Wel 2
2
Karamb Gonjo ku ba Suru mi Juisraeli man Judongo mi Wigi
1Man Yehova yero ni Musa giku Harun, ewacu kumae, 2Nyithindho mir Israel bigonjo kubang’gi kubang’gi ng’atuman bang’ abera pare gire, ku giranyutha mi udi pa weggi: gibigonjo gbur ng’et hema mi cokri. 3Man ju m’ugonjo i ng’ete ma yo nyangu yo ku wokceng’ gibibedo mir abera mi gonjo pa Yuda, calkud udul migi: man Nacon ma wod Aminadab bibedo jadit mi nyithindho pa Yuda. 4Man udul pare, kuju ma jukwanu welgi, gi rubanga pier abiro wi ang’wen ku dak abusiel. 5Man ju m’ugonjo i ng’ete bibedo suru pa Isakar: man Nethanel ma wod Zuar bibedo jadit mi nyithindho pa Isakar. 6Man udul pare, ku ju ma jukwanu welgi, gi dhanu rubanga pier abic wi ang’wen ku dak ang’wen. 7Man suru pa Zebulun: Eliab ma wod Helon bibedo jadit mi nyithindho pa Zebulun. 8Man udul pare, ku ju ma jukwanu welgi, gi dhanu rubanga pier abic wi abiro ku dak ang’wen. 9Dhanu ceke ma jukwanu welgi mi gonjo pa Yuda gi rubanga dak acel ku pier abora wi abusiel ku dak ang’wen calkud udul migi. Gibilar tugo woth.
10Abera mi gonjo pa Ruben calkud udul migi bibedo i ng’ete ma yor ariwa ma piny: man Elizur ma wod Cedeur bibedo jadit mi nyithindho pa Ruben. 11Man udul pare, ku ju ma jukwanu welgi, gi rubanga pier ang’wen wi abusiel ku dak abic. 12Man ju ma bigonjo i ng’ete bibedo suru pa Simeon: man Celumiel ma wod Zuricadai bibedo jadit mi nyithindho pa Simeon. 13Man udul pare, ku ju ma jukwanu welgi, gi rubanga pier abic wi abung’wen ku dak adek. 14Man suru pa Gad: Eliasaf ma wod Reuel bibedo jadit mi nyithindho pa Gad. 15Man udul pare, ku ju m’i kindgi ma jukwanu welgi, gi rubanga pier ang’wen wi abic ku dak abusiel ku pier abic. 16Dhanu ceke ma jukwanu mi gonjo pa Ruben gi rubanga dak acel ku pier abic wi acel ku dak ang’wen ku pier abic, calkud udul migi. E gibitugo woth mir arionde.
17E hema mi cokri bilund tugo woth, karacelo ku gonjo mi Julawi i kind gonjo: calu gigonjo, gibitugo woth kumeca, ku ba dhanu ceke ng’atuman i kakare, kum abera migi.
18Abera mi gonjo pa Efraim bibedo nuti i ng’ete ma yo reto calkud udul migi: man Elicama ma wod Amihud bibedo jadit mi nyithindho pa Efraim. 19Man udul pare, ku ju m’i kindgi ma jukwanu welgi, gi rubanga pier ang’wen ku dak abic. 20Man suru pa Manase bibedo i ng’ete: man Gamaliel ma wod Pedazur bibedo jadit mi nyithindho pa Manase. 21Man udul pare, ku ju m’i kindgi ma jukwanu welgi, gi rubanga pier adek wi ario ku dak ario. 22Man suru pa Benyamin: Abidan ma wod Gideoni bibedo jadit mi nyithindho pa Benyamin. 23Man udul pare, ku ju m’i kindgi ma jukwanu welgi, gi dhanu rubanga pier adek wi abic ku dak ang’wen. 24Dhanu ceke ma jukwanu welgi mi gonjo pa Efraim gi rubanga dak acel ku wi abora ku dak acel, calkud udul migi. E gibitugo woth mir adege.
25Abera mi gonjo pa Dan calkud udul migi bibedo i ng’ete ma yor ariwa ma malu: man Ahiezer ma wod Amicadai bibedo jadit mi nyithindho pa Dan. 26Man udul pare, ku ju m’i kindgi ma jukwanu welgi, gi rubanga pier abusiel wi ario ku dak abiro. 27Man suru pa Acer gi ju ma gibigonjo i ng’ete: e Pagiel ma wod Okram bibedo jadit mi nyithindho pa Acer. 28Man udul pare, ku ju m’i kindgi ma jukwanu welgi, gi rubanga pier ang’wen wi acel ku dak abic. 29Man suru pa Naftali: Ahira ma wod Enan bibedo jadit mi nyithindho pa Naftali. 30Man udul pare, ku ju m’i kindgi ma jukwanu welgi, gi rubanga pier abic wi adek ku dak ang’wen. 31Dhanu ceke ma jukwanu welgi mi gonjo pa Dan gi rubanga dak acel ku pier abic wi abiro ku dak abusiel. Gibitugo woth cen kud abera migi. 32Maeni gi ju ma jukwanu welgi mi nyithindho mir Israel ku ba udi pa weggi ku ba udi pa weggi: dhanu ceke ma jukwanu mi gonjo calkud udul migi gi dhanu rubanga dak abusiel ku wi adek ku dak abic ku pier abic. 33Ento Julawi jukwanu ngo i kind nyithindho mir Israel; calu Yehova ng’olo ni Musa. 34E nyithindho mir Israel utimo kumeca; calku gin ceke ma Yehova ng’olo ni Musa, gigonjo kumeca kum abera migi, man gitugo woth kumeca, ku ba dhanu ceke ng’atuman ba wat migi, calku udi pa weggi.
The Holy Bible In Alur (Lur), Revised Orthography © United Bible Societies, 1970.