Toango 28
28
Yakoba alota nda Mesapotamia. Liloto ja eundelo
1Ko Yisaka aoleta Yakoba, ko aolosakela bokako wa swa, ko aoloaka o mbaaka wae, “Tokolake waji limʼele bana ba Kanana. 2Emala, kenda nda Padanalama, ndʼola wa Betwele, ise ea nyango eke, ko kola waji limʼele bana ba Labana, nkana ea nyango eke. 3Kela Nzakomba ea mpamba euma akosakele bokako wa swa, akofuza, ko akonyengoza wae oyaleme etukuluku ea bantʼauke. 4Kela akokaya bokako wa swa boki Abalayama, wae we la banaʼake; kela oatʼolo bokili boyala we bofaya, boki Nzakomba okaaka Abalayama!” 5Nkʼelengʼeko Yisaka aotoma Yakoba, ko ende aocwa nda Padanalama ele Labana, Bo-Alama, bona owa Betwele, nkana ea Lebeka, nyango ea Yakoba la Esau. 6Ko Esau aolena wae Yisaka aosakela Yakoba bokako wa swa, ko aolotoma nda Padanalama, wae akole waji limʼeko; ko lʼakiʼndʼosakelaka bokako wa swa, aoloaka o mbaaka ngone, “Tokolake waji limʼele bana ba Kanana,” 7ko aolena wae Yakoba imezaki lotomo jʼise ekae la ja nyango ekae, ko ende aocwa nda Padanalama. 8Aki Esau enaka wae bamato ba Kanana ntabasimamʼolotsi la Yisaka ise ekae, 9Esau aocwa ele Yisamaele, ko aokokya ele baaji bakiʼndʼoataka, o Malata, nkana ea Nebayota, bona owa Yisamaele, bona owa Abalayama, wae ayale waji okande.
10Yakoba aolimana Bela-Seba, ko aocwa wiji wa Alana. 11Ko aokita ndʼitenela loswele, ko aoyalʼeko botsʼoko, eki jefa ilaka. Aokola ekenje emo, aolilʼeko ndʼase bʼotsa, ko etamaki eko. 12Ko aolota liloto, ko bala, eundelo ekemi ndʼokili, ko nsonge eʼeko eokita nda loola; ko bala, bikima bia Nzakomba bayounde ko bayokitele ndʼeko. 13Ko bala, Yawe akemi ndʼaliko bʼeundelo, ko ende aokela, “Emi nde Yawe, Nzakomba ea ise eke Abalayama, ko la Nzakomba ea Yisaka. Njifokokaya we lʼana bake bokili bondetama we. 14Bana bake bifofula bauke ngole biucu biʼokili, ko wifofanzwa nda ouest, la nda est, la nda nord la nda sud; ko tolongo touma tʼokili bifosakema bokako wa swa la we ko lʼana bake. 15Bala, emi nde la we, ko njifokofonga nda biiji beuma becwa we, ko njifokoyela lenkina ndʼesʼene; elʼemi mpaokocika elaka nko njokela joi likiʼmʼokosangelaka.” 16Ko Yakoba aoetswa limʼaisilo bakande, ko aokela, “Yawe ale ndʼitenela ine nsosolo, ko emi ncea nye.” 17Ko aoanga, aokela, “Itenelʼine booma mo! Itenelʼine ile nkʼilombe ya Nzakomba, ko ile nko wiso wa loola.” 18Ko Yakoba aoetswa la nkesa mongo, ko aokola ekenje ekiʼndʼilaka ndʼase bʼotsaʼokande, ko aolemyʼeko nga likonji, ko aolutezʼauta ndʼeko. 19Ko aotanga lina jʼitenelʼiko Bete le; lolonde nda joso lina ja bonangʼoko liki Luza. 20Ko Yakoba aosimba nsimbi, aokela, “Ayaka Nzakomba ayala lʼemi, ko amponga nda lokendo lone locwʼemi, ko ayaka ankaya toma ta ndala ko la bito bia ndalota, 21ko ayaka njuta la kuci ndʼilombe ya ise ekami, kela Yawe ayale Nzakomba ekami. 22Ko ekenje ene ekiʼmʼemyaka nga likonji ifoyalema ilombe ya Nzakomba; ko lima liaci lie wʼonkaya, njifuteya ele we liondo limoko lima wangi baondo jom.”
Currently Selected:
Toango 28: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
