Olelo 25
25
Besise bia etongelo ea tabernacle, sanduku eʼoeko, mesa, lʼilelo ea itswa
(Ol 35.4-9; 37.1-24)
1Koko Yawe atefela la Mose, akela, 2“Sangela bana ba Yisalaele wae bankoozʼemi nganji; inyo lamba nganji ekami limʼele wengiʼonto olekyʼeko la ndalanga limʼotemaʼokae. 3Ene wae nganji e inyʼamba limʼelʼiyo; wolo, la argent, la konga; 4la bléu la pourpre lʼécarlate, la mbenza ea lin, ko la nkunza ya nta, 5la bikoto bia mpate a baende bilinzama lʼoko wa ngola, bikoto bia baenge, la babaya ba acacia; 6ko lʼauta bʼitswa, la baimi ba bauta ba mbaisa, la ba mpimbo eʼolotsi ba ntatumba; 7la bikenje bia onyx, la bikenje bindilama nda efodo, la ndʼekukelo ea ntolo. 8Kelʼiyo bantongelʼemi itenela yʼoeko; wete njale ndʼetei ekiyo. 9Lotongʼiko elenge ekeneyʼemi euma, la jeza jʼoyalo wa tabernacle, la baeza ba bifeko biuma bia boyaloʼoko.
10“Ko batonge sanduku ea babaya ba acacia: botale wa sanduku coudées ife lʼete i ko bonene wʼeko coudée emoko lʼete i, ko la lisange jʼeko coudée lʼete i. 11Kukʼeko la wolo wa soto, ila wolo ntatanda la ndʼetei la ndanza, ko ila boelo wa wolo kio samanyu. 12Ko tula bakoko banei ba wolo, ko ilʼako ndʼakono bakʼanei ba sanduku; bakoko bafe wiji, ko bamʼafe wiji. 13Ko senga belenga bia botamba wʼacacia, ko kuka beko la wolo wa soto. 14Ko otsweya belenga beko ndʼakoko ba sanduku bale nda biiji bekʼefe, wete sanduku etombame la beko. 15Belenga beko beyale ndʼakoko ba sanduku; befaimana limʼeko. 16Ko wifila elembelo eʼokolo e emʼokokaya nda sanduku. 17Ko tula mbata ea isei ea wolo wa soto, botale wʼeko coudées ife lʼete i ko bonene wʼeko coudée emoko lʼete i. 18Ko tula bakeluba ba wolo bafe; tula lʼetulelo ea ntutumya, ko ilʼako nda nsuko ikʼife ya mbata ea isei. 19Kela keluba emoko nda nsuko emo, ko keluba emo nda nsuko enkina; mbata ea isei la bakeluba bakʼafe nda nsuko ikʼife batulame lʼetulelo emoko. 20Ko bakeluba basembole bafafu bakiyo ndʼaliko, bakuke mbata ea isei lʼafafu bakiyo, baalane la bilongi bikiyo; bilongi bia bakeluba biolelela mbata ea isei. 21Ko ila mbata ea isei ndʼaliko ba sanduku; ko ila elembelo eʼokolo e emʼokokaya ndʼetei ea sanduku. 22Ko emi njifokumana la we eko, ko njifomesa la we limeso limʼaliko ba mbata ea isei, ndatsa bakeluba bakʼafe bale ndʼaliko ba sanduku ea elembelo eʼokolo, ndʼewela ea baoyiʼauma ba emʼokosisa ndʼeloko ea Ba-Yisalaele.
23“Ko tonga mesa ea babaya ba acacia: botale wa mesa coudées ife la bonene wa mesa coudée emoko, ko lisange ja mesa coudée emoko lʼete i. 24Ko kukʼeko la wolo wa soto, ko ila boelo wa wolo ndʼeko kio samanyu. 25Ko ila boelo wa wolo ndʼomumo boko kio samanyu. 26Ko tula bakoko ba wolo banei ba mesa, ko ila bako ndʼakono banei bale ndʼekolo beko benei bia mesa. 27Bakoko bako bilame tute la bomumo, wae bayale biotsweyelo bia belenga betombama mesa. 28Ko senga belenga bia botamba wʼacacia, ko kuka beko la wolo, wete mesa etombame la beko. 29Ko tula saani ya mesa eko, ko la totoko, ko la bikala, ko la bijwa bia nduteza: tula belemoʼeko beuma la wolo wa soto. 30Ko ila mampa yʼoeko nda mesa nda joso likami bikeke la bikeke.
31“Ko tula ilelo ea itswa ea wolo wa soto: ilelo ea itswa etulame lʼetulelo ea ntutumya, o lʼemaelo, la bombimbi; la tokakala lʼamuka, la ndobya yʼeko o nkʼetulelo emoko: 32ko eko ifoata bitafe botoa bekafwana lima bempanje biʼeko; bitafe bisato bia ilelo ea itswa nda wijʼomo, ko la bitafe bisato bia ilelo ea itswa nda wijʼonkina: 33tokakala tosato totulame ngole lobya jʼamande nda etafe emo, la limuka la lobya; ko tokakala tosato totulame ngole lobya jʼamande ndʼetafe emo, la limuka la lobya; bitafe biko botoa bikafwana limʼilelo eʼitswa elengʼeko: 34ko ndʼilelo eʼitswa mongo tokakala tonei totulame ngole lobya jʼamande, o lʼamuka la ndobya: 35ko ndʼase ba bitafe bife limuka litulame ndʼetulelo emoko la bitafe biko, ko ndʼase ba bitafe bife limuka litulame ndʼetulelo emoko la bitafe biko, ko ndʼase ba bitafe bife limuka litulame ndʼetulelo emoko la bitafe biko, bitafe biko botoa bikafwana lima ilelo ea itswa. 36Lʼamuka la bitafe batulame nkʼetulelo emoko; ilelo eʼitswa euma eyale bolemʼomoko botulame la etulelo ea ntutumya la wolo wa soto. 37Ko tula totswa tʼilelo eko o nsambo: ko bifoambola totswa toko wae tofolaza wijʼoko. 38Ko bekaci biʼeko la saani ya mpumbu ya totswa bifotulama la wolo wa soto. 39Eko euma la bifeko biʼeko bifotulama la talent ea wolo wa soto emoko. 40Ko bala, fonga lokela belemo beuma elengʼele lotaza londeneyamaki ele we nda ngongo.
Currently Selected:
Olelo 25: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
