Hoseya 13

Juewo pi Nyoth ma Gwei pa Efraim

1Kinde ma Efraim uweco, mielkum nuti; eyungre gire i Israel; ento kinde m’ekier kum Bal, etho. 2E kawono gidubo kendo kendo, man gitimo igi ayi gin m’acwia m’atwaga ku mola ma tar migi, en e mungu m’araga calku ng’eyothelembe migi gigi, kagi ceke gi tic mi jubodho: giwacu pigi kumae, Wek dhanu m’ulamu lam gicwi kum nyithi dhiang’. 3Ka kumeno gibibedo calu afuru mi kugweno, man calu thoi ma oi pir kugweno, calu cung’ ma duny kud atido ku wi lela mi fodo cam, man calu yiro ku dhu kendo.

4Ento an a Yehova Mungu peri ugambre kud i ng’om Misiri; man kud ing’ei mungu moko ndhu an, man jalar moko mbe m’umedo an. 5#Poi 8:11-17Ang’ei i langa, i ng’om mi rieu ma dit. 6Calku kwac migi, e giyeng’ kumeca; giyeng’, man adundegi tingre: ka kumeno wigi wil i kuma. 7Ka kumeno abedo igi calu umvor; abikanu adhi dhu yo calu ng’u; 8abirombo kugi calu wai ma jumayu nyithindhe, man abiyeco bor mir adundegi; e abicamugi kuca calu min umvor; yedi m’i thim biyecogi.

9En e nyoth peri, E Israel, nia ijai ira, ni jakony peri. 10#1 Sam 8:5, 6Ubimo peri ni kani kawono, kara ebodhi i adhura peri ceke? man jupoklembe peri, m’iwacu pigi kumae, Mi ira ubimo ku judongomawijo? 11#1 Sam 10:17-24; 1 Sam 15:26Amio iri ubimo i ng’ecwiny para, man akabe woko i kwinyo para. 12Jutwio kier pa Efraim; dubo pare bedo akana. 13Remokum pa dhaku ma nyol biwok i wie: en e wodo ma riek ungo; kum en e nindo ma maku kud egal i ka ma nyithindho turo ma giwok ko woko. 14#1 Kor 15:55Abiwarugi kud i tego mi liel: abiwarugi kud i tho: E tho, masendi peri ni kani? E liel, nyoth peri ni kani? lokocwiny bibedo apana ni wang’a.

15Kadok ebedo ma nyinge nuti i kind utumin, yamu ma yo nyangu bibino, en e lietho pa Yehova m’uai i langa; e kulo pare bidwono, man wi kulo pare bidwono: ebitimo ayeki kum piny m’akana mir agulu ceke ma jumaru. 16Samaria biyeyo dubo pare; kum ejai ni Mungu pare: gibipodho ku palamularu; jubirwadu mukere migi nziki nziki, man jubiriedo i mon migi ma igi nuti.

Currently Selected:

Hoseya 13: AB1970

Highlight

Copy

Compare