Ezekiel 47

Pi ma Cangu M’uai i Hekalu

1 # Zek 14:8; Yoh 7:38; Nyu 22:1 Man edwoka ba dhugola mi ot; man nen, pi wok woko ku the riu mi ot yo nyangu (kum yo dhu ot ni yo nyangu); man pi mol piny kud i there, kud i ng’et ot ma yor acwi, i ng’et pemblam ma yor ariwa ma piny. 2Elund etera woko ku yor i dhugang’ ma yor ariwa ma malu, man edhoka kud i yo ma yo woko ba dhugang’ ma yo woko, kud i yo mi dhugang’ ma neno yo nyangu; man nen, pi mol woko i ng’ete ma yor acwic.

3Kinde ma dhanu wok woko yo nyangu ku thol i cinge, eporo bot rubanga acel, man eketho akadhu kud i pi, pi ma tundo kum ngbolongbolo. 4Eporo rubanga acel kendo, man eketho akadhu kud i pige, pi ma tundo wi cong. Eporo rubanga acel kendo, man eketho akadhu kud i pige, pi ma tundo i pier. 5Yo ku ng’eye eporo rubanga acel; man en e kulo ma dit m’acopo kadhu kud i ie ngo; kum pige dongo, en e pi ma jukwang’ i ie akwang’a, en e kulo ma dit ma jucopo kadhu ngo.

6Man ewacu ira kumae, Wod dhanu, ineno maeni? Elund etera, man eketho adwogo dhu kulo ma ditne. 7Nie kinde m’adwogo, nen, yen dupa nuti wi dhu kulo ma dit i ng’ete kucel man i ng’ete mucelo. 8Elund ewacu ira kumae, Pi maeni mol yor i ng’om ma yo nyangu, man gibicidho piny i Araba; man gibicidho yor i nam; pi ma juketho uwok woko bicidho i nam; e jubicangu pige. 9Man ebitimbre, nia ku ba gin ma kwo ceke ma nyai, i ka ceke kubang’e kubang’e ma kulo ma dit utundo i ie, gibibedo kwo; man udul rec ma dit hai bibedo nuti; kum pi maeni tundo kuca, man jubicangu pi mi nam, man gin ceke bibedo kwo i ka ceke ma tek kulo ma ditne tundo i ie. 10Man ebitimbre, nia jujak rec bicungo i ng’ete: ugambre En-gedi utundo Eneglaim ka ciko voi bibedo nuti; rec migi bibedo ku kwonde ku kwonde, calu rec mi nam ma dit, dupa dupa, 11Ento ka codhone, ku ka kutotolune, jubicangu ngo; jubimiogi mi kadu. 12#Nyu 22:2Man dhu kulo ma dit wi ng’ete, wi ng’ete kucel man wi ng’ete mucelo, yen mi cemo bitwi kubang’e kubang’e, ma ithe biner ungo, kadok nyinge de birem ungo: ebicego nyinge ma nyen ku ba dwi ku ba dwi, kum pige wok woko kud i kamaleng’; man nyinge bibedo mi cemo, man ithe mi cangu.

Kieu man Pok mi Ng’om

13Rwoth Yehova wacu kumae: Maeni bibedo kieu, ma wubipoko ko ng’om ni aba calku suru apar wi ario mir Israel: Yusuf bibedo ku makapiny ario. 14Man wubigamu ni aba, ng’atuman ku wadi; kum akwong’o ya abimie ni kwaruwu: man ng’om maeni bipodho iwu ni aba.

15Man maeni bibedo kieu mi ng’ombe: I ng’ete ma yor ariwa ma malu, ugambre kum nam ma dit, yor i yo mi Hethlon, cil kum kamondo mi Zedad; 16Hamath, ku Berotha, man Sibraim, ma ni i kind kieu mi Dameski ku kieu mi Hamath; Hazerhatikon, ma ni i ng’et kieu mi Hayuran. 17Man kieu m’ugambre i nam, bibedo Hazarenon i kieu mi Dameski; man yor ariwa ma malu ma malu kieu mi Hamath nuti. Maeni ng’ete ma yor ariwa ma malu. 18Man i ng’ete ma yo nyangu, i kind Hayuran ku Dameski man Gilead man ng’om Israel, bibedo Yordan; wubiporo gambre kum kieu ma yor ariwa ma malu, cil kum nam ma yo nyangu. Maeni ng’ete ma yo nyangu. 19Man ng’ete ma yor ariwa ma piny bibedo gambre Tamar cik i pi mi Meriba-kadec, ba kulo mi Misiri, kum nam ma dit. Maeni en e ng’ete ma yo piny yo piny. 20Man ng’ete ma yo reto bibedo nam ma dit, ugambre kum kieu ma yor ariwa ma piny kum kieu m’ulokre kum kamondo mi Hamath. Maeni ng’ete ma yo reto.

21E wubipoko ng’om maeni kumeni iwu calku suru mir Israel. 22Man ebitimbre, nia wubipoke ku gagi ni aba iwu man ni juwirok m’ubedo ni umondo i kindwu, ma binyolo nyithindho i kindwu; man gibibedo iwu calu jung’om i kind nyithindho mir Israel; gibibedo kud aba karacelo kudu i kind suru mir Israel. 23Man ebitimbre, nia i suru ma jawirok ubedo i ie ni umondo, wubimio ire aba pare keca, Rwoth Yehova wacu.

Currently Selected:

Ezekiel 47: AB1970

Highlight

Copy

Compare