Toango 29
29
Yakoba eka Labana. Lea la Laele. Bana ba Yakoba
1Ko Yakoba aokenda lokendo lokae, ko aokita ndʼese ea banto ba est. 2Aalʼende aolena etoko eʼasi ndʼesobe, ko bala betonga bia mpate besato betamaki ntutama lʼetoko, ele baesanyi bayomeza mpate basi limʼetoko eko. Ko ekenje eʼenene eki ndʼomwa wʼetoko. 3Nga betonga beuma beosilʼotakana, baesanyi baolimolʼekenje limʼomwa wʼetoko, ko baomeza mpate iuma basi, nkako baoluteya ekenje ndʼomwa wʼetoko ngoki joso. 4Yakoba aokela baesanyi, “Balongoʼakami, inyo loya lima nko?” Baolamba, “Iso tole banto ba Alana.” 5Ko aolakela, “Inyo lea nde Labana, bona owa Naola?” Baokela, “Toloea.” 6Aolakela, “Akema bolonde?” Baokela, “Onde, akema bolo; ko bala Laele, bona okande endʼonko aoya la mpate.” 7Ko aokela, “Bala, jefa lilʼeko, ko ekeke ea ntakanya ea nyama etafiela, lomezʼiko basi, ko luteyʼiko nda bisobe, wae bafe toma.” 8Iyo baolamba, “Iso tofokeleya ngoko; elaka nko betonga beuma betakane, ko bakalimola ekenje limʼomwa wʼetoko, mpanga tomeza mpate basi.” 9Nkʼatefelʼende lʼiyo, Laele aoya la mpate yʼise ekande ikiʼndʼesanyaka. 10Aki Yakoba enaka Laele, bona owa Labana, nkana ea nyango ekande, aotutama, ko aokalimola ekenje limʼomwa wʼetoko, ko aomeza mpate ya Labana, nkana ea nyango ekande, basi. 11Ko Yakoba aosambela Laele la baiser, ko aosangya lofoso, ko aolela lilelo. 12Ko aolosangela wae ale eoto ea ise ekande, wae bona owa Lebeka. Ko Laele aolikumwa, aosangela ise ekande. 13Aki Labana okaka bosako wa Yakoba, bona owa nkana ekande, aolikumwa okumana lʼende, aololingʼekofi, aolosambela la baiser, ko aoloyela ndʼilombe ikande. Ko Yakoba aosangela Labana baoyiʼane bauma. 14Ko Labana aolokela, “We ole nsosolo weseʼokami la wunyu bokami!” Ko Yakoba aoyala lʼende nsanza emoko.
15Ko Labana aolokela, “Kamba onsaela o mpampa, la ncina wae ole eoto ekami? Onsangele bofuto boe emʼokofuta.” 16Labana aki lʼana bʼamato bafe: lina ja owa nsomi wae Lea; ko lina ja owʼakuka Laele. 17Lea aki lʼaiso lontenga, lolo Laele aki la lituka, ko la jonge jʼolotsi. 18Yakoba aolanga Laele, ko aokela, “Njifokosaela mbula nsambo ndʼeloko ea Laele, bona oke owʼakuka.” 19Labana aokela, “La nkokayʼende, la njokaya bontʼonkina ende, omeka wae nkokayʼende. Yalaka lʼemi.” 20La ngoko Yakoba asalaki mbula nsambo ndʼewelʼea Laele, ko mbulʼiko yoyalemʼelʼende nga betso nkʼouke ndʼewelʼea lolango lokiʼndʼolangaka Laele.
21Ko Yakoba aokela Labana, “Onkaya waji okami wae ndotswʼelʼende, ele mbula ikami yokoka.” 22Ko Labana aotakanya banto bauma ba wijiʼoko, ko aolambʼelambo. 23Lʼokolo aokola bona okae Lea, ko aoloyela ele Yakoba, ko Yakoba aolotswʼelʼende. 24Ko Labana aokaya bona okae Lea Zilepa, bosali okae owʼomoto, wete ayalebosali owa Lea. 25Ko la nkesa, bala aki nko Lea mo! Ko Yakoba aokela Labana, “Joi fine liki wʼonkeefaka na? Neikosaela we ndʼeloko ea Laele? Onkakatanya ngone lae?” 26Labana aolokela, “Ndʼese ekiso ntalikelamaka ngoso, wete balekya owʼakuka nda liala nda joso ja owa nsomi. 27Siza eyenga eʼone, mpanga tokokaya onʼonkina ndʼeloko ea bosala boe wʼonsaela imo mbula nsambo.” 28Yakoba akelaki ngoko; asizaki eyenga ea Lea, nkako Labana aolokaya bona okande Laele wae ayale waji okande. 29Labana aokaya Laele Bila, bosali okae owʼomoto wae ayale bosali owa Laele. 30Ko Yakoba aolotswʼele Laele; ko eefe ekiʼndʼokaka Laele eolekola eko ekiʼndʼokaka Lea, ko aosala imo mbula nsambo ndʼeloko ekande.
31Aki Yawe enaka wae Lea aotonama, aolokaya liota wa aote bana, lolo Laele aki ekomba. 32Ko Lea aofoswa jemi, ko aotaki bona owa jende; ko aolilʼende lina Lubena; ekiʼndʼokelaka, “Yawe aolendʼelo endenʼemi; aeyoko bome okami ifondanga nsosolo.” 33Ko aofoswa lenkina jemi, ko aotaki bona owa jende. Ko aokela, “Yawe ankaaki bonʼone ekiʼndʼokaka wae ntonamaki.” Ko aolila bonʼoko lina Simona. 34Ko aofoswa lenkina ko aotaki bona owa jende, ko aokela, “Aeyoko bome okami ifoamana lʼemi, ndʼewelʼekiʼmʼootelakʼende bana bʼaende basato.” Ndʼewelʼeko aotangema Lewi. 35Lenkina aofoswa jemi, ko aotaki bona owa jende, ko aokela; ‘Aeyoko njomemya Yawe.” Ndʼewelʼeko aolilʼende lina Yuda. Nkako aolambya loota.
Currently Selected:
Toango 29: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
