Olelo 15
15
Nsao ea elonga
1Nkako Mose la bana ba Yisalaele baolembela Yawe njemba ene, bakela:
“Njembela Yawe, elʼende aolonga lʼelonga ea jilangi:
Aolusa cheval la bonto okafi ndʼeko nda lieke jʼokwa.
2Yawe ale mpamba ekami la njemba,
Ko ende aoyalema loiko lokami:
Ene wae Nzakomba ekami, njifomemyʼende;
Nzakomba ea fafa, njifolofika la lifiki mongo.
3Yawe ale bonto owa etumba: lina likande lile Yawe.
4“Aolusa bitombelo bia Falo
biʼetumba ko lʼoloiʼokande nda lieke jʼokwa:
Ko capitaines bakande basonami
baolina nda Lieke ja Ngola.
5Njindo iolakuka;
Baolinda nda njindo ngʼekenje.
6O Yawe, likata like jʼelome lile la
jilangi ja mpamba,
O Yawe, likata likawe jʼelome josasofya winiʼoko.
7Koko we olumbʼiyʼandemala wete
baune la we nda jilangi like ja ndekola:
Oyotome nkele ekawe, ko eko
eolatumba nga bailo.
8Basiʼako batozamaki botole la loe jʼaoloʼake,
Bicumelo biʼasi biemalaki ci nga botole:
Njindo yetamaki ndʼotema wa lieke jʼokwa.
9Wini oke aokela, Njifokima,
njifaata, njifokafa baumba bʼofunio:
Mposa ekami eleki ifokinda mbimbi lʼiyo;
Njifokangolʼifaka ikami yʼetumba,
likata fikami lifafita.
10Okumbyaki bompompoʼoke, lieke jʼokwa jolakuka:
Baolinda ndʼasi ba njindo ngole lifwe.
11“O Yawe, osongi la we nda ntoku
ea nzakomba imo na?
Osongi la we? owa jilangi nda boeko,
Owa booma ndʼimemya, okambaka
belemo bia nkakamwa.
12Osembola likata like jʼelome, bokili bolamela.
13“Olonda banto bakiʼwʼosikolaka lʼisei ikawe:
Olalonda ndʼoyaloʼoke wʼoeko la mpamba eke.
14Banto baoloka, ko bayolenge:
Nkeseli iokama basi Pelesete.
15Bingambi bia Edome baokamwa ndʼekekʼeko;
Banto ba Moaba ba mpamba,
lolengi lokitʼelʼiyo:
Basi Kanana bauma baolangwa.
16Boangi lʼooma bolakwela;
Baoyala wai ngʼekenje, ndʼewela ea
bonene wa lo loke:
Elaka nko bantoʼakawe baofenda O Yawe,
Elaka nko banto bakiʼwʼosombaka baofenda.
17Wifaotsweya, ko wifaona nda
ngongo ea lisango like,
Nda wiji boki we, O Yawe, ezaka wae oyaiʼeko,
Ndʼitenela yʼoeko, O Yawe, iki bakata bake emyaka.
18Yawe ifoyalema nda mpifo ea Roi
bikeke la bikeke.”
19Eki chevaux ya Falo la bitombelo bikae biʼetumba lʼantʼakae bandafema nda chevaux baocwa ndʼetei ea lieke jʼokwa, ko Yawe aoluteya basi ba lieke jʼokwa elʼiyo; lolonde bana ba Yisalaele baoleka ndʼamoci ba kotukotu ndʼetei ea lieke jʼokwa. 20Ko Miliyama boteli owʼomoto, nkana ea Alona, aokola bewoko ndʼakata bakae ko bamato bauma baolokima la bewoko la beina. 21Miliyama aolaamba,
“Lembela Yawe, elʼende aolonga
lʼelonga ea jilangi;
Aolusa cheval la bonto okafi ndʼeko
nda lieke jʼokwa.”
Banto ba Yisalaele ndʼete keleke. Basi ba Mala
22Mose aolonda Ba-Yisalaele lima Lieke ja Ngola, ko baocwa ndʼete keleke ea Sula: ko bakendaki ndʼete keleke bembile besato ko ntabatana basi. 23Akiʼyʼokitaka nda Mala, iyo ntabameleya basi ba Mala, eki bako bololo ko ndʼewelʼeko baotanga eko lina Mala. 24Ko bantoʼako baomemesanela Mose, bakela, “Iso tomela na?” 25Ko ende aonda Yawe, ko Yawe aolotumya botamba, ko Mose aolusʼoko ndʼasiʼako ko baocwʼete lete la.
Ko Yawe aolasekeza esakyelo lʼosise, ko aolameka nkʼeko. 26Ko aolakela, “Nkinʼolanga jokoza lofoso ja Yawe Nzakomba eke o ndokoza mongo, ko olangʼokela baoyi ba ci ndʼaisoʼakande, ko wumbe batoi ndʼesiseʼekae, ko ofonga bisekyelo bikae biuma, emi mpaokilela we nkangi ikiʼmʼilelaka Ba-Ejipeto o nye: elʼemi Yawe, okoikya we.”
27Ko baoya nda Elima, bitoko biʼasi biki eko jom la bife, ko la baya ba mba ntuku nsambo: ko baoleza lilako eko ndongama lʼasi bako.
Currently Selected:
Olelo 15: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
