Olelo 30
30
Nkinda ea baimi
(Ol 37.25-28)
1Ko tonga nkinda wae otumbe baimi ba mpimbo ba ntatumba ndʼeko: tongʼeko la babaya ba acacia. 2Botale wʼeko coudée emoko, ko bonene o coudée emoko; biiji bekʼenei o fio; ko lisange jʼeko coudées ife: beongo biʼeko beamana la nkinda nga bolemo bomoko ndʼakono. 3Ko kuka eko la wolo wa soto, lʼaliko, lʼempanje beuma kio samanyu, la beongo; ko kela boelo wa wolo ndʼeko kio samanyu. 4Ko tula bakoko bafe ba wolo, bayale ndʼase ba boelo wʼeko, ndʼakono bakʼafe ndʼempanje bekʼefe; ko bayale biotsweyelo bia belenga bia ntatomba. 5Senga belenga beko limʼotamba wa acacia, ko kuka beko la wolo. 6Ko ila nkinda eko nda joso jʼeto ea bolelo, wiji bolongi sanduku ea elembelo eʼokolo, nda joso ja mbata eʼisei ele ndʼaliko bʼelembelo eʼokolo, e emʼokumana la we. 7Koko Alona atumbʼaimi ndʼeko, wete baimi ba mpimbo: wengi nkesa andezʼende totswa, atumbe baimiʼako. 8Ko aambola Alona totswa lʼokolo, atumbe bako, baimi ba mpimbo ba ntatumba ba bikeke hiuma nda joso ja Yawe nda biotswelo bikinyo. 9Talotumbake baimi ba mpimbo ba ntatumba bʼafaya ndʼeko, la mbeka ea ntatumba, la mbeka ea biofo; ko talutezake mbeka ea mmamela ndʼeko. 10Ko Alona akele eamanyelo eʼoseka nda beongo biʼeko bokela bomoko nda mbula emoko: akele eamanyelo eʼoseka lʼalongo ba mbeka ea baoyiʼobe ea eamanyelo eʼoseka bokela bomoko nda mbula emoko nda biotswelo bikinyo biuma: eko ele boeko wa beeko ele Yawe.”
11Koko Yawe aotefela la Mose, aokela, 12“Ae wʼoanda boanji wa bana ba Yisalaele elengʼele boanjiʼokiyo, kelʼiyo balekya wengiʼonto besiko ndʼeloko ekande mongo ele Yawe, wae eto ea nkangi efielʼelʼiyo, ae wʼaandolʼiyo. 13Wengiʼonto okiyʼoandema alekya ete i ea sekele elengʼele sekele ea ntena eʼoeko: sekele ele wete bangela ntukʼife, ete i ea sekele wae nganji ele Yawe. 14Wengiʼonto okiyʼoandema okita mbula ntukʼife la mbula ilekolʼiko alekya nganji ea Yawe. 15Baaci bʼaumba batalekolake, ko ba beola batakokolake botunya boko, alekyʼinyo nganji ea Yawe, wete lokelʼeamanyelo eʼoseka ndʼeloko ekinyo, lolekya nkʼete i ea sekele. 16We amba argent ea eamanyelo eʼoseka limʼele bana ba Yisalaele, ko ilʼeko nda mpifo eʼosala wʼilombe ya bito yʼetakano: wae eko eyale jofwa ja bana ba Yisalaele nda joso ja Yawe, wete ekelʼeamanyelo eʼoseka ndʼeloko ekinyo.”
Saani ea kongo lʼemaelo
17Koko Yawe aotefela la Mose, akela, 18“Tula saani ea kongo, ko lʼemaelo eʼeko ea kongo, ea ndooka eʼasi: ko ilʼeko ndatsa ilombe ya bito yʼetakano la nkinda ea mbeka, ko ilʼasi nda saani. 19Ko Alona lʼanaʼakande bʼaende basole bakata lʼakakaʼakiyo nda saani eko; 20andotswʼiyo ndʼilombe ya bito yʼetakano, bokʼasi, nyango bafowa: ko atutamʼiyo nda nkinda ea mbeka okambʼolemo, wae balekya mbeka la tsa ele Yawe: 21elengʼeko basole bakata lʼakakaʼakiyo, nyango bafowa: eko eyale esekyelo elʼiyo bikeke biuma seko, wete elʼende lʼele banaʼakae nda biotswelo bikiyo biuma.”
Bauta bʼoeko
22Koko Yawe aotefela la Mose, akela, 23“Kola baimi bʼolotsi, wae mula eʼasi basekele benkamʼetano, la kinamona ea mpimbo ete i eʼolito wete basekele benkamʼefe la ntuku itano, ko la roseau ea mpimbo basekele benkamʼefe la ntukʼitano, 24ko la casse basekele benkama betano, elengʼele sekele ea ntena ea boeko, ko lʼauta ba bilaya ina emoko: 25ko kela bauta ba loiso ba boeko la toma toko, mpimbo esanganyema la wanya wa bosanganyi owa mpimbo: bako bayale bauta ba loiso ba boeko. 26Ko bisa ilombe ya bito yʼetakano ko la sanduku ea elembelo eʼokolo lʼako, 27ko la mesa la belemo biʼeko, ko la ilelo eʼitswa lʼelemo biʼeko, ko la nkinda eʼaimi ba mpimbo ba ntatumba, 28ko la nkinda ea mbeka ea ntatumba lʼelemo biʼeko, ko la saani lʼemaelo eʼeko. 29Ko buzʼelemoʼeko ndʼoeko, wete beyale boeko wa beeko: ofomwa belemoʼeko, lʼonto la yomba, ayale boeko. 30Ko bisa Alona lʼanaʼakae bʼaende, ko wʼauza ndʼoeko, wae bankambelʼemi bolemo wa nkanga. 31Ko we tefela la bana ba Yisalaele, wʼakele, Bane bayale elʼemi bauta ba loiso ba boeko nda biotswelo bikinyo biuma. 32Talutezakʼako nda jonge jʼonto, ko talokelakʼamo ngolʼako, elengʼele esanganyelo ea bako: bale boeko: ko bayalʼelʼinyo o boeko. 33Osʼosanganya bamo ngolʼako, ko osʼondilʼako ele bofaya, ende imolame limʼelʼantoʼakande.”
34Koko Yawe aokela Mose, “Kola baimi ba mpimbo, stacte, la ongle la galbanum; baimi ba mpimbo la falankinsensa ea feto: wengi jimi wengi jeza jʼolito fio: 35ko kela la toma toko baimi ba ntatumba, mpimbo elengʼele wanya wa bosanganyi owa mpimbo, ecwela lʼokwa, feto la boeko: 36ko we toka bamo tosisi mongo, ko ilʼako nda joso ja sanduku ea elembelo eʼokolo ndʼilombe ya bito yʼetakano, e emʼokumana la we: bako bayalʼelʼinyo boeko wa beeko. 37Koko baimiʼako bakela we, talokeelakʼinyo mongo elengʼele esanganyelo eʼako: bako bayalʼele we boeko ele Yawe. 38Osʼokelʼamo ngolʼako wae ombele, ende imolame limʼele bantʼakande.”
Currently Selected:
Olelo 30: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
