botonga. Ko aokela basaliʼakande, “Loleka nda joso likami, ko locika jole ndatsa botonga lʼotonga.” 17Ko aokaya bonto okenda lʼotonga wa joso lotomo ngoe, “Ae Esau, botomolo okami okumana la we ko akuola, ‘We bosali owa na? Ocwa nko? Ko ine ile nda joso like ile ya na?’ 18mpanga wʼosangele, ‘Ile ya bosali oke Yakoba. Ile nganji esokozʼende nkolo ekami Esau; ko ende mongo aoya ndʼafeka.’ ” 19Ko aokaya lotomo nko loko elʼende oki lʼotonga wʼefe, la wʼesato, ko lʼele bako bauma bakimaki lʼetonga, “Lifotefela la nkolo ekami Esau nkʼelengʼeko aʼinyʼokumana lʼende, 20lifokela, ‘Bala, bosali oke Yakoba ale ndʼafeka bakiso.’ ” Ekiʼndʼokelaka ndʼotemaʼokae, “Mpanga ndocicimya botema la nganji ene eleka nda joso likami, ko lʼafeka, aʼemʼoena elongi ekae, nkina ifonjamba lʼoya.” 21Elengʼeko nganji yoleka nda joso likande, ko ende aocikala eko nda nganda botsʼoko.
22Ko aolemala lʼotsʼoko, ko aokola baajiʼakae bakʼafe, la basali bakae bafe bʼamato, ko la bana bakae bʼaende jom lʼomoko, ko aolafenza nda Yaboka. 23Aolakola ko aolatoma wae bafende ntando, ko aofenza belemo bekae beuma o ngoko. 24Ko Yakoba aocikalʼeko nkʼende kika. Ko bonto aoya oswela lʼende elaka nko nkesa eokya. 25Aki bontʼoko enaka wae afoumbeyʼende, ende aofomwa litonga jʼefelo, ko litonga jʼefelo josikwa akiʼndʼoswelaka lʼende. 26Nkako aokela, “Oncike, nkende, la ncina wae jefa jokya.” Lolo Yakoba aokela, “Mpaokoeika wae okende atafa wʼonsakela bokako wa swa.” 27Ko aolokela, “Lina like na?” Aolamba, “Yakoba.” 28Nkako aokela, “Lina like lifaotangema lenkina Yakoba, lolonde Yisalaele; ele we oswela la Nzakomba ko la banto, ko olonga.” 29Ko Yakoba aolouola, “Nkoonda, onsangele lina like.” Ende aolamba, “Onduolʼemi lina likami lae?” Ko aolosakela bokako wa swa nkʼeko. 30Ko Yakoba aotanga itenelʼiko lina Penwele, ekiʼndʼokelaka, “Njolena Nzakomba elongi lʼelongi, ko emi nsoika.” 31Jefa jokya akiʼndʼolekanaka Penwele, ko aotenguma nda ncina ea lokolo lokae. 32Ko ndʼewelʼeko, o la mbilʼene, bana ba Yisalaele bafole bosisa bole nda ncina ea lokolo, ndʼewelʼeki ekima ofomwaka bosisa wa litonga jʼefelo ea Yakoba.
Currently Selected:
Toango 32: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
