Nahum 2

1Ng’atu m’aturo nziki nziki eidho malu i wii: gwok ot ma tek, kur yo, dwok pieri tek, dwok tegoni tek apila. 2Kum Yehova dwoko dwong’ pa Yakobo, calu dwong’ mir Israel; kum juoi gioyogi woko, man ginyotho jang ulok migi. 3Judwoko ban mi dhanu ma tek pare kwar ngbo, dhanu ma jukero kendo kendi ma kwar ngbo: magali bogre ku nyunyu i ceng’ mi yikopiny pare, man jubewiro tong’ mi yen. 4Magali piembre i gengi; gicoro kun ku kun i yo ma lac: nen migi calu ridhro; giringo calu lukoth, 5Epoi kum weg yung pare: gipodho i piro migi; giringo ba gang’kidine, man girauma bedo ayika. 6Dhugang’ mi kulo ma dongo juyabu, man odker uloi. 7Man Huzab ubedo ayaba, jutere cen; man bong’ pare gicur acura calu dwand akuru, ma gidhongo ko korgi.

8Ento Nineve bedo calu kut mi pi m’ugambre con: ento giringo woko. Cungi, cungi, gilwong’o; ento ng’atu moko mbe m’uneno ng’eye. 9Ting’ ayeki mi mola ma tar, ting’ ayeki mi mola ma kwar; piny m’akanane thum ungo, dwong’ mi jamni ceke ma ber. 10Ie nanu, man uvuru, man nyoth; e adunde ng’oi ndiri, man cong utongre, can de ni i pier ceke, man wang’gi ceke miel. 11Kabedo mir umvor ni kani, ku kacemo mi nyithindh umvor, ka ma thwon umvor ku min umvor wotho i ie, nyathin umvor, man ng’atu moko mbe ma nyayu lworo i igi? 12Umvor yeco nziki nziki ma romo nyithindhe, man edeyo ni meg umvor pare, man epong’o odng’om pare kud amaci, man kabedo pare ku ring’o.

Nyoth ma Gwei mi Nineve

13Nen, agoyo kora i kumi, Yehova mir udul uwacu, man abiwang’u magali pare i yiro, man palamularu bicamu nyithindh umvor peri; man abithumo amaci peri woko kud i ng’om, man dwand jukwenda peri biwinjre kendo ngo.

Currently Selected:

Nahum 2: AB1970

Highlight

Copy

Compare