Olelo 38
38
Etongelo ea nkinda ea mbeka la saani ea kongo
(Ol 27.1-19; 30.18)
1Koko aokela nkinda ea mbeka ea ntatumba la babaya ba acacia: botale wʼeko wete coudées itano, ko bonene wʼeko o coudées itano, bekala bekʼenei jeza limoko fio; ko lisange ja nkinda wae coudées isato. 2Ko aokela beongo ndʼakono bakʼanei ba nkinda ea mbeka; beongo la nkinda mongo o mbamana: ko aokuka beko la kongo. 3Ko aotula belemo bia nkinda ea mbeka beuma, la mpoke, la njongo, la bijwa, la nkofo ya nyama, la bitombelo bia tsa: aotula toma toko touma la kongo. 4Ko aokela inyongela ya kongo ya nkinda ea mbeka, ndʼase ba bomumo bole nda nkinda kio samanyu ndʼase, iyala ndʼatei ba bompanje wa nkinda ea mbeka. 5Ko aotula bakoko banei ba inyongela ya kongo ndʼakono bakʼanei, wae biotsweyelo bia belenga. 6Aosenga belenga bia acacia, ko aokuka beko la kongo. 7Ko aolila belenga beko ndʼakoko bale ndʼempanje bia nkinda ea mbeka, wete etombame la beko; aotonga nkinda ea mbeka la babaya kio samanyu, ko ndʼetei o mpampa.
8Koko aotula saani ea kongo, ko lʼemaelo ea saani o la kongo, wae kongo ya bentala biʼamato batakanaki nda wiso wʼilombe ya bito yʼetakano.
9Koko aokela lokombo ja loanza wiji wa sud, bito bia nkombela bia lin eʼolotsi, botale wa biko wete coudées bonkama: 10bakonji ba biko o ntukʼife ko la bisumyelo biʼako bia kongo ntukʼife; ko la nkofo ya bakonji la biakelo biʼako bia argent. 11Ko la bito bia wiji wa nord, botale wa biko coudées bonkama, na bakonji ba biko o ntukʼife, la bisumyelo biʼako bia kongo o ntukʼife; ko la nkofo ya bakonji ko la biakelo biʼako bia argent. 12Ko nda ouest, bito bia nkombela botale wa coudées ntuku itano, la bakonji jom, la bisumyelo biʼako jom; ko la nkofo ya bakonji ko la biakelo biʼako bia argent. 13Ko la bito bia wiji wa est, botale wa biko coudées ntuku itano. 14Bito bia nkombela bifanyema nda wijʼomoko wa wiso biki coudées jom lʼitano; bakonji ba bito basato, ko la bisumyelo biʼako bisato: 15ko nda wijʼonkina wa wiso o ngoko: wiji la wiji wa wiso wa lokombo ja loanza bito bia nkombela coudées jom lʼitano; la bakonji ba bito basato, ko la bisumyelo biʼako bisato. 16Bito bia nkombela bia lokombo ja loanza kio samanyu bikelamaki la lin eʼolotsi. 17Ko bisumyelo biʼakonji bitulamaki la kongo; ko nkofo la biakelo biʼako bitulamaki la argent; ko bikukelo bia bakonji bikukamaki la argent; ko bakonji bauma ba lokombo ja loanza balingamaki lʼargent. 18Ko eto efanyema nda wiso wa lokombo ja loanza, esambema la bosambi owa bifoya, la bléu, la pourpre, la écarlate, la lin eʼolotsi; botale wʼeko wete coudées ntukʼife, la lisange jʼeko wae coudées itano, elengʼele lisange ja bito bia nkombela bia lokombo ja loanza. 19Ko bakonji bʼeko o banei la bisumyelo biʼako binei, bia kongo; nkofo yʼako ya argent, ko ekukelo eʼakuka ba bakonji ko la biakelo biʼako, nko argent. 20Ko mpiko ya tabernacle, la ya lokombo ja loanza kio samanyu, ikʼiuma iotulama la kongo.
Boanji wʼaumba ba tabernacle
21Bone wae boanji wʼaumba ba tabernacle, wete tabernacle ea elembelo eʼokolo, ngoki bako oandemaka, elengʼele bosise wa Mose, wae bolemo wa Ba-Lewi, la likata ja Itamala, bona owa Alona, nkanga. 22Ko Besalele bona owa Uli, bona owa Ulu, owa booci wa Yuda, aokela toma touma toki Yawe osiselaka Mose. 23Ko Oliaba, bona owa Aisamaka, owʼooci wa Dana, bocimi owa bikenje, bosali owa losifya, ko lʼosambi owa bifoya nda bléu, la pourpre, la écarlate, la lin eʼolotsi, aki lʼende.
24Wolo bouma botulamaki ndʼelemo bia bosala wʼkenela yʼoeko bouma, wete wolo bolekyamaki nganji talents ntukʼife lʼibwa, la basekele benkama nsambo la ntukʼisato, elengʼele sekele ea itenela yʼoeko. 25Ko argent ekʼiyo baandemaki ndʼetakano, eki talents bonkamʼomoko, la basekele nkoto la benkama nsambo la ntuku nsambo lʼatano, elengʼele sekele ea ntena ea boeko: 26wengiʼonto wengi bekaya, wete ete i ea sekele, elengʼele sekele ea ntena eʼoeko, ndʼewela ea wengiʼonto olekyamaki elʼiyʼaandema bakita mbula ntukʼife lʼalekanʼiko, banto nkoto benkamʼotoa la nkotʼisato, la benkamʼetano lʼanto ntukʼitano. 27Ko argent eko talents bonkama bomoko utezamaki wae bakele bisumyelo biʼakonji ba itenela yʼoeko ko la bisumyelo biʼakonji ba eto ea bolelo; bisumyelo biʼakonji bonkama la talents ya argent bonkama, wengi talent wengi esumyelo. 28Ko basekele ba argent nkoto, la benkama nsambo, la ntuku nsambo lʼatano, aotula lʼeko nkofo yʼakonji, ko aokukʼakuka ba bakonjiʼako, ko aotula biakelo ndʼewela eʼako. 29Ko kongo ea nganji eki talents ntuku nsambo, la basekele nkotʼife la benkamʼenei. 30Ko aotula lʼeko bisumyelo biʼakonji bia eto ea lokombo ja loanza ja ilombe ya bito yʼetakano, ko la nkinda ea mbeka ea kongo, lʼinyongela ya kongo ya nkinda, ko la belemo bia nkinda ea mbeka beuma, 31ko la bisumyelo biʼakonji ba lokombo ja loanza kio samanyu, ko la bisumyelo biʼakonji ba wiso wa lokombo ja loanza, ko la mpiko ya tabernacle ko la mpiko iuma ya lokombo ja loanza kio samanyu.
Currently Selected:
Olelo 38: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
