Hoseya 14

Julwong’o Israel Gidwog ba Yehova

1E Israel, dwog ba Yehova Mungu peri; kum ipodho kum kier peri. 2Wugam lembe wucidh kudo, man wudwog ba Yehova: wuwac ire kumae, Kab kier ceke woko, man ijol gin ma ber: e wabithiero lam mi dendhogwa calu lam mi thwoni dhiang’. 3Ascur bibodhowa ngo; wabiwotho ku wi riuni ngo; kadok ni tic mi cingwa de wabiwacu kendo ngo kumae, Wun wu mungu mwa; kum kic ginwang’u kisa i beng’i.

4Abicangu dokcen migi, abimarugi k’abamba; kum ng’ecwiny para lokre woko kud i bang’e. 5Abibedo calu thoi ni Israel; ebithiwo calu kura, man ebimeyo ulage calu Lebanon. 6Jange bilak, man berone bibedo calu yendulam, man ng’wice calu Lebanon. 7Ju m’ubedo the tipone bidwogo; gibiyepo calu nganu, man gibithiwo calu ulok: ng’wice bibedo calu pigulok mi Lebanon. 8Efraim biwacu kumae, Abibedo kud ang’o kendo ku mungu m’araga? Aloko lembe, man abinene: an a calu sipre ma numu; nyingi nwangre i bang’a.

9Ng’a ma riek, kara eng’ei thelembe mi gin maeni? won pidoic, kara eng’eigi? kum yo pa Yehova en e atira, man won bedopwe biwotho i igi; ento weg kier bipodho i ie.

Currently Selected:

Hoseya 14: AB1970

Highlight

Copy

Compare