Olelo 14
14
1Koko Yawe aotefela la Mose, aokela, 2“Sangela bana ba Yisalaele wae bakengwane, ko beza lilako likiyo nda Pi-Ailota, ndatsa Mingedola la lieke jʼokwa, nda joso ja Bala-Sefona: leza lilako eko ndongama la lieke jʼokwa. 3Ko Falo ifokela ndʼewela ea bana ba Yisalaele, iyo baolungusana ndʼese ene, ete keleke eolakomba. 4Ko emi njifocilinganya botema wa Falo, ko ende ifakima; emi njifokuma lokumo ele Falo, lʼele boloiʼokae bouma; ko Ba-Ejipeto bifea wae emi nde Yawe.” Ko bakelaki ngoko.
5Ko baosangela roi ea Ejipeto wae bant’ ako baolota: ko botema wa Falo la bete ma biʼasaliʼakae beocikwana ndʼeloko ea bantʼako, baokela, “Joi line likiʼsʼokelaka na, wete tokaaki Ba-Yisalaele elekelo wae bakende ko bafotosaelʼiso lenkina?” 6Koko ende aolezʼetombelo ekande eʼetumba, ko aotombʼantoʼakande lʼende; 7ko aokola bitombelo biʼetumba bikiʼndʼosonaka benkamʼotoa, ko la bitombelo bia Ejipeto biuma, ko la capitaines nda bitombelo biuma. 8Koko Yawe aocilinganya botema wa Falo roi ea Ejipeto, ko aokima bana ba Yisalaele: eki bana ba Yisalaele olaka la likata ja mpamba. 9Ko Ba-Ejipeto baolakima, chevaux la bitombelo bia etumba biuma bia Falo; ko lʼantʼakae bandafema nda chevaux, ko lʼeloi bia soldats bakande, ko baolaata ndʼetakanelo ekiʼyʼezaka lilako ndongama la lieke jʼokwa, ntutama la Pi-Ailota nda joso ja Bala-Sefona.
10Aki Falo otutamaka bana ba Yisalaele baosangya baiso bakiyo ko bala, Ba-Ejipeto baolakima; ko iyo baolokʼofoju: ko baolusela Yawe loela. 11Ko bakela Mose, “Otoyelakʼendo wae towe ndʼete keleke, lʼeki bikundelo osambaka ndʼEjipeto nde? Otoyelaki limʼEjipeto ncina na? Otokeelaki ngoko lae? 12Totakosangelaki ndʼEjipeto nde? tokelaki, Otocike, wae tosaele Ba-Ejipeto? Olekiʼolotsi wae tosaele Ba-Ejipeto, afa wae towe ndʼete keleke,” 13Ko Mose aokelʼantʼako, “Taloangake, lemala o wai, ko lifena loiko ja Yawe lo endʼoikyʼinyo mbilʼene: ele Ba-Ejipeto bakiʼnyʼenaka mbilʼene, lofaenʼako lenkina nye. 14Yawe ifouna ndʼeloko ekinyo, ko inyo lifoyala o ko.” 15Ko Yawe aokela Mose, “Onduselʼemi loela lae? Sisʼana ba Yisalaele wete bakongʼokenda nda joso: 16ko sangya bonkandoʼoke, ko sembola likata like nda lieke jʼokwa, ko kafolʼasi ba lieke, ko bana ba Yisalaele baleke nda bamoci ba kotukotu ndʼetei ea lieke jʼokwa. 17Ko emi njifocilinganya bete ma bia Ba-Ejipeto, ko iyo bifakima; ko njifokuma lokumo ele Falo, lʼele boloiʼokae bouma, la bitombelo bikae biʼetumba lʼantoʼakae bandafema nda chevaux. 18Ko a emʼokuma lokumo ele Falo, la bitombelo bikae biʼetumba, lʼantoʼakae bandafema nda chevaux, Ba-Ejipeto bifea wae emi nde Yawe.
19Koko ekima ea Nzakomba ocwaki nda joso ja Ba-Yisalaele, aolimanʼeko, ko aoleka ndʼafeka bakiyo; ko likonji ja litute jolimana lima joso likiyo, ko jolemala ndʼafeka bakiyo: 20ko liko jokafola ndatsa lilako ja Ejipeto la lilako ja Yisalaele; ko litute liki eko ko la wilima, lolonde liko jongesa fole lʼotso ele Ba-Yisalaele: ko boloiʼomo ntabotutamela omo lʼotsʼoko bouma.
21Ko Mose aosembola likata likae nda lieke jʼokwa; ko Yawe aoluteyʼasi ba lieke jʼokwa lʼompompo wa est wʼonene botsʼoko bouma, akafolaki basi ko ilaki lieke jʼokwa bamoci ba kotukotu: 22Ko bana ba Yisalaele baoleka ndʼetei ea lieke jʼokwa ndʼamoci ba kotukotu: ko basiʼako baki nga lobalaka elʼiyo nda lo jʼelome la lo jʼenso. 23Ko Ba-Ejipeto bakimaki, baoleka ndʼetei ea lieke jʼokwajʼokwa ndʼafeka bakiyo, chevaux ya Falo iuma, la bitombelo bikae biʼetumba, lʼantoʼakae bandafema nda chevaux. 24Ko la nkesa mongo, Yawe aalaki boloi wa Ba-Ejipeto lima likonji ja tsa la ja litute, ko aolungusanya boloi wa Ba-Ejipeto bauma, 25Aolongola roues ya bitombelo bikiyo biʼetumba ko biko bitakendaki bolotsi ko ndʼewela eko Ba-Ejipeto bakela, “Kelʼiso tolote limʼelongi ea Ba-Yisalaele, ele Yawe aouna ndʼeloko ekiyo, aotosukʼiso.”
26Koko Yawe aokela Mose, “Sembola likata like nda lieke jʼokwa wae basi bakumane ele Ba-Ejipeto, la bitombelo bikiyo biʼetumba, lʼantʼakiyo bandafema nda chevaux.” 27Mose aosembola likata likae nda lieke jʼokwa, ko aki nkesa okya, basi ba lieke jʼokwa baoluta la bolo ngoki bako joso; ko Ba-Ejipeto baolotʼako; ko Yawe aolumba Ba-Ejipeto ndʼetei ea lieke jʼokwa. 28Ko basi baoluta, ko baokuka bitombelo biʼetumba, ko lʼanto bakafi nda chevaux, ko lʼanto ba Falo bauma bandakimaki ndʼetei ea lieke jʼokwa; nko lʼomoko okociki nye. 29Lolonde bana ba Yisalaele balekaki nda bamoci ba kotukotu ndʼetei ea lieke jʼokwa; ko basi bako baki elʼiyo nga lobalaka nda lo jʼelome la lo jʼenso.
30Elengʼeko Yawe aikyaki Ba-Yisalaele limʼakata ba Ba-Ejipeto nda mbilʼeko; ko Ba-Yisalaele baolena biembe bia Ba-Ejipeto biambi ndʼompempe wa lieke jʼokwa. 31Ba-Yisalaele benaki bolemo wʼonene boki Yawe okeelaka Ba-Ejipeto, ko bantʼako baangaki Yawe; ko bimezaki Yawe ko la Mose bosali okande.
Currently Selected:
Olelo 14: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
