Toango 30
30
1Aki Laele enaka wae afootele Yakoba bana, aolokela botomolo okande inkunya, ko aokela Yakoba, “Onkaya bana, nyango mpowa!” 2Nkele ea Yakoba eongalʼele Laele, ko aokela, “Kamba emi nde nda mpifo ea Nzakomba, ende okosukaki wae ofoote bana?” 3Ko Laele aolokela, “Bala bosali okami, Bila. Yotswa elʼende wae aote bana nda bifelo bikami, mpanga mbate bana lʼende.” 4Ko aolokaya Bila, wae ayale waji okae. Ko aolotswʼelʼende. 5Ko Bila aofoswa jemi, ko aotelaki Yakoba bona owa jende. 6Ko Laele aokela, “Nzakomba aontenela likambo, ko aoloka lofoso lokami, ko aonkaya bona owa jende.” La ncinʼeko aolilʼende lina Dana. 7Ko Bila aofoswa lenkina, ko aotelakitelaki Yakoba bonʼomo owa jende. 8Nkako Laele aokela, “Nswelaki lʼotomolo okami lʼeswela beleki bonene, ko emi niolonga” Ko aolilʼende lina Napatali.
9Aki Lea enaka wae aolambya loota bana, aokola Zilepa, bosali okae, ko aololekya ele Yakoba wae ayale waji okae. 10Ko Zilepa, bosali owa Lea, aotelaki Yakoba bona owa jende. 11Ko Lea aokela, “Botonga boya mo!” Ko aolilʼende lina Ngada. 12Ko Zilepa bokwala owa Lea, aotelaki Yakoba bona owʼafe owa jende. 13Ko Lea aokela, “Emi ndokʼekemo; ele bamato bifontanga owʼekemo nsosolo.” Ko aolilʼende lina Asela.
14Ndʼekeke eʼemukelo ea blé, Lubena aocwa nda lisala, ko aotana mandragores imo. Ko aoyela iko ele nyango ekae Lea. Ko Laele aokela Lea, “Nkoonda, onkaya mandragores imo yʼona oke.” 15Aolamba, “Lile joi jʼisisi nde, wete omponole bome okami? La olanga lokola mandragores yʼona okami ngoko?” Laele aokela, “Ifetama la we botsʼone ndʼewelʼea mandragores yʼona oke.” 16Aki Yakoba oyaka lima lisala lʼokolo, Lea aocwʼokumana lʼende, ko aolokela, “Wifotswʼelʼemi, elʼemi njokosomba la mandragores yʼona okami.” Ko etamaki lʼende botsʼoko. 17Ko Nzakomba aolokoza Lea, ko ende aofoswa jemi, ko aotelaki Yakoba bona owa jende owʼatano. 18Ko Lea aokela, “Nzakomba aondakola ndako ekami, ekiʼmʼokaaka bome okami bosali okami.” Ko aolila bona okande lina Yisasakala. 19Ko Lea aofoswa lenkina jemi, ko aotelaki Yakoba bona omo owa jende, wete owʼotoa. 20Ko Lea aokela, “Nzakomba aonkaya nganji eʼolotsi. Aeyoko bome okami ifoyala lʼemi, ekiʼmʼootelakʼende bana bʼaende botoa.” Ko aolilʼende lina Zebulona. 21Ndʼafeka aotaki bona owʼomoto, ko aolilʼende lina Dina. 22Nkako Nzakomba aolofwa Laele, ko aolookoza, ko aolokaya liota ja bana. 23Ko aofoswa jemi, ko aotaki bona owa jende, ko aokela, “Nzakomba aolimola litengo likami.” 24Ko aolilʼende lina Yosefa, aokela, “Kela Yawe ankaya bonʼomo owa jende.”
25Aki Laele ootaka Yosefa, Yakoba aokela Labana, “Onsise, kela nkende ndʼola, ndʼese ekami. 26Onkaya baajibakami lʼana bakami bakiʼmʼokosaelaka, kela nkende; ele we wea bolemo wʼolotsi bokiʼmʼokokambelaka.” 27Labana aolokela, “Nkoonda, ngʼonsimʼolotsi, kongoyala lʼemi fele; elʼemi njokotola wae Yawe aonsakela bokako wa swa la ncinʼekawe. 28Sanga bofuto boʼemʼokofuta, ko njifokoka boko.” 29Yakoba aolokela, “We mongo wea elenge ekiʼmʼokosaelaka, ko elenge eki nyama ike oongaka lʼemi. 30A tafʼemi oya ele we, liaci like liki nkʼisisi mongo, ko liko jofula lʼefulelo mongo, ko Yawe aokosakela bokako wa swa wiji nko loswele bokiʼmʼokengwaka. Lolo aeyoko njifofongela ilongo ikami baumba ekeke ele nko?” 31Aokela, “Olanga wae nkokaya na?” Yakoba aokela, “Ofaonkaya yomba nkaka; lolo ngʼolimeza onkeele joi line, njifesanya botonga boke, ko mpongʼoko. 32Kela ntuwane botonga boke bouma mbilʼene, ko njimole limʼotonga nyamʼile la baanda lʼantona la wengi mpate ea yo, ko la nta ya baanda lʼantono, ko bofutoʼokami wifoyala nyama ya bilenge biko. 33Ngoso baoyiʼakami ba njelama bifondongya ndʼekeke eya we wae wengele bofuto bokami. Wengi nta efa la baanda lʼantono, ko wengi mpate efa ea yo ee wʼotana lʼemi, wifotanga wae ndiyaki eko ndiiya.” 34Labana aokela, “Ngokʼolotsi! Joi liyala ngʼotefela we.” 35Mbilʼeko Labana aolimola nta yʼaende iki lʼakeka la bantonʼantono, la nta yʼamato iki lʼantonʼantono la baanda ikʼiuma, ko la mpate ya yo, ko aolila nyamʼiko ndʼakata ba bana bakae bʼaende. 36Ko Labana aolila esi ea lokendo ja bembile besato ndʼatsʼende la Yakoba; ko Yakoba aolesanya botonga bouma bokociki wa Labana.
37Ko Yakoba aokola nganza ya bitafe bia bofumbo la bia bondenge la bia bombambo, ko aotembola belongo nda lofoso ja nganzʼiko, wete fe ea nganza enya. 38Ko aolila nganza iko ikiʼndʼotembolaka nda bimeelo biki betonga oyaka omela basi. La ncina eki nyama oalanaka aki iko oyaka omelʼasi, 39wae betonga beoalana nda joso ja nganzʼiko, nkako baotaki bana ba bakeka la bantono la baanda. 40Ko Yakoba aokafola bana, ko aosanganya bana baki ba bakeka la ba yo. Aobuza betonga bekae bia mpate la nta, ko ntutʼosanganya iko la betonga bia Labana. 41Aki nyama ileki bolo oalanaka, Yakoba aolila nganzʼiko nda bimeelo nda joso ja baiso bʼotonga, wae baalane ndʼetei ea nganzʼiko. 42Lolo ntila nganzʼiko nda joso ja nyama ya tongoi; elengʼeko nyama iki ya tongoi yoyalema ya Labana, lolo ya bolo yoyalema ya Yakoba. 43Lʼelengʼeko bontʼoko, Yakoba, aokaka la liaci, ko aki lʼetonga biʼenene, ko lʼakwala bʼamato la bʼaende, ko la ngamela la mpunda.
Currently Selected:
Toango 30: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
