Nahum 3

1Can wi adhura mi rimo! epong’ ceke ku ndra man rop; amaci ai ungo. 2Ba del, bang’ ukobre m’uyengre, man riuni m’ubedo keth keth, man magali m’uringo aringa, 3idho pa won riuni, man mil mi palamularu, ku rieny mi tong’, man udul mi ju ma junego, udhuru ma dit de mir avu, man kajik mi kum umbe; gipodho wi kumgi; 4kum udul asara pa won asara ma nen ber, ma en e dhaku mir ajoga, m’eloko thek ni kum asara pare, man juudi ni kum ajoga pare. 5Nen, agoyo kora i kumi, Yehova mir udul uwacu, man abiyabu kendi peri ma lor lor i weng’i; man abinyutho muneru peri ni thek, man lewic peri ni ker. 6Man abibolo cilo ma judagu i wii, man abidwoki ni won cilo, man abikethi calu giranena. 7Man ebitimbre, nia dhanu ceke ma gineni gibipiei kud i beng’i, man gibiwacu kumae, Nineve nyothre: ng’a ma biywage? abiyenyo iri jujuk kani?

8I ber ma sagu No-amon, ma yang’ ubedo i kind kulo ma dongo, m’ubedo ku pi m’utieke gbur; ma ot ma tek pare en e nam, man gang’ pare en e mi nami? 9Ethiopia man Misiri gi tego pare, man en embe ku kieu; Put man Lubim naka gi jukony peri. 10Ento jutere woko, ecidho i ng’eca; nyithindho pare ma thindho bende jurwadugi nziki nziki wi gengi ceke; man gibolo gagi pi dhanu pare mi yung, man dhanu pare ma dongo ceke jutwiogi ku nyoro. 11In bende ibimer ku giramadha; jubikeni; ibiyenyo ot ma tek bende kum judegi. 12Ot ma tek peri ceke bibedo calu yendubolo kud ubolo m’ular ucek: tek juyengogi, gipodho i dhu jacam. 13Nen, dhanu peri ma ni i beng’i gi mon; dhugang’ mi ng’om peri gibedo thwolo ni judegini: mac uwang’u ukol peri. 14Twom pi iri pir atiek; dwok ot ma tek peri tek; mond i ulobo, man inyon ulobone; dwok kawang’ biriki tek. 15Mac biweng’i keca; palamularu bithumi woko; ebicemi pami nyathi bonyo: dwokri giri dupa calu nyithi bonyo; dwokri giri dupa calu bonyo. 16Imedo jukuloka peri ma sagu cero m’i polo: nyathi bonyo nyotho, man eduny. 17Judongomawijo peri gi calu bonyo, man jugorcik peri gi calu udul usene, m’ugonjo i arara i ceng’ mi koyo, ento ka ceng’ udongo giduny, man kakagi ng’eire ngo ka ma gibedo i ie. 18Jukwac peri ginindo, E ubimo mir Ascur; weg yung peri giyom; dhanu peri gilal wi gudi, man ng’atu moko mbe ma coko dhoggi. 19Jwik mi rem peri mbe; lero peri dit: dhanu ceke m’uwinjo rwongi giteng’o cing’gi i wii; kum ng’a ma dubo peri kukadhu thiri thiri ngo i wie?

Currently Selected:

Nahum 3: AB1970

Highlight

Copy

Compare