Olelo 35
35
Nganji ea ntatonga ea Tabernacle
(Ol 25.1-9; 39.32-43)
1Koko Mose aotakanya etakano euma ea bana ba Yisalaele, ko aolakela, “Bane wete baoyi baki Yawe osisaka wae inyo lokelʼako. 2Bosala bosalema nda bembile botoa, lolonde nda mbile ea nsambo, eko eyalʼelʼinyo mbile ea boeko, sabata ea jomo ja wai ele Yawe: bonto nko loswele osala bosala nda mbilʼeko aomame. 3Taloambolake tsa ndʼeyalo bekinyo nda mbile ea sabata nye.”
4Ko Mose aotefela la etakano ea bana ba Yisalaele euma, akela, “Line wete joi liki Yawe osisaka, akela, 5Kola limʼelʼinyo mongo nganji ele Yawe; olanga ndʼotemaʼokae, kelʼende ayelʼeko, wete nganji ea Yawe; wolo, la argent, la kongo, 6la bléu, la pourpre, la écarlate, la lin jʼolotsi, la nkunza ya nta: 7la bikoto bia mpate yʼaende bilinzama nda boko wa ngola, la bikoto bia baenge, la babaya ba acacia; 8ko lʼauta ba itswa, la baimi ba bauta ba mbaisa la ba mpimbo eʼolotsi; 9ko la bikenje bia onyx, la bikenje bindilama nda efodo, la nda ekukelo ea ntolo.
10“Kela wengiʼonto ole lʼotema wa wanya elʼinyo aye, ko akele belemo beuma beki Yawe osisaka; 11wete tabernacle lʼilombe ya bito yʼeko, lʼekukelo ea eko, ko la nkofo, ko la babaya, ko lʼelenga, ko la bakonji, ko la bisumyelo biʼeko; 12ko la sanduku, lʼelenga biʼeko, ko la mbata ea isei, ko lʼeto ea bolelo; 13ko la mesa, lʼelenga biʼeko, ko la bijwa biuma, la mampa yʼoeko; 14ko lʼilelo eʼitswa, la bijwa biʼeko, ko la totswa tʼeko, ko lʼauta ba itswa; 15ko la nkinda ea baimi, la belenga biʼeko, ko lʼauta ba mbaisa, ko la mpimbo eʼolotsi eʼaimi ba ntatumba, ko lʼekuke ea wiso, wae wiso wa tabernacle; 16ko la nkinda ea mbeka ea ntatumba, lʼinyongela ya kongo, la belenga, la bijwa biʼeko beuma, ko la saani lʼemaelo eʼeko; 17ko la bito bia nkombela bia lokombo ja loanza, la bakonji ba biko la bisumyelo biʼako, lʼekuke ea wiso wa lokombo ja loanza; 18ko la nsete ya tabernacle, la nsete ya lokombo ja loanza, la bekulu bia iko; 19ko fa benkoto bia nsasamba eʼolotsi bia nkakamba eʼolemo ndʼitenela yʼoeko, benkoto bia Alona nkanga bia boeko, lʼenkoto biʼanaʼakae bʼaende, be iyʼokambʼolemo wa nkanga.”
20Ko bana ba Yisalaele bʼetakano euma baolimana lima joso ja Mose. 21Ko baoya, wengiʼonto la ndokoza, la wengiʼonto oki botema oetolaka, la wengiʼonto olangaki, ko baoyela nganji ya Yawe, ya ilombe ya bito yʼetakano, ko lʼelemo bia iko beuma, ko lʼenkoto bia boeko. 22Ko baoya, baende la bamato, wae iyʼalangaki lʼotema, ko baoyela bapengele, lʼakoko bʼatoi, la mpete yʼesai yʼesike, la konga ya mbo, bekombe bia wolo beko beuma; wete wengiʼonto olekyaki nganji ea wolo ele Yawe. 23Ko wengiʼonto oki la bito bia bléu, la pourpre, la écarlate, la lin eʼolotsi, la nkunza ya nta, la bikoto bia mpate yʼaende bilinzama nda boko wa ngola la bikoto bia baenge, aoyelʼelemoʼeko. 24Wengiʼonto olekyaki nganji ya argent la kongo aoyela nganji ea Yawe; ko wengiʼonto oki la babaya ba acacia bandeji lʼolemo wa ekambelo eko, aoyelʼako. 25Koko bamato bauma baki lʼete ma bia wanya baofomʼeto lʼakataʼakiyo, ko baoyela bito bikiʼyʼofomaka, bia bléu, la bia pourpre, la bia écarlate la lin eʼolotsi. 26Ko bamato bauma balokozaki ko baki la wanya, baofomʼeto ea nkunza ya nta. 27Ko ba-mpifo baoyela bikenje bia onyx, ko la bikenje bindilama nda efodo, la ndʼekukelo ea ntolo; 28ko la baimi, ko lʼauta ba itswa, ko la bauta ba loiso, ko la ba mpimbo eʼolotsi ea baimi. 29Bana ba Yisalaele baoyela nganji ele Yawe la ndalanga; wengiʼonto jende lʼomoto, olokozaki ndʼotemaʼokande wae ayele nganji ya bosala bouma, boki Yawe osisaka wete bokelame la likata ja Mose.
Etelo ea Besalele la Oliaba
(31.1-11)
30Koko Mose aokela bana ba Yisalaele, “Bala, Yawe aoleta Besalele, bona owa Uli, bona owa Ulu, owa booci wa Yuda la lina; 31ko aoloyoza lʼolimo wa Nzakomba, nda wanya, nda jekela, la nda njea, la nda nkakamba eʼelemo bia bilenge la bilenge; 32ko ndʼangelo ea belemo bia losifya, wae atule nda wolo, la nda argent, la nda kongo, 33la nda nsasenga ea bikenje bia mbaaka, la nda nsasenga ea babaya, Wete asale ndʼelemo bia bilenge biuma. 34Ko aolila lokai ndʼotemaʼokande wae alake lilako, ende la Oliaba, bona owa Aisamaka, owʼooci wa Dana. 35Ende aolayoza la wanya wʼete ma, wae basale besala bia bilenge biuma, bia bociuni owʼakota nda bikenje, bia bosali owa losifya, ko la bia bosambi owa bifoya nda bléu, la nda pourpre, la nda écarlate, la nda lin eʼolotsi, ko la bia bofomi owa bito, wete biʼanto bakambʼelemo bia bilenge biuma, ko lʼiyʼandanga biango bia belemo bia losifya.”
Currently Selected:
Olelo 35: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
