Olelo 26
26
Etongelo ea Tabernacle
(36.8-38)
1“Koko tongʼilombe iko ya tabernacle la bito bia nkombela jom bia mbenza eʼolotsi la bléu, la pourpre, lʼécarlate; samba biko la bifoya bia bakeluba bisamba bosambi owa wanya. 2Botale wa wengi eto wete coudées ntuku ife la mwambi, ko bonene wa wengi eto wae coudées inei: bito biko biuma biyale jeza limoko. 3Bito biko bitano bitongane etonganelo emoko, ko bimo bitano bitongane etongelo emo. 4Ko ila balembe ba bléu ndʼompempe wʼeto limʼomumo ndʼetonganelo; ko elengʼeko ndʼompempe wʼeto ele nda nsuko ndʼetonganelo enkina. 5Kela balembe ntuku itano ndʼompempe wʼeto emoko, ko kela balembe ntuku itano ndʼompempe wʼeto ele ndʼetonganelo enkina: balembe bako balongane o ci. 6Ko tula nkofo ya wolo ntuku itano, ko tonganya bito biko bife la nkofo iko: wete tabernacle eyaleme nkʼemoko.
7“Koko kela bito bia nkunza ya nta bia ilombe ya bito ndʼaliko ba tabernacle: kela bito biko jom lʼemoko. 8Botale wa wengi eto wete coudées ntuku isato, ko bonene wa wengi eto wae coudées inei; bito biko biuma jom lʼemoko o jeza limoko. 9Ko tonganya bito bitano etonganelo kika, ko la bito botoa etonganelo kika, ko una eto eʼotoa ele nda joso jʼilombe y a bito mumba ife. 10Ko ila balembe ntuku itano ndʼompempe wʼeto ele nda nusuko ea etonganelo ko lʼalembe ntuku itano ndʼompempe wʼeto ele nda nsuko ea etonganelo enkina.
11“Ko tula nkofo ya konga ntuku itano, ko ila nkofo nda balembe, ko tonganya ilombe ya bito wete eyale emoko. 12Ko ete i ea bito bia ekukelo eciki, wae ete i ea eto eciki, eko elendela nda wiji wʼafeka wa tabernacle. 13Ko coudée emoko eciki wiji la wiji wete eciki ndʼotale wa bito bia ekukelo, eko elendela nda tabernacle nda biiji bekʼefe wae bikukʼeko. 14Ko kela ekukelo emo ea bikoto bia mpate yʼaende bilinzama la boko wa ngola, ko lʼekukelo enkina ea bikoto bia baenge ndʼaliko.
15“Koko ata babaya ba njemala ba tabernacle limʼotamba wa acacia. 16Botale wa wengi libaya wete coudées jom, ko bonene wa wengi libaya coudée emoko lʼete i. 17Ko senga tenons ife nda wengi libaya o mbamana: kela babaya ba tabernacle bauma elengʼeko. 18Ko ata babaya ba tabernacle, babaya ntuku ife ba wiji wa sud, bondelela sud. 19Ko tula bisumyelo bia argent ntuku inei ndʼase ba babaya ntuku ife; bisumyelo bife ndʼase ba libaya limoko bia tenons ikʼife ko bisumyelo bife ndʼase ba libaya limo bia tenons ya liko ikʼife: 20ko nda wijʼomo wa tabernacle wete wiji wa nord, babaya ntuku ife; 21ko la bisumyelo bia argent ntuku inei; bisumyelo bife ndʼase ba libaya limoko ko la bisumyelo bife ndʼase ba libaya limo. 22Ko ata babaya botoa ba elongi ea tabernacle eʼafeka endelela ouest. 23Ko ata babaya bafe ba bakono ba tabernacle ndʼelongi eʼafeka. 24Bako bayale bafe mbamana limʼase, ko batongane ndʼaliko la likoko limoko, bakʼafe bayale ngoko; bako bilame ndʼakono bakʼafe. 25Babaya mwambi, la bisumyelo bia bako bia argent, bisumyelo jom lʼotoa; bisumyelo bife ndʼase ba libaya limoko, ko bisumyelo bife ndʼase ba libaya limo.
26“Koko senga belenga bia botamba wa acacia; belenga betano bia babaya ba tabernacle ba wijʼomo, 27la belenga betano bia babaya ba tabernacle ba wijʼonkina, la belenga betano bia babaya ba tabernacle ndʼelongi eʼafeka endelela ouest. 28Ko bolenga bole ndʼetei ea babaya botuwane bokite ntundo ikʼife. 29Kuka babayaʼako la wolo, ko tula bakoko ba bako la wolo wae biotsweyelo bia belenga; ko kuka belenga la wolo. 30Ko tonga tabernacle elengʼele lotaza londeneyamaki ele we nda ngongo.
31“Koko kela eto ea bolelo ea bléu, la pourpre, la écarlate la mbenza eʼolotsi ea mpafoma: la bifoya bia bakeluba, esambelo ea bosambi owa wanya: 32ko fanyʼeko nda bakonji banei ba botamba wa acacia bakukama la wolo, la nkofo ya wolo, isumyama nda bisumyelo bia argent binei. 33Ko fanya eto ea bolefo ndʼase ba nkofo, ko yela sanduku ea elembelo eʼokolo ndʼetei ea bolelo: ko eto ea bolelo ifokafa ndatsa itenela yʼoeko lʼitenela ya boeko wa beeko. 34Ko ila mbata ea isei ndʼaliko ba sanduku ea elembelo eʼokolo ndʼitenela ya boeko wa beeko. 35Ko emya mesa ndʼanza bʼeto ea bolelo, ko lʼilelo ea itswa nda wiji wa tabernacle bondelela sud, ndongama la mesa: ko ila mesa nda wiji wa nord.
36“Ko kela ekukelo ea wiso wa ilombe ya bito wae eto ea bléu, la pourpre, la écarlate, la lin eʼolotsi bosala wa bosambi owa bifoya. 37Ko senga bakonji ba eto eko batano ba botamba wa acacia, ko kukʼako la wolo; ko nkofo yʼako o wolo; ko tula bisumyelo bia konga bitano bia bakonji bako.
Currently Selected:
Olelo 26: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
