Wel 3
3
Wel Julawi ku Tic Migi
1Nie maeni gi dhanum’utuk pa Harun giku Musa i ceng’ ma Yehova weco ie ku Musa wi got Sinai. 2#Wel 26:60Man maeni gi nying’ wot Harun: Nadab ma kayu, man Abihu, kud Eliazar, man Ithamar. 3Maeni gi nying’ wot Harun, gi julam ma juwiro, m’ethiero kara utim i tic pa jalam. 4#Law 10:1, 2; Wel 26:61Man Nadab gikud Abihu githo i wang’ Yehova, kinde ma githiero mac ma tung’ i wang’ Yehova, i langa mi Sinai, e nyithindho migi mbe; man Eleazar gikud Ithamar gitimo i tic ma pa jalam i vut Harun ma weggi.
5E Yehova yero ni Musa, ewacu kumae, 6Kel suru pa Lawi ceng’ni, man ikethgi i wang’ Harun ma jalam, kara gitim ire. 7E gibigwoko kur pare, ku kur mir udul dho i wang’ hema mi cokri, kara gitim tic mi hema. 8Man gibigwoko jamni ceke mi hema mi cokri, ku kur mi nyithindho mir Israel, kara gitim tic mi hema. 9Man ibimio Julawi ni Harun man ni wote: jumiogi dho ire pi nyithindho mir Israel. 10Man ibiketho Harun ku wote, e gibigwoko lamulam migi: e jawirok m’ucoro ceng’ni jubinege.
11Man Yehova yero ni Musa, ewacu kumae, 12#Ai 13:2Man an, nen, agamu Julawi ku kind nyithindho mir Israel kaka kayu ceke m’uyabu ic i kind nyithindho mir Israel; e Julawi bibedo para: 13kum kayu ceke gi para; i ceng’ m’agoyo ie kayu ceke m’i ng’om Misiri adwoko kayu ceke mir Israel leng’ ira, dhanu ku lim de; gibibedo para: an a Yehova.
14Man Yehova yero ni Musa i langa mi Sinai, ewacu kumae, 15Kwan nyithindho pa Lawi ku ba udi pa weggi ku ba udi pa weggi, ku ba wat migi ku ba wat migi: ibikwanu welgi ku ba co ceke ma dwi pare acel ku ma sagu. 16E Musa kwanugi calku lembe pa Yehova, calu jung’olo ire. 17Man maeni gi wot Lawi ku ba nying’gi ku ba nying’gi: Gercon, man Kohath, ku Merari. 18Man maeni gi nying’ wot Gercon ku ba wat migi ku ba wat migi: Libni ku Cimei. 19Man wot Kohath ku ba wat migi ku ba wat migi: Amram, ku Izhar, man Hebron, kud Uziel. 20Man wot Merari ku ba wat migi ku ba wat migi: Mali ku Muci. Maeni gi wat mi Julawi calku udi pa weggi.
21Wat mi Julibni ku wat mi lucimei en e pa Gercon: maeni gi wat mi Jugerconi. 22Gi ju m’i kindgi ma jukwanu welgi, calku wel mi co ceke, m’ugambre kum ju ma dwi migi acel ku ma sagu, en e ju ma jukwanu welgi gi rubanga abiro ku dak abic. 23Wat mi Jugerconi bigonjo i ng’ei hema yo reto. 24Man Eliasaf ma wod Lael bibedo jadit mi ot pa wego mi Jugerconi. 25Man kur mi wot Gercon i hema mi cokri bibedo hema, man Hema, ku jambumne, man voi mi dhugola mi hema mi cokri, 26man gang’bongu mi lelagang’, ku voi mi dhugola mi lelagang’, ma ni i vut hema, man i ng’et pemblam gbur, man thondhe mi tije ceke.
27Man wat mi Juamrami, ku wat mi Juizhari, man wat mi Juhebroni, ku wat mi Juuzieli en e pa Kohath: maeni gi wat mi Jukohathi. 28Calku wel mi co ceke, ugambre kum ju ma dwi migi acel ku ma sagu, gi rubanga abora ku dak abusiel, ma gibegwoko kur mi kamaleng’. 29Wat mi wot Kohath bigonjo i ng’et hema ma yor ariwa ma piny. 30Man Elizafan ma wod Uziel bibedo jadit mi ot pa wego mi wat mi Jukohathi. 31Man kur migi bibedo sanduk, ku mesa, man thethala, ku pemblam, kud agulu mi kamaleng’ ma gitimo kudo, man voi, ku ticne ceke. 32Man Eliazar ma wod Harun ma jalam bibedo jadit mi judongomawijo mi Julawi, man ebibedo wi ju ma gwoko kur mi kamaleng’.
33Wat mi Jumali, ku wac mi Jumud, en e pa Mciari: maeni wat pa Merari. 34Man maeno ma jukwanu welgi, calku wel mi co ceke ugambre kum ma dwi migi acel ku ma sagu, gi rubanga abusiel ku dak ario. 35Man jaditmawijo mi ot pa wego mi wat pa Merari en e Zuriel ma wod Abihail: gibigonjo ng’et hema ma yor ariwa ma malu. 36Mac kur ma juketho mi wot Merari bibedo bau mi hema, ku riune, man mbegine, ku werne, ku jambticne ceke, ku tije ceke, 37man mbegi mi lelagang’ m’utieke gbur, ku werne, ku gutene, man thondhe. 38Man ju m’ugonjo i wang’ hema ma yo nyangu, i wang’ hema mi cokri yo ku wokceng’, bibedo Musa, man Harun ku wote, ma gibegwoko kur mi kamaleng’ pi kur mi nyithindho mir Israel; man jawirok m’ucoro ceng’ni jubinege. 39Dhanu ceke ma jukwanu welgi mi Julawi, ma Musa giku Harun gikwanu calku lembang’ola pa Yehova, ku ba wat migi ku ba wat migi, co ceke ugambre kum ma dwi pare acel ku ma sagu, gi rubanga pier ario wi ario.
Julawi man War mi Kayu
40Man Yehova wacu ni Musa kumae, Kwan co ma kayu ceke mi nyithindho mir Israel ugambre kum ma dwi pare acel ku ma sagu, man igam wel mi nying’gi. 41Man ibigamu Julawi ira (an a Yehova) kaka kayu ceke i kind nyithindho mir Israel; man lim mi Julawi kaka kayu ceke i kind lim mi nyithindho mir Israel. 42E Musa kwanu, calu Yehova ng’olo ire, kayu ceke i kind nyithindho mir Israel. 43Man kayu ceke ma co calku wel nying’, ugambre kum ma dwi pare acel ku ma sagu, mi ju m’i kindgi ma jukwanu welgi, gi rubanga pier ario wi ario ku dak ario ku pier abiro wi adek.
44Man Yehova yero ni Musa, ewacu kumae, 45Gam Julawi kaka kayu ceke ma kind nyithindho mir Israel, man lim mi Julawi kaka lim migi; e Julawi bibedo para: an a Yehova. 46Man pi war mi kayu mi nyithindho mir Israel dak ario ku pier abiro wi adek ma gikadhu wel mi Julawi, 47ibigamu cekel abic i bang’gi ku ba wie ku ba wie; calku cekel mi kamaleng’ ibigamugi (cekel acel en e gera pier ario): 48manibimio sente, ma juwaru kudo dong welgi m’udong’, ni Harun ku wote. 49E Musa gamu sente mi war ba ju ma welgi kadhu ju ma juwarugi ku Julawi; 50egamu sente ba kayu mi nyithindho mir Israel, cekel rubanga acel ku dak adek ku pier abusiel wi abic, calku cekel mi kamaleng’: 51e Musa mio sente mi war ni Harun ku wote, calku lembe pa Yehova, calu Yehova ng’olo ni Musa.
The Holy Bible In Alur (Lur), Revised Orthography © United Bible Societies, 1970.