Olelo 37
37
Etongelo ea sanduku ea boeko, la mesa, lʼilelo ea itswa, la nkinda ea baimi
(Ol 25.10-40; 30.1-5, 22-38)
1Koko Besaiele aotonga sanduku eʼabaya ba acacia: botale wa sanduku wete coudées ife lʼete i, ko bonene wʼeko coudée emoko lʼete i, ko la lisange jʼeko coudée emoko lʼete i: 2ko aokukʼeko la wolo wa soto ndʼetei la ndʼanza, ko aolila boelo wa wolo kio samanyu. 3Ko aotula bakoko ba wolo banei, ndʼakono bakʼanei; bakoko bafe nda wijʼomo ko bakoko bamʼafe nda wijʼomo wa sanduku. 4Ko aosenga belenga bia acacia, ko aokuka beko la wolo. 5Ko aolotsweya belenga ndʼakoko nda biiji biko bife bia sanduku, wete sanduku etombame la beko. 6Koko aotula mbata eʼisei ea wolo wa soto: botale wʼeko coudées ife lʼete i, ko bonene wʼeko coudée emoko lʼete i. 7Ko aotula ba keluba ba wolo bafe; aotulʼako lʼetulelo ea ntutumya nda nsuko ikʼife ya mbata ea isei; 8keluba emoko nda nsuko emoko, ko keluba emo nda nsuko enkina: mbata ea isei la bakeluba bakʼafe nda nsuko ikʼife baotulama lʼetulelo emoko. 9Ko bakelubaʼako baosembola bafafuʼakiyo ndʼaliko, baokuka mbata ea isei lʼafafu bakiyo, la bilongi bikiyo bialanaki; bilongi bia bakeluba biolelela mbata ea isei.
10Koko aotonga mesa ea babaya ba acacia: botale wʼeko wete coudées ife, ko bonene wʼeko o coudée emoko, ko lisange jʼeko coudée emoko lʼete i: 11Ko aokukʼeko la wolo wa soto, ko aolila boelo wa wolo ndʼeko kio samanyu. 12Ko aolila bomumo ndʼompempe kio samanyu bonene nga likata, ko aolila boelo wa wolo ndʼomumoʼoko kio samanyu. 13Ko aotula bakoko banei ba wolo ba mesa, ko aolila bakokoʼako ndʼakono bakʼanei bale nda bekolo bekʼenei bia mesa. 14Bakokoʼako baolilama tute la bomumo, wae biotsweyelo bia belenga betombama mesa. 15Ko aosenga belenga beko bia acacia, ko aokuka beko la wolo, wete mesa etombame la beko. 16Ko aotula belemo bele nda mesa, wae saani ya mesa, ko la totoko, ko la bikala, ko la bijwa bia nduteza; aotula belemo beko la wolo wa soto.
17Koko aotula ilelo ea itswa ea wolo wa soto; aotula ilelo eʼitswa lʼetulelo ea ntutumya, o lʼemaelo la bombimbi; la tokakala, lʼamuka la ndobya yʼeko o nkʼetulelo emoko: 18eko ele la bitafe botoa biokafwana lima bempanje biʼeko; bitafe bisato bia ilelo eʼitswa lima wijʼomo, ko la bitafe bisato bia ilelo eʼitswa lima wijʼonkina: 19tokakala tosato totulama ngole lobya ja amande ndʼetafe emoko, la limuka la lobya; ko la tokakala tosato totulama ngole lobya ja amande ndʼetafe emo, la limuka la lobya; bitafe biko botoa biokafwana lima ilelo eʼitswa elengʼeko. 20Ko ndʼilelo mongo eʼitswa tokakala tonei totulama ngole ndobya ya amandes, lʼamuka, la ndobya ya toko: 21ndʼase ba bitafe bife limuka litulama ndʼetulelo emoko la bitafe biko, ko ndʼase ba bitafe bimo bife limuka litulama ndʼetulelo emoko la bitafe, ko bitafe biko botoa biokafwana limʼilelo eʼitswa. 22Lʼamuka la bitafe baotulama nkʼetulelo emoko; ilelo eʼitswa euma eoyalema bolemoʼomoko botulama lʼetulelo ea ntutumya la wolo wa soto. 23Ko aotula totswa ta ilelo eko nsambo, ko la bekaci biʼeko, ko la saani yʼeko la wolo wa soto. 24Aotula eko euma, ko la bifeko biʼeko biuma la talent emoko ea wolo wa soto.
25Koko aotonga nkinda ea mbeka ea baimi la babaya ba acacia: botale wʼeko coudée emoko, ko bonene wʼeko o coudée emoko; bekala bekʼenei o fio; ko lisange jʼeko coudée ife: beongo biʼeko beosengama mbamana la nkinda mongo. 26Ko aokukʼeko la wolo wa soto, lʼaliko lʼempanje beuma kio samanyu, ko la beongo biʼeko; ko aokela boelo wa wolo ndʼeko kio samanyu. 27Ko aotula bakoko ba wolo bafe ndʼase ba boelo wʼeko, ndʼakono bakʼafe ndʼempanje bekʼefe, wae biotsweyelo bia belenga bia ntatomba ea nkinda eko. 28Ko aosenga belenga beko bia acacia, ko aokuka beko la wolo.
29Koko aokela bauta ba loiso ba boeko, ko la baimi bʼolotsi ba mpimbo ba ntatumba, elengʼele bosala wa bosanganyi owa mpimbo.
Currently Selected:
Olelo 37: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
