Olelo 10
10
1Koko Yawe aokela Mose, “Otswʼele Falo; elʼemi njocilinganya botemaʼokae, ko la botema biʼasaliʼakande, wae njeneya ntaza ine ikami nda joso likiyo: 2wete osange ndʼatoi ba bona oke, la ndʼatoi ba bonkanʼoke, belemo bekiʼm’ okambaka nda Ejipeto, ko la ntaza ikami ikiʼmʼokelaka ndʼetei ekiyo; wae lea emi nda Yawe.”
3Ko Mose la Alona baocwʼele Falo ko baolokela, “Yawe, Nzakomba ea Ba-Ebele, akela ngone, ‘Ofeza lontataanʼelʼemi elingi na? Kela bantʼakami bakende wae bansaele. 4Nkina ofeka lʼantoʼakami wae bafokende, bala, njifoyela lobi basalankata ndʼese eke: 5ko bako bifokukʼokili, ko bokili bofaenya; koko bako bifola toma tokociki lima mboko, ko la betamba beuma bemela nda lisala ekʼinyo: 6ko tolombe toke tifokama la bako, la tolombe toke la tolombe ta basaliʼakawe, la tolombe ta Ba-Ejipeto bauma: limʼekekʼeki baise bakinyo lʼankokooloʼakinyo ndʼokili la mbilʼene, kilo bene ngoko.’ ” Koko aokengwana ko aolola limʼele Falo.
7Basali ba Falo baolokela, “Bontʼone ayalemʼelʼiso ngʼilonga elingi na? Kela baendeʼako bakende, bakambele Yawe Nzakomba ekiyo belemo: kamba wʼotafea Ejipeto eofitana?” 8Baoyela lenkina Mose la Alona nda joso ja Falo: ko ende aolakela, “Lokenda, lokambele Yawe Nzakomba ekinyo belemo: lolo bako basokenda ba na?” 9Mose aokela, “Tocwa, iso lʼanolu la mpaka, lʼanaʼakiso bʼaende la bamato, lʼetongaʼekiso bia mpate la nta la ngombo; elʼiso tocwʼolamba elambo ele Yawe.” 10Aolakela, “Kela Yawe ayalʼelʼinyo, lʼemi nkayʼinyo elekelo wae lokende, inyo la banaʼakinyo ba tosisi! Lofonga loala, ele bobe bole nda joso likinyo. 11Afa ngoko! Inyo baende locwʼokambela Yawe belemo; inyo lolangaki ngoko.” Ko baolaita lima joso ja Falo.
Elo ea mwambi – basalankata
12Koko Yawe akela Mose, “Sembola likata like nda ese ea Ejipeto wete basalankata baye ndʼokili wa Ejipeto, ko baleke njunda yʼokili iuma iki mboko ocikaka.” 13Koko Mose aosembola bonkandoʼokae ndʼese ea Ejipeto, ko nda mbilʼeko euma lʼotso bouma Yawe aotomʼompompo ndʼese eko lima est: ko aki nkesa okya, bompompo wa est bolieza basalankata. 14Ko basalankata bako baokukʼokili wa Ejipeto bouma, ko baoyala ndʼese ea Ejipeto euma; baki wete bobe mongo; basalankata bamo baki joso ntabakosongi la bako ko basoya ndʼafeka bafaosongana lʼako nye. 15Eki bako okukaka bokili bouma, ko bokili boyala yo lʼako: baleki njunda, lʼamuka bʼetamba baki mboko ocikaka: nko yomba yʼesolo ikociki, la botamba la njunda ya lisala, ndʼese ea Ejipeto euma. 16Nkako Falo aoleta Mose la Alona lomolomo, akela, “Nkeelaki Yawe Nzakomba ekinyo ko lʼinyo bobe. 17Ndʼewelʼeko, nkoonda, ontungole lima joi line likami jʼobe, o nko line kika, ko bonda Yawe Nzakomba ekinyo wete anjimwele iwa ine kika.” 18Ko ende aolola limʼele Falo, ko aoonda Yawe. 19Ko Yawe aotomʼompompo wʼonene lima wiji wa ouest, ko boko bolukola basalankata ko botomba bako nda Lieke ja Ngola; nko lisalankata limoko likociki ndʼese ea Ejipeto. 20Lolonde Yawe aocilinganya botema wa Falo, ko ende aofeka la bana ba Yisalaele wae bafokende.
Elo ea ibwa – wilima
21Koko Yawe aokela Mose, “Sembola likata like nda loola, wete wilima boyale ndʼese ea Ejipeto, wae wilima wa limpoci mongo.” 22Mose aosembola likata likande nda loola, ko limpoci ja wilima joyala ndʼese ea Ejipeto euma bembile besato; 23iyo ntabenana, ko bonto ntemala limʼitenelʼikiʼnde bembile besato: lolo bana ba Yisalaele bauma benaki fole nda tolombe tokiyo. 24Falo aoleta Mose, akela, “Lokenda, lokambela Yawe belemo; banaʼakinyo bakende lʼinyo; lolonde betonga bekinyo bia mpate la nta la ngombo becikalʼendo.” 25Mose akela, “O nye; lolo otokaya nyama ya mbeka la nganji ya ntatumba wete tolekeza Yawe Nzakomba mbeka ikiso. 26Nyama ikiso ya mbongola isimbi lʼiso; nko losembe lomoko locikale ndʼafeka; totombe nyama iko wae tokambele Yawe Nzakomba ekiso belemo lʼiko; ko iso tofea bolemo bo isʼokambela Yawe elaka nko tokitʼeko.” 27Lolonde Yawe aocilinganya botema wa Falo, ko aofeka lʼiyo wae bafokende. 28Ko Falo aokela Mose, “Imanʼelʼemi, ko fonga loala we mongo, tenake elongi ekami lenkina; ele mbile ee wenʼelongi ekami, wifowa.” 29Ko Mose akela, “Otefela bofotsi! Emi mpaenʼelongi eke lenkina nye.”
Currently Selected:
Olelo 10: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
