Olelo 40
40
Emyelo ea Tabernacle
1Koko Yawe aotefela la Mose, akela, 2“Nda mbile ea joso ea nsanza ea joso emya tabernacle ea ilombe ya bito yʼetakano. 3Ko ila ndʼeko sanduku ea elembelo eʼokolo, ndʼafeka bʼeto ea bolelo. 4Ko yela mesa, ko tanda belemo bele ndʼeko o ntatanda; ko otsweya ilelo eʼitswa, ko bambola totswa tʼeko. 5Ko ila nkinda ea mbeka ea baimi ba mpimbo ba ntatumba ea wolo ndongama la sanduku ea elembelo eʼokolo, ko ila eto ea lokombo ea wiso nda tabernacle. 6Ko ila nkinda ea mbeka ea ntatumba nda joso ja wiso wa tabernacle ea ilombe ya bito yʼetakano. 7Ko ila saani ndatsa ilombe ya bito yʼetakano la nkinda ea mbeka, ko ilʼasi nda saani. 8Ko eza lokombo ja loanza kio samanyu, ko kakya eto ea wiso ea lokombo ja loanza. 9Ko kola bauta ba loiso, ko bisa tabernacle ko la toma tolʼeko touma, ko buzʼeko ndʼoeko, la belemo bia eko beuma: ko eko eyaleme boeko. 10Ko bisa nkinda ea mbeka ea ntatumba, ko la bijwa biʼeko biuma, ko buza nkinda ndʼoeko: ko nkinda ea mbeka eyaleme boeko wa beeko. 11Ko bisa saani lʼemaelo ea eko, ko buzʼeko ndʼoeko. 12Koko yela Alona la banaʼakae bʼaende, nda wiso wʼilombe ya bito yʼetakano, ko wʼaokyʼasi. 13Ko lotsa Alona benkoto bia boeko; ko wʼoise loiso, ko wʼouza nda boeko, wae ankambelʼemi bolemo wa nkanga. 14Ko yela banaʼakae bʼaende, ko wʼalotsʼiyo benkoto: 15ko wʼaise, ngoki wʼoisaka ise ekiyo, wete iyo bankambelʼemi bolemo wa nkanga: koko loiso lokʼiyʼoisamaka loyalʼelʼiyo loiso ja nkanga ea seko nda biotswelo bikiyo biuma.”
16Mose akelaki ngoko: akelaki elengʼeki Yawe osisakʼende. 17Koko joi jokelama nda nsanza ea joso ea mbula ea ife, nda mbile ea joso ea nsanza eko, tabernacle eotongama. 18Mose aolemya tabernacle, ko aolambya bisumyelo biʼeko, ko aosumya babaya, ko aolotsweya belenga biʼeko, ko aosumya bakonji bʼeko. 19Ko aotanda ekukelo ndʼaliko ba tabernacle; ko aolila ekukelo emo ndʼaliko bʼeko: ngoki Yawe osisaka Mose. 20Ko aokola elembelo eʼokolo, ko aokomʼeko nda sanduku, ko aolilʼelenga nda sanduku, ko aolila mbata eʼisei ndʼaliko nda sanduku: 21ko aoyela sanduku nda tabernacle, ko aokakya eto ea bolelo, ko aolisa sanduku ea elembelo eʼokolo ndiisa; ngoki Yawe osisaka Mose. 22Ko aolila mesa ndʼilombe ya bito yʼetakano, nda wiji wa tabernacle bondelela nord, ndanza bʼeto ea bolelo. 23Ko aotanda mampa ea mesa o ntatanda nda joso ja Yawe; ngoki Yawe osisaka Mose. 24Ko aolila ilelo eʼitswa ndʼilombe ya bito yʼetakano, ndongama la mesa nda wiji wa tabernacle bondelela sud. 25Koko aoambola totswa nda joso ja Yawe; ngoki Yawe osisaka Mose. 26Ko aolila nkinda ea mbeka ea wolo ndʼilonibe ya bito yʼetakano nda joso ja eto ea bolelo: 27ko aotumba baimi ba mpimbo yʼolotsi ndʼeko; ngoki Yawe osisaka Mose. 28Ko aokakya eto ea lokombo ea wiso nda tabernacle. 29Koko aolemya nkinda ea mbeka ea ntatumba nda wiso wa tabernacle ea ilombe ya bito yʼetakano, ko aolekya mbeka ea ntatumba la mbeka ea farine ndʼeko; ngoki Yawe osisaka Mose. 30Ko aolemya saani ndatsa ilombe ya bito yʼetakano la nkinda ea mbeka, ko aolilʼasi ndʼeko wae boke. 31Ko Mose la Alona la banaʼakae bʼaende basolʼakataʼakiyo la bakakaʼakiyo limʼeko; 32a iyʼotswa ndʼilombe ya bito yʼetakano lʼa iyʼotutama nda nkinda ea mbeka, bokakʼasi; ngoki Yawe osisaka Mose. 33Koko aoleza lokombo ja loanza ja tabernacle ko la nkinda ea mbeka kio samanyu, ko aolemya eto ea lokombo ea wiso wa lokombo ja loanza. Elengʼeko Mose aosiza bosala boko.
Jilangi ja Yawe
(Bea 9.15-23)
34Nkako litute liko jokuka ilombe ya bito yʼetakano, ko jilangi ja Yawe jokama nda tabernacle. 35Ko Mose ntakuseya jotswa ndʼilombe ya bito yʼetakano ndʼewelʼeki litute oyalaka nkʼeko, ko jilangi ja Yawe jokama nda tabernacle. 36Koko aki litute ulezamaka limʼaliko ba tabernacle, bana ba Yisalaele baokenda o nkakenda, nda nkendo ikiyo iuma: 37lolo nkina litute ntajulezama, iyo ntabakenda elaka nko mbile endulezama liko. 38Eki litute ja Yawe joyala nda tabernacle la mbile, ko tsa toki nda liko lʼotso, ndʼaiso ba ilongo ya Yisalaele iuma, nda nkendo ikiyo iuma.
Currently Selected:
Olelo 40: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
