Olelo 28
28
Benkoto bia boeko
(Ol 39.1-7)
1“Koko tutsa botomolo oke Alona ele we, ende lʼanaʼakande bʼaende, limʼele bana ba Yisalaele, wete ankambelʼemi bolemo nda mpifo ea nkanga, wae Alona, la Nadaba la Abiu, la Eleazala, la Itamala bana ba Alona bʼaende. 2Ko tongela Alona botomolo oke benkoto biʼoeko bia jilangi la bia lituka. 3Ko tefela lʼantʼauma bale lʼete ma bia wanya, bakiʼmʼokaaka bolimo wa wanya, wete iyo batongele Alona benkoto wae auzame ndʼoeko, wete ankambelʼemi bolemo nda mpifo ea nkanga. 4Bene wae belotswaka be iyʼotonga; ekukelo ea ntolo, ko la efodo, ko lʼonkoto wʼotale, ko lʼonkoto wa mbo wa nsasamba ea bifoya, ko la likuka ja nkanga, ko lʼilemba yʼombembe, ko batonge benkoto biʼoeko bia Alona botomolo oke, la banaʼakae, wae ende ankambelʼemi bolemo nda mpifo ea nkanga.
5“Basalʼeko la wolo, la bléu, la pourpre, la écarlate la lin eʼolotsi. 6Batonge efodo la wolo, la bléu, la pourpre, la écarlate la mbenza eʼolotsi, bosala wa botongi owa wanya. 7Tongʼeko bitei bife biʼasoko bitongane nda nsuko ikʼife yʼefodo. 8Ko ilemba yʼeko ifomama la losifya wae bonkoto bolembame ndʼombembe, isambeme lʼesambelo elengʼelʼonkoto mongo, ko lʼeto nkʼemoko; o la wolo, la bléu la pourpre, la écarlate la lin eʼolotsi. 9Ko we kola bikenje bia onyx bife, ko cima nda biko ekotelo ea baina ba bana ba Yisalaele: 10baina botoa ndʼekenje emoko, ko baina bamʼotoamʼotoa baciki ndʼekenje enkina elengʼele eotswelo ekiyo. 11Cima bikenje biko bife lʼosala wa bocimi owa bikenje, elenge ecimʼiyo bifoya bia lotaza jʼesike, elengʼele baina ba bana ba Yisalaele; ko baka bikenje biko nda biakelo bia wolo. 12Ko ila bikenje biko bife nda bitei biko biʼasoko bitongi lʼefodo, wete biko biyale bikenje bia jofwa ja bana ba Yisalaele: ko Alona atombe baina bakiyo nda joso ja Yawe ndʼasokoʼakande bakʼafe nga jofwa. 13Ko kela biakelo bia wolo; 14la benyolo befe bia wolo wa soto; tula beko nga bekulu, nga biambi bisingame: ko ila benyolo beko nda biakelo.
15“Ko kela ekukelo ea ntolo ea ete nelo eʼakambo, bosala wa bosambi owa wanya; kelʼeko elengʼele bosala wa efodo; kela la wolo, la bléu, la pourpre, la écarlate, la lin eʼolotsi 16Ko bempempe biʼeko bekʼenei beyale o fio, o mumbʼife; botale wʼeko litango jʼesai limoko, ko bonene wʼeko o litango jʼesai limoko o ngoko. 17Ko baka ndʼeko bikenje o mbaaka, belongo bia bikenje benei; ndʼolongo wa joso, ila sardoine, la topaze, la escarboucle; 18ko ndʼolongo wʼefe, ila emeraude, la saphir, la diamant; 19ko ndʼolongo wʼesato ila opale, la agate, la amethyste; 20ko ndʼolongo wʼenei ila chrysolithe, la onyx, la jaspe; ko biko biakeme nda biakelo bia wolo. 21Bikenje biko biyale ngole baina ba bana ba Yisalaele, o jom la bife nkʼelengʼele bainaʼakiyo; ko bicimame ngole lotaza ja esike, wengi ekenje wengi lina, ndʼeloko ea baoci ba bana ba Yisalaele jom lʼafe. 22Ko kela ndʼekukelo benyolo bia wolo nga bekulu, nga biambi bisingame bia wolo wʼolotsi. 23Ko tula bakoko ba wolo bafe ndʼekukelo ea ntolo, ko ila bakoko bakʼafe nda nsuko ya ekukelo ea ntolo ikʼife. 24Ko ila benyolo bia wolo bia biambi bisingame nda bakoko bakʼafe nda nsuko yʼekukelo ea ntolo ikʼife. 25Ko nsonge imo ya benyolo beko bia biambi bisingame, ilʼiko nda biakelo bife, ko tonganya biakelo biki nda bitei biʼasoko bitongi efodo, nda joso. 26Koko tula bakoko ba wolo bamʼafe ko ilʼako nda nsuko ya ekukelo ea ntolo ikʼife, ndʼompempe bolongi la efodo ndʼetei. 27Ko tula bakoko bafe bankina, ko ilʼako nda bitei biʼasoko bitongi biko bife bia efodo ndʼase, nda joso ndongama la etonganelo eʼeko, ko ndʼaliko ba ilemba yʼombembe ya efodo ifomahna la losifya. 28Ko balembe ekukelo ea ntolo lʼakoko bʼeko lʼakoko ba efodo lʼilemba ya bléu, wete eyale ndʼaliko ba ilemba yʼombembe yʼefodo ifomama la losifya, ko ekukelo ea ntolo efolembwa lima efodo. 29Koko Alona atombe baina ba bana ba Yisalaele ndʼekukelo ea ntolo ea ete nelo eʼakambo ndʼolokoʼokande, andotswʼende ndʼitenela yʼoeko, wae eyale jofwa nda joso ja Yawe bikeke biuma. 30Ko ila Ulima la Tumima ndʼetei ea ekukelo ea ntolo ea ete nelo ea bakambo; ko andotswa Alona nda joso ja Yawe, bako ha: yale ndʼolokoʼokande; ko Alona atombe ete nelo eʼakambo ea bana ba Yisalaele ndʼolokoʼokande nda joso ja Yawe bikeke biuma.
31“Ko kela bonkoto wa efodo bokʼouma o bléu. 32Ko boko boate lilusu lindotswa botsa; ko lʼomumo nda lilusu kio samanyu ngole lilusu jʼonkoto nyango bonkoto bofokanjwa. 33Ko ndʼase ndʼomumo wʼonkoto ila grenades ya bléu, la pourpre, lʼéearlate kio samanyu, ko la tongangonga ta wolo ndatsa grenades nsoanya kio samanyu: 34ingangongaʼya wolo la grenade, ingangonga ya wolo la grenade ndʼomumo wa bonkoto kio samanyu. 35Ko Alona alote bonkotoʼoko akambʼende bolemo wa nkanga: ko lofoso ja toko jokana andotswʼende ndʼitenela yʼoeko nda joso ja Yawe, lʼandolʼende, nyangʼende afowa.
36“Koko tula etanda ea wolo wa soto, ko cima bakota ndʼeko ngʼecimelo ea lotaza jʼesike, BOEKO ELE YAWE. 37Ko ila ilemba ya bléu nda etanda wae eko eyaleme nda joso ja likuka ja nkanga. 38Ko eko eyale ndʼelongi ea Alona, ko Alona atombe bobe wa toma tʼoeko toe bana ba Yisalaele oekya nda nganji ikiyo yʼoeko iuma; ko eko eyale ndʼelongi ekande bikeke biuma, wae Yawe ambʼiyo lʼoya.
39“Ko foma bonkoto wa mbo la lin eʼolotsi, ko kela likuka ja nkanga la lin eʼolotsi, ko la ilemba, lʼosala wa bosambi owa bifoya owa Wanya.
40“Ko tongela bana ba Alona benkoto bia mbo, ko la tolemba, ko lʼakuka, bia jilangi la bia lituka: 41Ko lotsa Alona botomolo oke ko lʼanaʼakande bʼaende benkotoʼeko, ko wʼaise lʼauta, wʼaekya, ko wʼauza ndʼoeko wae bankambelʼemi bolemo wa nkanga. 42Ko wʼatongele benkoto bia nkolo bia lin okuka jonge likiyo jʼotaka: beko bekite limʼonkeke o nda bifelo: 43ko Alona lanaʼakae bʼaende balote beko, andotswʼiyo ndʼilombe ya bito yʼete kano, lʼatutamʼiyo nda nkindo ea mbeka wete bakambʼolemo ndʼitenela yʼoeko; nyango bafotomba bobe ko bafowa: elengʼeko eyale esekyelo bikeke biuma elʼende lʼele bana bakande ndʼafekaʼakae.
Currently Selected:
Olelo 28: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
