Olelo 34
34
Bitanda bife biʼaeyoko
(B. biʼaf 10.1-5)
1Koko Yawe aokela Mose, “Senga bitanda bife bia bikenje elengʼeki bitanda biki joso, ko emi njifokota nda bitanda biko baoyi baki nda bitanda biki joso, biki wʼoolaka. 2Ko elama la nkesa, ko younde la nkesa nda ngongo ea Sinai, ko emalʼeko nda joso likami nda nsonge ea ngongo. 3Nkʼonto oye la we, ko nkʼonto ondenya nda ngongo euma; ko mpate la ngombo italeke toma nda joso ja ngongo eko.” 4Ko aosenga bitanda bife elengʼeki bitanda biki joso; ko Mose aolemala la nkesa mongo, ko aounda nda ngongo ea Sinai, ngoki Yawe osisakʼende, ko aotomba bitanda biko bife nda likata likande. 5Koko Yawe aokitela nda litute, ko aolemalʼeko lʼende, ko aolongoza lina ja Yawe.
6Ko Yawe aoleka nda joso likande, aosanga, “Yawe, Yawe, Nzakomba okaka lisei ko lʼoya, ondokaka nkele la lokuto, ole lʼomengo wa liota la nsosolo; 7ayofongele banto nkoto-nkoto isei, ayotungolʼanto limʼobe lʼeseketano lʼaoyiʼobe: ko afaoyengolʼiyo bakelakʼobe likambo o nye; ayongwanya bana bobe boki baise, ko la bana ba bana, ele eotswelo ea bisato la binei.” 8Nkakoyoko, Mose aosunyʼotsaʼokae ndʼamoci, koaoosama. 9Ko aokela, “O Nkolo, nkinʼemi njotanʼoya ndʼaisoʼakawe, nkoonda, kela Nkolo akende ndʼetei ekiso; ele banto bane bale botsa bolo: ko ototungole limʼobeʼokiso la baoyiʼobe bakiso, ko otambe wete toyale lisango likawe.”
Bokolo bolembama lenkina
(Ol 23.14-19; B. biʼaf 7.1-5; 16.1-17)
10Yawe aokela, Bala, ndembe bokolo: emi njifokela belemo bia nkakamwa nda joso jʼantʼakawe bauma, beko betakelamaka ndʼokili bouma, lʼele booci bomo: ko bantʼauma bakengama we, bifena bolemo wa Yawe, ele joi li emʼokela la we life joi ja booma.
11“Eonga lokanela joi likosisʼemi mbilʼene: bala, nditanya Bo-Amola, la Bo-Kanana, la Bo-Ete, la Bo-Peliza, la Bo-Iwa, la Bo-Yebusa nda joso like. 12Fonga oyaesanya we mongo, nyango ofolemba bokolo lʼanto bayala ndʼese ee wʼocwa, nyangʼiyo bafoyalema ngʼilonga nda ntoku ekinyo: 13Lolo lofita nkinda ikiyo ya mbeka, ko loola baidolʼakiyo, ko lumba bifoya bikiyo. 14Lolo we totataanelake nzakomba enkina: ncina wae Yawe, ole la lina JUA, ale Nzakomba ea jua: 15nyango ofolemba bokolo lʼanto bayala ndʼese eko ko iyo bacwʼokimanaka la nzakomba ikiyo, ko balekya mbeka ele nzakomba ikiyo, ko omo aketa we ko ola toma tokae ta mbeka; 16ko nyango ofengela banaʼake bʼaende baaji limʼele banaʼakiyo bʼamato ko banaʼakiyo bʼamato bacwʼokimanaka la nzakomba ikiyo, ko bafungya banaʼake bʼaende wete iyo baewʼokimanaka la nzakomba ikiyo ngoko.
17“Totulake nzakomba ya nduteza nye.
18“Fonga elambo ea mampa isamba nyango. Leka mampa isamba nyango bembile nsambo ngokiʼmʼokosisaka, ndʼekeke endezama nda nsanza ea Abiba; eki wʼolaka lima Ejipeto nda nsanza ea Abiba. 19Wengi nsomi, iango ya liota, ele wae ekami; ko la nyama ike yʼaende iuma, wete nsomi y a ngombo la mpate. 20Sikola nsomi ea mpunda la bona owa mpate: ko nkina ofolange osikola, buna nkingo ea mpunda eko. Sikola banaʼake bʼaende ba nsomi bauma. Ko nkʼonto ondenya nda joso likami la likata mpampa.
21“Salaka besala nda bembile botoa, lolo nda mbile ea nsambo oma: ndʼekeke ee wʼofusolʼamoci la ndʼekeke ea emukelo, oma jomo. 22Fonga lokanela elambo ea semaines, wae ea bamuka ba joso bʼemukelo ea blé, ko lʼelambo ea etakanyelo mongo nda nsukela ea mbula. 23Wengi mbula, baendeʼake bauma benya nda joso ja Nkolo Nzakomba, Nzakomba ea Yisalaele, bienya besato. 24Elʼemi njifoza baoci bʼanto nda joso like, ko njifofuza bokiji boknyo: ko ae wʼocwa yenya nda joso ja Yawe Nzakomba eke bienya besato nda wengi mbula, nkʼonto okombola bokili bokawe la mposa.
25“Tolekyake balongo ba mbeka ekami la mampa ile la nyango; ko mbeka ea elambo ea Efendelo etacikalake elaka nko nkesa. 26Yela iango ya bamuka ba joso ba bamociʼake ndʼilombe ya Yawe Nzakomba eke. Tokatsake bona owa nta ndʼaele ba nyango.” 27Ko Yawe aokela Mose, “We kotʼaoyiʼane: elʼemi njolembʼokolo la we la Yisalaele elengʼele baoyiʼane.” 28Ko ende aki eko la Yawe bembile ntuku inei la betso ntuku inei; ntala mampa ko ntamelʼasi. Ko aokota baoyi ba elembelo ea bokolo nda bitanda wete beleka jom.
Mose akitela lima ngongo ea Sinai
29Koko aki Mose okitela lima ngongo ea Sinai la bitanda bia elembelo eʼokolo biko bife nda likata likande, Mose ntea wae lofoso jʼelongi ekande jongesa ndʼewela ekiʼndʼotefelaka la Yawe. 30Aki Alona la bana ba Yisalaele bauma ene Mose, bala, lofoso jʼelongi ekae jongesa; ntabatutamelʼende, ekiʼyʼoangaka. 31Ko Mose aolaeta; ko Alona la bingambi biʼetakano baolutʼelʼende: ko Mose aotefela lʼiyo. 32Ko ndʼafeka bana ba Yisalaele bauma baotutama: ko ende aolasisela baoyiʼauma baki Yawe otefelaka lʼende nda ngongo ea Sinai. 33Aki Mose osizaka lotefela lʼiyo, aokukʼelongi ekande lʼekukelo. 34Lolonde aki Mose otswaka nda joso ja Yawe otefela lʼende, aokukolʼelongi ekae, elaka nko aolola; koko aolola, ko aosangela bana ba Yisalaele baoyi bakiʼndʼosisamaka; 35ko bana ba Yisalaele benaki elongi ea Mose, wete lofoso ja elongi ea Mose jongesa; ko Mose aokukʼelongi ekae lenkina lʼekukelo, elaka nko aolotswa wae atefele la Yawe.
Currently Selected:
Olelo 34: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
