Olelo 33
33
Yawe asisa bana ba Yisalaele wae bimane lima ngongo ea Sinai
1Koko Yawe aokela Mose, “Kenda, imanʼendo, we lʼanto baki wʼoyelaka limʼese ea Ejipeto, lokenda ndʼese ekiʼmʼosimbelaka Abalayama, la Yisaka, la Yakoba, nkelaki, Njifokaya banaʼakawe ese ene: 2ko njifotoma ekima ea loola nda joso like; ko emi njifita Bo-Kanana, la Bo-Amola, la Bo-Ete, la Bo-Peliza, la Bo-Iwa, la Bo-Yebusa 3eko ele wae ese efula lʼaele la mpako: ncina wetʼemi mpaocwa ndʼetei ekinyo, elʼinyo banto ba botsa bolo: nyango mpofitʼinyo nda mboka.”
4Ko aki banto okaka baoyiʼane bʼobe, baolela: ko nkʼonto olota bekombe bekande. 5Koko Yawe aokela Mose, “Sangela bana ba Yisalaele, Inyo lole banto ba botsa bolo; nga nkenda ndʼetei ekinyo, njifofitʼinyo inyo o la moment emoko: ndʼewela eko, lolotola bekombe bekinyo, wete njea joi li emʼokokeela.” 6Ko bana ba Yisalaele baolotola bekombe bekiyo, ntabalota beko lima ngongo ea Olebe.
Ilombe y a bito yʼetakano
7Mose aolimola ilombe ya bito ko aolemyʼiko lenkina ndʼanza ba etakanelo eʼanto, ndʼesi limʼetakanelo; ko aotangʼiko, ilombe ya bito yʼetakano. Ko wengiʼonto ondasaki Yawe aocwa ndʼilombe ya bito yʼetakano, iki ndanza bʼetakanelo. 8Aki Mose ocwaka wae otswa ndʼilombe ya bito, bantʼauma baolemala, wengiʼonto nda wiso wʼilombe ikande ya bito, ko baolenda Mose, elaka nko aolotswa ndʼilombe ya bito. 9Aki Mose otswa ndʼilombe ya bito, likonji ja litute jokitela, ko jolemala nda wiso wʼilombe ya bito, ko Yawe aotefela la Mose. 10Ko bantʼauma benaki likonji ja litute jemi nda wiso wʼilombe ya bito: ko bantʼauma baolemala ko baomemya imemya, wengiʼonto nda wiso wʼilombe ikae ya bito. 11Koko Yawe aotefela la Mose bomwa lʼomwa, elengʼele bonto atefela la lilongo likae. Ko aoluta lenkina ndʼetakanelo: lolo bosali okae Yoswa, bona owa Nuna, bosekota, ende ntimana lima ilombe ya bito.
Yawe aeikʼelaka wete ifoyalema la bantoʼakande
12Mose aokela Yawe, “Bala, onkelʼemi, Tomba bantʼane; ko ntonsangela oe wʼotoma lʼemi. Lolonde okelaki, Njokea we o la lina, ko otanʼoya ndʼaisoʼakami. 13Aeyoko, ndʼewelʼeko, nkoonda, nkina njotanʼoya ndʼaisoʼakawe, ontumya mboka ike wae nkea we, wete ntane boya ndʼaisoʼakawe: kanela wae boociʼone bole banto bake. 14Ko ende aokela, Emi mongo njifocwa la we, ko njifokomya jomo. 15Ko aolokela, Nga we mongo ofoewe lʼemi, tototo bake limʼendo. 16Banto bea wete njotana boya ndʼaisoʼake, emi la bantoʼakawe la na? Afa wae ocwa lʼiso, ko elengʼeko tocikwana, emi la bantoʼakawe, la bantʼauma bale ndʼokili?”
17Koko Yawe aokela Mose, “Njifokela joi line liki wʼokelaka: ele wʼotana boya ndʼaisoʼakami, ko njokea o la lina.”
18Ko Mose akela, “Nkoonda, ontumya jilangi likawe.” 19Ko ende aokela, “Emi njifolekya bolotsi bokami bouma nda joso like, ko njifongoza lina ja Yawe nda joso like; ko o emʼokʼoya, njifokʼende boya; ko o emʼokʼisei, njifokʼendʼisei.” 20Koko aolokela, “Ofoaleya elongi ekami; ele bonto ntambalakʼemi ko aika.” 21Ko Yawe akela, “Bala, itenela ilongi lʼemi, ko we wifemala ndʼekenje: 22ko joi lifokelama, wae aleka jilangi likami, emi njifokila we ndʼikole yʼekenje eko, ko njifokokuka la likata likami elaki nkʼa emʼolekana: 23ko njifimola likata likami, ko wifena bokongoʼokami; lolonde elongi ekami efaenya.”
Currently Selected:
Olelo 33: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
