Olelo 29
29
Ebuzelo ea Nkanga ndʼoeko
(Lewi 8.1-36)
1Wʼakeelʼiyo elengʼene wae wʼauza ndʼoeko wete bankambelʼolemo wa nkanga: kola ngombo ea jende eʼonolu ko la mpate yʼaende ife ifa lʼolema, 2ko la mampa ifa la nyango, ko la bengate besamba nyango ea mampa besangana lʼauta la mampa ya lejileji isamba nyango iisama lʼauta; tumba iko la farine ea blé eʼolotsi. 3Ko ila iko ndʼeoko emoko, ko yela ndʼeoko, la ngombo la mpate yʼaende ikʼife. 4Ko yela Alona lʼanaʼakande bʼaende nda wiso wʼilombe ya bito ya etakano, ko wʼaokyʼasi. 5Ko kolʼenkoto, ko lotsʼAlona bonkoto wa mbo, lʼonkoto wa efodo, la efodo, lʼekukelo ea ntolo, ko wʼolembʼombembe lʼilemba ya efodo ifomama la losifya: 6ko afyaʼlikuka ja nkanga ndʼotsaʼokande, ko ila likuka jʼokulaka jʼoeko ja wolo nda likuka ja nkanga. 7Limʼako kolʼauta ba loiso, ko utezʼako ndʼotsaʼokande, ko wʼoise loiso. 8Koko yela banaʼakae bʼaende, ko wʼalotsa benkoto bia mbo. 9Ko wʼalembe bembembe la tolemba, lʼAlona la banaʼakae, ko wʼaafya bakuka: ko iyo bayale nda mpifo ea nkanga lʼesekyelo ea seko: bekya Alona ko lʼanaʼakae bʼaende ndʼoeko.
10“Ko yela ngombo ea jende nda joso ja wiso wʼilombe ya bito yʼetakano; ko Alona lʼanaʼakae bʼaende bafyʼakataʼakiyo ndʼotsa wa ngombo eko. 11Ko boma ngombo eko ea jende nda joso ja Yawe, nda wiso wʼilombe ya bito yʼetakano. 12Kola balongo ba ngombo, ko ilamo ndʼeongo bia nkinda ea mbeka lʼosai boke: ko uteza balongo baciki ndʼase ba nkinda ea mbeka. 13Ko kola bauta bakukaka befonda, la longombo lole ndʼaliko ba lofiko, ko la beloko biʼaaji bekʼefe, ko lʼauta bale ndʼeko, ko tumba bakʼauma nda nkinda ea mbeka. 14Lolonde nyama ea ngombo eko, la lofoso, la nkwa, tumbʼako la tsa ndʼanza bʼetakanelo eʼanto: ngombo eko ele wae mbeka ndʼewela ea baoyiʼobe.
15“Koko kola mpate ea jende emoko; ko Alona lʼanaʼakae bʼaende bafyʼakata bakiyo ndʼotsa wa mpate eko. 16Ko we, boma mpate eko, ko kola balongo ba mpate, ko sanzelʼako nda nkinda ea mbeka kio samanyu. 17Ko sesa mpate nda bilama, ko sola befonda, ko la nkolo, ko ila beko la bilama bimo lʼotsa. 18Ko tumba mpate eko ea jende euma nda nkinda ea mbeka: eko ele wete mbeka ea ntatumba ele Yawe: ele la mpimbo eʼolotsi, mbeka elekyama la tsa ele Yawe.
19“Ko kola emo mpate ea jende; ko Alona lʼanaʼakande bʼaende bafyʼakataʼakiyo ndʼotsa wa mpate eko. 20Limʼako boma mpate eko, ko kola balongo bʼeko, ko ilʼako nda nsonge ea litoi ja Alona jʼelome, la nda nsonge yʼatoi ba banaʼakande bʼelome, la ndʼosai wa nkanda wa likata likiyo jʼelome, la ndʼosai wʼonene wa likaka likiyo jʼelome, ko sanzela balongo nda nkinda ea mbeka kio samanyu. 21Ko kola balongoʼamo bale nda nkinda ea mbeka ko lʼauta ba loiso, ko sanzela Alona la bako, la ndʼenkoto, lʼele banaʼakande la ndʼenkotoʼekiyo; ko ende auzama ndʼoeko, ende lʼenkotoʼekande, lʼana bakande bʼaende, lʼenkoto biʼanaʼakande ngoko.
22“Koko kola bauta ba mpate ko lʼongongo wʼeko wʼauta, ko lʼauta bakukaka befonda, la longombo lole ndʼaliko ba lofiko, ko lʼeloko biʼaaji bekʼefe, lʼauta bale nda beko, ko la lisoko jʼelome: ele mpate eko mpate ea boeko: 23la mampa emoko, la bongate bomoko wa mampa esangana lʼauta, la efaso ea mampa emoko limʼeoko ea mampa isamba nyango ele nda joso ja Yawe; 24ko ila bakʼauma ndʼakata ba Alona la ndʼakata bʼanaʼakande bʼaende, ko fukusʼako wae mbeka ea mpukusa nda joso ja Yawe. 25Ko ambʼako limʼakataʼakiyo, ko tumbʼako nda nkinda ea mbeka ndʼaliko ba mbeka ea ntatumba wete mpimbo eʼolotsi nda joso ja Yawe: eko ele mbeka elekyama la tsa ele Yawe.
26“Ko kola ntolo ea mpate ea Alona eʼoeko, ko fukusʼeko mbeka ea mpukusa nda joso ja Yawe: ko eko eyale liondo like. 27Ko buza ndʼoeko ntolo ea mbeka ea mpukusa, la lisoko ja mbeka ea nsasangya, eko efukusama lʼeko esangyema, lima mpate ea boeko, wae eko eyale ndʼeloko ea Alona, lʼeko eyale ndʼeloko ea banʼakande: 28ko eko eyale ea Alona lʼea banaʼakande lʼesekyelo ea bikeke biuma limʼele bana ba Yisalaele; elʼeko wae mbeka ea nsasangya: ko ifoyala mbeka ea nsasangya limʼele bana ba Yisalaele lima mbeka ikiyo ya eamanyelo, wae mbeka ikiyo ea nsasangya ele Yawe.
29“Ko benkoto bia Alona biʼoeko beyale bia banaʼakae bʼaende ndʼafekaʼakande, wete iyo baisame loiso nda beko, ko baekyame boeko nda beko. 30Bona okae owa jende osʼosulunganʼende nda mpifo ea nkanga, andotswʼende ndʼilombe ya bito yʼetakano wae akambe bolemo ndʼitenela y a boeko, alote beko bembile nsambo.
31“Ko kola mpate ea jende ea euzelo ndʼoeko, ko katsa nyama ea eko ndʼitenela yʼoeko. 32Ko Alona lʼanaʼakande bʼaende bale nyama ea mpate eko, ko la mampa ile ndʼeoko, nda wiso wʼilombe ya bito yʼetakano. 33Bale toma toko toki ndʼeamanyelo eʼoseka, wete iyo baekyame ko bauzame ndʼoeko: lolo bofaya ataleke toma toko, ele toko boeko. 34Nkina nyama ea boeko, nkina mampa, icikala la nkesa, tumba iciki la tsa; toma toko totaleamaka, ele toko boeko. 35Keela Alona ngoko, ko lʼanaʼakande bʼaende, elengʼele baoyi bakiʼmʼokosisaka bauma: wʼauza ndʼoeko bembile nsambo.
36“Cu mbile lekya ngombo ea jende mbeka ea baoyiʼobe ea eamanyelo eʼoseka: alekya we mbeka ea eamanyelo eʼoseka ea nkinda ea mbeka, solʼeko; ko bisʼeko lʼauta, wae ouzʼeko ndʼoeko. 37Bembile nsambo lekya mbeka ea eamanyelo eʼoseka ea nkinda ea mbeka, ko buzʼeko ndʼoeko: nkinda ea mbeka eyale eʼoeko mongo; ofomwa nkinda ea mbeka, lʼonto la yomba, ayale boeko.
Mbeka ea bembile lʼembile
(Bea 28.1-8)
38“Lekya elengʼene nda nkinda ea mbeka; bana ba mpate bafe ba mbula emoko bembile lʼembile nko jomo. 39Lekya bona owa mpate omoko la nkesa, ko lekya bona owa mpate omo lʼokolo: 40ko lekya la bona owa mpate omoko, mbeka ea biofo biʼolotsi jeza nga liondo limoko ja baondo jom ba efa, o nsangana la bauta ba ntatoka liondo limoko ja baondo banei ja jeza ja ina; ko la vina liondo limoko ja baondo banei ja jeza ja ina nga mbeka ea mmamela. 41Koko lekya bona owa mpate omo lʼokolo, ko kela la oko elengʼeki mbeka ea bofo ea nkesa, lʼelengʼeki mbeka ea mmamela eʼoko nga mpimbo eʼolosti, mbeka elekyama la tsa ele Yawe. 42Ena eyale mbeka ea ntatumba nda biotswelo bikinyo biuma nko jomo, elekyama nda wiso wʼilombe ya bito yʼetakano nda joso ja Yawe: emi njifokumana lʼinyo eko wae ntefele la we. 43Koko njifokumana eko la bana ba Yisalaele, ko ilombe ya bito ifouzama ndʼoeko la jilangi likami. 44Ko emi njifouza ilombe ya bito yʼetakano ndʼoeko, ko la nkinda ea mbeka: koko njifouza Alona lʼanaʼakande bʼaende ndʼoeko, wae bankambelʼemi bolemo wa nkanga. 45Ko emi njifoyala ndʼetei ea bana ba Yisalaele, ko njaleme Nzakomba ekiyo. 46Ko iyo bifea wae emi nde Yawe Nzakomba ekiyo, ondayelaki lima ese ea Ejipeto, wete njale ndʼetei ekiyo: emi nde Yawe, Nzakomba ekiyo.
Currently Selected:
Olelo 29: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
