Toango 31
31
Yakoba la Labana balena. Ekumanelo ea Yakoba lʼEsau
1Ko Yakoba aoloka baoyi baki bana bʼaende ba Labana otefelaka, wae, ‘Yakoba aokola liaci liki fafa liuma, ko aata liaci line liuma o limʼelʼise ekiso.” 2Ko Yakoba aolena wae Labana ntosimʼende losimo ngoki joso. 3Nkako Yawe aokela Yakoba, “Uta ndʼese ea baise bake lʼea bioto bike, ko emi njifoyala la we.” 4Nkako Yakoba aoleta Laele la Lea elʼende ndʼesobe eyala botongʼokae, 5ko aolakela, “Njena wae ise ekinyo afonsime losimo ngoki joso. Lolonde Nzakomba eʼise ekami aki lʼemi. 6Ko inyo lolea wete nsaelaki ise ekinyo la mpamba ekami euma. 7Ko ise ekinyo ankakatanyaki, ko aolenza bofuto bokami bienza jom, lolo Nzakomba ntokaya elekelo wae ankeelʼemi bobe. 8Nga akelaki, Iko ya bantonʼantono wae bofutʼoke, nkako botonga bouma bootaki bana bʼantonʼantono; ko nga akelaki, Iko yʼakeka ile bofuto boke, nkako botongʼouma boota bana bʼakeka. 9Lʼelengʼeko Nzakomba aokola nyama iki ise ekinyo, ko aonkayʼemi. 10Ndʼekeke eki nyama oalanaka, nsangyakʼaiso bakami, ko njenaki nda liloto, ko bala nta yʼaende ikotamaki nda nta yʼamato iki ya bakeka la yʼantonʼantono la yʼaanda. 11Ko ekima ea Nzakomba aontefeela nda liloto, Yakoba.’ Ko emi njolamba, ‘Emʼone.’ 12Ko aokela, ‘Bunzʼaiso bake aeyoko, ko wene, wae nta yʼaende iuma ikotama nda nta yʼamato ile yʼakeka la yʼantonʼantono la a baanda; elʼemi njolena baoyi bauma akokeela Labana. 13Emi nde Nzakomba ea Bete le, wiji boki wʼutezaka bauta nda likonji jʼekenje ko boki w’ oncikelakʼelaka. Aeyoko emala, limana lima esʼene, ko uta ndʼese eki wʼootswaka.’ ” 14Ko Laele la Lea baolamba, baolokela, “Limo liondo la lisango liciki elʼiso ndʼilombe ya ise ekiso nde? 15Ende afototange bafaya nde? Elʼende aototekya, ko aosilʼola baumba bakiʼsʼosongyamaka. 16Liaci liki Nzakomba ofonolaka ise ekiso lile wae likiso la jʼana bakiso. Ko aeyoko kela joi nko loswele liki Nzakomba okotomaka.”
17Nkako Yakoba aolemala, ko aolafya banaʼakae la baaji bakae nda ngamela, 18ko aotomba nyama ikae iuma, ko la liaci likiʼndʼoataka liuma; wete nyama ikiʼndʼoataka eko nda Padanalama, ko aocwa ele Yisaka, ise ekande, ndʼese ea Kanana. 19Aki Labana ocwaka osaka mpate ikande nkunza, Laele aoliya baidola bʼilombe bʼise ekande. 20Ko Yakoba aokakatanya Labana, bosi Sulia, la jongo, ekiʼndʼimanaka la jongo, ntosangelʼende. 21Aolota la biatelo bikae biuma; aolemala, ko aofenda ntando ko aolelela ngongo ea Ngilada.
22Nda mbile eʼisato baosangela Labana wae Yakoba aolota. 23Ko aokola bioto bikae lʼende, ko aolokima bembile nsambo, ko aoloata nda ngongo ea Ngilada. 24Lolo Nzakomba aoyʼele Labana, bosi Sulia, nda liloto lʼotso, aolokela, “Fonga loala wae ofotefeele Yakoba la joi jʼolotsi nkina joi jʼobe.” 25Aki Labana oataka Yakoba, Yakoba aosilʼoemya ilombe ikae ya bito nda ngongo; ko Labana la bioto bikae baolemya tolombe tokiyo ta bito nda ngongo ea Ngilada. 26Ko Labana aokela Yakoba, “Joi liki wʼokelaka na? wae olota la njoongwa, ko otomba banaʼakami bʼamato ngole njanga yʼifaka yʼetumba? 27Olotaki la lokuko ncina na? ko onkakatanyaki lae, wae ntonsangela? Siki nkokenzaki la tosano la njemba la ngomo la bongele. 28Ntonkaya elekelo wae nsise banaʼakami bʼaende lʼamato la baiser lae? Okelaki joi jʼolole mo! 29Emi nde la mpamba okokeela bobe, lolonde Nzakomba ea ise eke atefelaki lʼemi lobi lʼotso, aokela, ‘Fonga loala wae ofotefele la Yakoba la joi jʼolotsi la joi jʼobe.’ 30Aeyoko osilʼokenda, eki wʼokaka mposa mongo ea ilongo ikawe, lolo wiyaki nzakomba ikami lae?” 31Yakoba aolamba, ko aokela Labana, “Afa ekiʼmʼoangaka nyango ofomponola bana bake bʼamato la bolo? 32Ko bonto oe wʼotana la nzakomba ike elʼende, afaobika nye. Ndʼaiso ba bioto bikiso tumya yomba ike ilʼelʼemi, kowambokolʼiko.” Yakoba ntea wete Laele aoliya baidola bako.
33Ko Labana aolotswa ndʼilombe ya Yakoba ya bito, ko ndʼilombe ya Lea ya bito, ko nda tolombe ta basali bʼamato bakʼafe ta bito; lolo ntatana baidola bako. Ko aolola lima ilombe ya Lea ya bito, ko aolotswa ndʼilombe ya Laele ya bito. 34Lolo Laele aokola baidola ko aolisa bako ndʼekiselo ekisʼanto nda ngamela, ko aokitase ndʼaliko bʼeko. Ko Labana aolengela ndʼilombe iuma ya bito, lolo ntatana baidola. 35Ko Laele aokela ise ekae, “Tondemwake nga mpokuseya jemala nda joso like, elʼemi njolena nsanza ngʼondenʼamato.” Ko aokongʼasa, lolo ntatana baidola. 36Nkako Yakoba aoloka nkele, ko aofangwela Labana; wete Yakoba aotefeela Labana wae, “Likambo likami na? Bobe bokami na wete onkimaki la loango ngoe? 37Ko aki wʼengelaka toma tokami touma, yomba iki wʼotanaka yʼilombe ike na? Toma touma toki wʼotanaka limʼilombe ike, ilakʼane nda joso ja bioto bikawe la bikami, kelʼiyo batene likambo ndatsʼisʼafe. 38Mbulʼine ntukʼife nki eko ele we. Mpate ike la nta ike ntiseketana bana, ko ncila nyama yʼaende limʼotongʼoke ndala. 39Iko iki nyama ya wale outaka, ncikosangela; lolo mputakʼiko emi mongo. Iko indiyamaki lʼotso, nkina la mbile, wʼetaki bofuto lima likata likami. 40Emi nki nkʼelengʼeko; la mbile ngangala ea wane eongala, ko njolenga la mpio lʼotso, ko baisilo baolota limʼaiso bakami. 41Mbulʼine ntukʼife njoyala ndʼilombe ike. Nkosaelaki mbula jom lʼinei ndʼeloko ea banʼake bafe bʼamato, ko mbula botoa ndʼeloko ea botongʼoke wa nyama, ko wenzaki bofuto bokami bienza jom. 42Nga Nzakomba ea baise bakami ntaki lʼemi, wae Nzakomba ea Abalayama, ko la Ende oanga Yisaka boangi, siki wonkenzaki o mpolo. Nzakomba aolena elo ekami, lʼolemo wʼakata bakami, ko akofelaki lofeli botsʼoki lobi.”
43Labana aolamba, ko aokela Yakoba, “Banʼane bʼamato bale bakami, ko banʼane bakiyo bale bakami, botongʼone wa nyama bole bokami, ko toma tondena we touma tole tokami. Lolo joi likuseyʼemi okeela banʼane bakami lʼanaʼakiyo bakiʼyʼootaka na? 44Yaka, kela tolembʼokolo, emi la we, ko kelʼoko boyale témoin ndatsʼemi la we.” 45Ko Yakoba aokolʼekenje, ko aolemyʼeko nga likonji ja jofwa. 46Ko Yakoba aokela bioto bikae, “Lotakanya bikenje.” Ko baotakanya bikenje, baotoza biko botole, ko baleki toma eko ndʼaliko ba botole wa bikenje. 47Labana aotanga botole boko Yengala-Saduta, lolo Yakoba aotangʼoko Ngalede. 48Labana aokela, “Botole bone bole témoin ndatsʼemi la we mbilʼene.” La ncinʼeko botangema Ngalede, 49ko la Misepa, elʼende aokela, “Yawe esanya ndatsʼemi la we alenʼiso omo lʼomo ndalena. 50Nkina okeela banʼane bakami bʼamato baoyiʼobe, nkina okola baaji bamo, mpeka la bontʼafeko lʼiso, lolo Nzakomba ifoyalema témoin ndatsʼemi la we.”
51Ko Labana aokela Yakoba, “Bala botole bone, ko la likonji line jʼekenje, likiʼmʼilaka ndatsʼemi la we. 52Kela botoleʼone boyale témoin, ko likonji line jʼekenje liyale témoin, wae emi mpaofenda botole bone ele we, ko we ofaofenda botole bone la likonje line jʼekenje elʼemi, wae tokelane bobe. 53Kela Nzakomba ea Abalayama ko la Nzakomba ea Naola, ko la Nzakomba eʼise ekiyo, ayaleme juge ndatsʼisʼafe.” Ko Yakoba aosimba nsimbi lʼEnde oki ise ekae Yisaka oangaka. 54Ko Yakoba aolekya mbeka ele Nzakomba nda ngongo, ko aoleta bioto bikae wae bale toma. Baleki toma, ko baoyalʼeko nda ngongo botsʼouma. 55La nkesa mongo Labana aolemala, ko aosesana la bankana bakae lʼana bakae bʼamato la baiser, ko aolasakela bokako wa swa; nkako aokenda, aolutʼola.
Currently Selected:
Toango 31: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
