Wel 4
4
Tic mi Julawi
1Man Yehova yero ni Musa man ni Harun, ewacu kumae, 2Gam wel wot Kohath ku kind wot Lawi, ku ba wat migi ku ba wat migi, ku ba udi pa weggi ku ba udi pa weggi, 3ugambre kum rundi pier adek ku ma sagu cil kum rundi pier abic, dhanu ceke m’umondo i tic kara gitim tic i hema mi cokri. 4Maeni en e tic mi wot Kohath i hema mi cokri, kum gin ma leng’ m’usagu: 5kinde ma gonjo tugo woth, Harun bimondo, giku wote, man gibitugo kusikabongu mi voi, man gibiumo sanduk mi lembatuca kude, 6man gibiume ku lau yedi m’i nam, man gibipedho bongu m’ulweku ceke i wie, man gibiroyo yende i kume. 7Man gibipedho bongu m’ulweku wi mesa mi kwen m’anyutha, man gibiketho atangla i wie, kud upal, ku tabu man kikombe ma jukonjo ko; man kwen ma thiri thiri bibedo i wie: 8man gibipedho bongu ma kwar ngbo i wigi, man gibiumo maeno ku lau yedi m’i nam, man gibiroyo yende i kume. 9Man gibigamu bongu m’ulweku, e gibiumo thethala mi der, ku thalane, ku makasine, ku wer mi makasine, kud agulu ceke mi mo, ma gitimo kudo ire: 10man gibikethe kud agulune ceke yor i jambum mi lau yedi m’i nam, man gibikethe wi yen. 11Man gibipedho bongu m’ulweku wi pemblam mi mola ma kwar, man gibiume ku jambum mi lau yedi m’i nam, man gibiroyo yende’: 12man gibigamu agulu ceke mi timotim, ma gitimo kudo i kamaleng’, man gibikethogi i bongu m’ulweku, man gibiumogi ku jambum mi lau yedi m’i nam, man gibikethogi wi yen. 13Man gibikabu vuru woko ku kum pemblam, man gibipedho bongu m’uluga i wie: 14man gibiketho agulune ceke i wie, ma gitimo tim kudo i vute, atangla mi mac, ku gol mi ring’o, kud upal, kud alibi, kud agulu ceke mi pemblam; man gibipedho jambum mi lau yedi m’i nam i wie, man gibiroyo yende. 15Man kinde ma Harun ku wote gidaru umo kamaleng’, ku jamni ceke mi kamaleng’, kinde ma gonjo maku tugo woth; yo ng’ei maeno, wot Kohath bibino yeye: ento gibimulo kum gin ma leng’ ungo, gimaru tho. Gin maeni en e ter mi wot Kohath i hema mi cokri. 16Man kur pa Eleazar ma wod Harun ma jalam bibedo mo mi der, kud udok ma ng’wice ng’ar ma lim lim, ku lam mi mogo ma thiri thiri, ku mo mir awira, man kur mi hema dho, ku gin ceke ma ni i ie, kamaleng’, ku jamnine.
17E Yehova yero ni Musa man ni Harun, ewacu kumae, 18Kud wukab suru mi wat mi Jukohathi ku kind Julawi; 19ento wutim kumae i kumgi, kara gibed kwo, man ku githo, kinde ma gibino ceng’ni ba gin ma leng’ m’usagu: Harun ku wote bimondo, man gibikethogi kubang’gi kubang’gi ng’atuman ba tic pare man ba ter pare; 20ento gibimondo nineno kamaleng’ kadok nyathigi de ngo, gimaru tho.
21Man Yehova yero ni Musa, ewacu kumae, 22Gam wel mi wot Gercon bende, ku ba udi pa weggi ku ba udi pa weggi, ku ba wat migi ku ba wat migi; 23ikwangi ugambre kum rundi pier adek ku ma sagu cil kum rundi pier abic; dhanu ceke, m’umondo nikuro tic kara gitim tic i hema mi cokri. 24Maeni en e tic mi wat mi Jugerconi, i timo tic man i yeyo ter: 25gibiyeyo kusikabongu mi hema, man hema mi cokri, ku jambumne, ku jambum mi lau yedi m’i nam ma ni i wie, ku voi mi dhugola mi hema mi cokri, 26ku gang’bongu mi lelagang’, man voi mi dhugola mi dhugang’ mi lelagang’, ma ni kum hema man kum pemblam m’utieke gbur, ku thondhe, man jambtic ceke mi tije, ku gin ceke ma tek jubitimogi ko: gibitimo i ie. 27Tic ceke mi wot Jugerconi, i ter migi ceke, man i tic migi ceke bibedo ni kum lembang’ola pa Harun ku wote; man wubing’olo igi ter migi ceke i kur. 28Maeni tic mi wat mi wot Jugerconi i hema mi cokri: man kur migi bibedo the cing Ithamar ma wod Harun ma jalam.
29Pi wot Merari, ibikwanugi ku ba wat migi ku ba wat migi, ku ba udi pa weggi ku ba udi pa weggi; 30ibikwanugi gambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, kara gitim tic i hema mi cokri. 31Man maeni en e kur mi ter migi, calku tic migi ceke i hema mi cokri: bau mi hema, ku riune, ku mbegine, ku weme, 32ku mbegi mi lelagang’ gbur, man weme ku gutene, ku thondhe, karacelo ku jamb ticne ceke, man karacelo ku tic migi ceke: man ku nying’gi wubiketho jambtic mi kur mi ter migi. 33Maeni tic mi wat mi wot Merari, calku tic migi ceke, i hema mi cokri, the cing Ithamar ma wod Harun ma jalam.
34Man Musa giku Harun ku judongomawijo mir udul gikwanu wot Jukohathi ku ba wat migi ku ba wat migi, man ku ba udi pa weggi man ku ba udi pa weggi, 35ugambre kum rundi pier adek ku ma sagu cil kum rundi pier abic, dhanu ceke kubang’gi kubang’gi m’umondo i tic, pi tic i hema mi cokri: 36man dhanu migi ma jukwanu welgi ku ba wat migi ku ba wat migi gi rubanga ario ku dak abiro ku pier abic. 37Maeni gi ju ma jukwanu welgi mi wat mi Jukohathi, dhanu ceke m’utimo i hema mi cokri, ma Musa giku Harun gikwanu welgi calku lembang’ola pa Yehova ni kum Musa.
38Man maeno ma jukwanu welgi mi wot Gercon, wat migi, man ku ba udi pa weggi ku ba udi pa weggi, 39ugambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, pi tic mi hema mi cokri, 40cil dhanu migi ma jukwanugi, ku ba wat migi ku ba wat migi, ku ba udi pa weggi ku ba udi pa weggi, gi rubanga ario ku dak abusiel ku pier adek. 41Maeni gi ju ma jukwanu mi wat mi wot Gercon, dhanu ceke m’utimo i hema mi cokri, ma Musa giku Harun gikwanu welgi calku lembang’ola pa Yehova.
42Man ju ma jukwanu welgi mi wat mi wot Merari, ku ba wat migi ku ba wat migi, ku ba udi pa weggi ku ba udi pa weggi, 43ugambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, pi tic i hema mi cokri, 44en e dhanu migi ma jukwanu welgi ku ba wat migi ku ba wat migi, gi rubanga adek ku dak ario. 45Maeni gi ju ma jukwanugi mi wat mi wot Merari, ma Musa giku Harun gikwanu calku lembang’ola pa Yehova ni kum Musa.
46Dhanu ceke ma jukwanu mi Julawi, ma Musa giku Harun man judongomawijo mir Israel gikwanu, ku ba wat migi ku ba wat migi man ku ba udi pa weggi ku ba udi pa weggi, 47ugambre kum rundi pier adek man ma sagu cil kum rundi pier abic, ku ba dhanu ceke m’umondo kara etim tic mi timotim, man tic mi yeyo ter i hema mi cokri, 48en e dhanu migi ma gikwanugi, gi rubanga abora ku dak abic ku pier abora. 49Calku lembang’ola pa Yehova Musa kwanugi, ku ba dhanu ceke calku tic pare, man calku ter pare: e ekwanugi kumeca, calu Yehova ng’olo ni Musa.
The Holy Bible In Alur (Lur), Revised Orthography © United Bible Societies, 1970.