Olelo 32
32
Bona owa ngombo owa wolo
(B. biʼaf 9.6-29)
1Aki banto enaka wete Mose aomonga nda ngongo, bantʼako batakanaki ele Alona ko baolokela, “Yaka, otokeele nzakomba ikende nda joso likiso; ele Mose one, bontʼoko otoyelaki limʼese ea Ejipeto, iso tofea ekiʼndʼocwe.” 2Alona aolakela, “Lolotola bakoko ba wolo bale ndʼatoi ba baajiʼakinyo lʼana bakinyo bʼaende lʼamato, ko lonjelʼako.” 3Ko bantʼauma balotolaki bakoko ba wolo baki ndʼatoiʼakiyo, ko baoyelʼako ele Alona. 4Ko ende aolamba bako lima bakata bakiyo, ko aosenzolʼako, ko aotula la bifeko bia lotulo, aokela bona owa ngombo: ko baokela, “O Yisalaele, ine wae nzakomba ike, ikoyelaki limʼese ea Ejipeto!” 5Koko aki Alona enaka ngoko, aotonga nkinda ea mbeka nda joso jʼefoya eko; ko Alona aotamanya joi, akela, “Lobi wete elambo ea Yawe.” 6Ko baoetswa lobi la nkesa mongo, ko baolekya mbeka ea ntatumba, ko baoyela mbeka ya eamanyelo; ko bantʼako bakitakʼase wae bale ko bamele, ko bemalaki wae basane.
7Ko Yawe aotefela la Mose, akela, “Kenda, kitela; ele bantʼake baki wʼoyelaka limʼese ea Ejipeto, baoyakelʼiyo mongo linyamo: 8ntabamonga jengoza lima mboka ekiʼmʼasisakʼiyo; baotula bona owa ngombo, ko baotataanelʼoko, baolekya mbeka elʼoko, baokela, O Yisalaele, ine wae nzakomba ike ikoyelaki limʼese ea Ejipeto!” 9Ko Yawe aokela Mose, “Emi njolenʼantʼane, ko bala, bale banto ba botsa bolo! 10Ndʼewelʼeko oncike aeyoko, wete nkele ekami engalʼelʼiyo, ko ndasiza: kela nkile we booci wʼanto wʼonene.”
11Koko Mose aoonda Yawe Nzakomba ekande, akela, “Yawe, nkele eke engalʼele banto bake, baki wʼoyelaka limʼese ea Ejipeto la bolo wa likata ja mpamba, la ncina ea na? 12Ba-Ejipeto bifotefela, bakela, Aolaoza ndʼewela ea bobe, wae aome nda ngongo, ko asizʼiyo limʼokili, ndʼewela ea na? Kengwa lima nkele eke ea ngangala oyei, ko bututala bobeʼone boe wʼokeela bantoʼake. 13Ofwa Abalayama, la Yisaka, la Yisalaele, basaliʼakawe, baki wʼosimbelaka nsimbi la we mongo, ko wʼakelaki, Emi njifofuza banaʼakinyo elengʼele tooci ta loola, ko njifokaya banaʼakinyo ese ene ekiʼmʼoandaka euma, ko iyo basangolʼeko lisango ja seko.” 14Ko Yawe aoututala lima bobe bokiʼndʼokelaka wae ieza ele bantoʼakande.
15Mose aokengwana ko aokitela lima ngongo, la bitanda bia bikenje bia elembelo eʼokolo biko bife nda likata likae; bitanda biko bikotamaki ndʼekala bekʼefe; bikotamaki ndʼokalʼomoko la ndʼokalaʼonkina. 16Ko bitanda biko biki wete bosala wa Nzakomba, ko lokoci loko loki lokoci ja Nzakomba, locimama nda bitanda. 17Aki Yoswa okaka lofoso jʼantʼako akiʼyʼobelezaka, ende aokela Mose, “Lofoso jʼetumba lole ndʼetakanelo.” 18Ko ende aokela, “Loko lofa lofoso jʼanto bandelemoza lʼelonga, ko lofa lofoso jʼanto balela ndʼewelʼekiʼyʼumbamaka: lolonde ndoka lofoso jʼanto bandemba nsao.” 19Koko joi joliela, nko endʼotutama ndʼetakanelo, aolena bona owa ngombo, ko la mbaina ea boina: ko nkele ea Mose eongala, ko aolusa bitanda biko limʼakataʼakae, ko aola biko o mbaola ndʼase ba ngongo. 20Ko aokola bona owa ngombo okiʼyʼotulaka, aotumbʼoko la tsa, ko aominyola oko mpumbu o wula, aosanzola ndʼasi, ko aomeza bana ba Yisalaele lima basi bako.
21Koko Mose aokela Alona, “Joi liki bantʼane okokeelaka we, wae wieza joi line jʼobe jʼonene elʼiyo, na?” 22Ko Alona akela, “Timezake wae nkele ea nkolo ekami engale: wʼolea bantʼane bayociniana la bobe. 23Ekiʼyʼonkelaka, Otokeele nzakomba, ikende nda joso likiso: ele Mose one, bontʼoko otoyelaki limʼese ea Ejipeto, iso tofea ekiʼndʼocwe. 24Ko emi ndakelaki, Iyʼaata wolo, kelʼiyo balotole; elengʼeko bankaaki wolo: ko ndusaki boko nda tsa, ko bona one owa ngombo aolola.”
25Aki Mose enaka wae bantʼako baolungusana; eki Alona aungusanyaka ola nsoi nda joso jʼainiʼakiyo: 26nkako Mose aolemala nda wiso wʼetakanelo, akela, “Wengiʼonto olanga Yawe, kelʼende ayʼelʼemi!” Ko bana ba Lewi bauma baotakana elʼende. 27Ko aolakela, “Yawe, Nzakomba ea Yisalaele, akela ngone, Wengiʼonto asomya ifaka ikae yʼetumba nda lokondo, ko ete taka ndʼetakanelo euma lima wiso o nda wiso bomo, ko wengiʼonto aome eoto ekae, ko la webiʼokae, ko la osingitana lʼende.” 28Ko bana ba Lewi bakelaki elengʼele joi ja Mose: ko banto bakweki mbilʼeko baende nkina nkoto isato. 29Koko Mose aokela, “Louzʼinyo mongo ele Yawe ndʼoeko mbilʼene, onde, wengiʼonto la bona okae owa jende la wengiʼonto la eoto ekae: wae ende asakelʼinyo bokako wa swa mbilʼene.”
30Koko nda mbile ea lobi, joi joliela wae Mose aokela bantʼako, “Inyo lokela bobe mongo wa ndekola: ko aeyoko emi njifounda ele Yawe; nkina njifokuseya loatelʼinyo efofyelo ea likambo likinyo jʼobe.” 31Ko Mose aolutela Yawe, aokela, “O bantʼane baokela bobe mongo wa ndekola, ko baoyaemelʼiyo mongo nzakomba ea wolo. 32Lolonde aeyoko, nkina wifotungolʼiyo lima bobeʼokiyo–; ko nkina nye, nkoonda, ompofyʼemi limʼonkandaʼokawe boki wʼokotaka.” 33Ko Yawe aokela Mose, “Bonto nko loswele onkeelaki bobe, njifofofyʼende limʼonkandaʼokami. 34Ko kenda aeyoko, londa bantʼako ndʼitenela ikiʼmʼokosangeleka: bala, ekima ekami ifocwa nda joso likawe; lolonde nda mbile e emʼumanya, njifumanyʼiyo bobe bokiyo.”
35Koko Yawe aoliezʼeto ea nkangi elʼantʼako, ekiʼyʼaemelakʼiyo mongo bona owa ngombo, oki Alona otulaka.
Currently Selected:
Olelo 32: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
